حظك .. نصيبك .. بريالين ..اختاري

تتذكرون حظك نصيبك بريالين..
احنا يوم كنا صغار كنا نشتريها وهي عباره عن كرتون مقسم عدة تقسيمات على شكل مربعات...
انت ادفعي ريالين وتطقين واحد من المربعات ويطلع لك حظك ..
عاد انت ونصيبك ياهديه حلوه ياشوكلاته صغيره أو يكون فاضي وموتي من حسرتك على الريالين اللي دفعتيها على الفاضي0

المهم جتني حالة سرحان وتفكير .. وتفكير مو هين ..
قلبت فيها حياتي فوق تحت وقسمتها وصنفتها ومرت علي كأني أتفرج على فيلم....
شفت حياتي على شكل سي دي خفيفه وماحسيت فيها ومرت من عمري مثل لمح البصر0

ولأن الحابل عندي ياكثره كثراه والنابل أكثر وأنيل .... عدلت من جلستي زين وقلت ياكبسوله سوي شختك بختك . يعني شوفي نصيبك من كل شي
وبمعنى أدق قسمي مراحل حياتك كم قسم وحطي نسبة نجاح كل مرحله وحظك منها ...
وبلا تهليس خليس صادقه ولا تظلمين ولا تنظلمين ...
يعني سويت اجتماع مع نفسي واتفقت معها أكون صادقه مثل مأبيكم تكونون صادقين0 في استبياناتكم عن درجة الحظ اللي كسبتوها في كل مرحله عشتوها0

وجعني ظهري وأنا متسمره أفكر.. أخذت نفس وتسندت عدل .... وين أبداء معه.....


استعنت بالله وخصوصا ان الجو كان مناسب وكل مسببات الازعاج غير موجوده والساعه حول الفجر الله يصبحنا ويربحنا0

فليتها وسحبت نفس وسويت ريلاكس وبديت من أيام القشاره والشطانه..:42:
من أيام الدراسه في الابتدائي ....
أوووووووه هذي ويش يطلعني منها ..هذي ذكرياتها كثيره 0 وبلاويها أكثر وحساسيتها أكثر وأكثر0

كنت فعلا أغار من أخواتي كانوا مجتهدات أكثر مني ويحصلون درجات أكثر مني وبحساسية الصغيريات كنت أظن أمي وأبوي يحبونهم أكثر مني ..


بس اللي أذكره زين ان الاستاذه كانت تضربني لأن أخواتي أشطر مني مع ان تقديري كان جيد جدا بس هم أفضل مني مجموع..
مدري ليه مصره تقارني فيهم 0
والظاهر ان أشباهي تذكرها بوحده تكرهها فكانت على الطالعه والنازله تشتم وتسب وطق علىمستوى ..

واذا شكيت لأمي ياحلوها ماأنسى شكلها
كانت تركز ظهرها وتشخص بعينيها الصغيرتين ثم توجه سبابتها لي ..
حتى يخيل لي انها لقمان الحكيم وأنتظر جوابها بكل حماس
فتنطلق كلمة الحسم وتقول ... ووددت لو لم تقلها ( يأدبونك)
فهي حفظها الله ممن قل كلامهم ودل على الكثير00ياحبيلك يمه الله يذكرك بالخير


عطيت هالمرحله الدراسيه 20% ...



في البيت طفولتي حلوه ...
كنت أحب اللعب والمقالب والتعليقات وياما وهقت أهلي في شغلات ساعتها كانوا يزعلون
بس الحين اذا ذكرناها انفقعت بطوننا من الضحك
وكنت ألعب مع عيال وبنات الجيران وكان عندي قطوه وخروف صغير.. أناديه باسمه ويجي يركض وحمامه بس ماطولت عندي ماأذكر من أخذها مني <<أي والله وينها .......
وكان عندي دفتر أسجل عليه لعبة أنسان.. حيوان.. نبات <<مدري تعرفونها ولا لاء ولي صداقات و كنت أحب البيبسي والكت كات.. وكان لي 3 أخوات بس أنا أصغرهم وهم عني مشغولات0


عطيت هالمرحله الطفوليه الاجتماعيه 80% ...



مرحلة الشباب :27:
.. مدري وشلون صايره فجأه ماصار عندي صداقات .. ايه تذكرت لأن لما كنت صغيره كانت صداقتي مع الصبيان أكثر اللي هم عيال عمي لأن كنت تقريبا في سنهم وماكان فيه بنات كبري00 يعني أكيد أبفقدهم بحكم العبايه والبلوغ وتنقطع الصله فيهم00 يعني غلطتي اِني ماحجزت لي كم بنت تظل معي لما أكبر..
حتى بالمدرسه ماعرفت أكوٌن صداقات ...لحظه اسمحو لي شوي أبسحب بطانيتي أحس اني بردانه وأنا أتذكر هالمرحله 000
بالفعل هالمرحله من حياتي ماحبيتها أبد وكان دمها ثقيل 0

عطيت هالمرحله 30%....



ولأني ماحبيت هالمرحله ودمها ثقيل علي
ماشفت مانع أقبل أول عريس يطب علينا وحتما وأكيد عريسي هذا ماتعرفت عليه بالجامعه ولا حتى كان من ولاد الحته..لكن الحظ والنصيب وقرادته جابته لنا
ودق الباب وفتحت له.... وأهلا وسهلا قلت له0


عاد أيامها كنا من البقره الى المائده ..لاتشوفينه ولايشوفك وفي معظم الحالات يدخل عليك ليلة العرس ماتعرفين شكله..
يعني ماتدرين هو المعرس ولا الثاني اللي جنبه وياحسرتي ان كان اللي جنبه أزين منه ..حامض على بوزس مالس اِلا هو لو أعرج0
بس الحمد اهو مو حلو لكنه مو شين والاهم انه مايلعب على الحبلين ...
رجال في حاله ومكافح وطموحاته انه يكوٌن اسره ويحافظ عليها ....
لكن بداية زواجي كانت صعبه شوي ومو فاهمه شي والناس غير ناسي وتعبت على بال ماأبني أساساتي وأثبت قواعدي <<< مقاول يتحدث0
حتى 6 سنين


عطيت هالمرحله 48%...



المرحله اللي بعد هذي عشت أجمل فترات حياتي وزواجي صار أسعد من الأول وكانت ربيع وخضره وانفتحت لي الدنيا من أوسع أبوابها ..
من كل النواحي..الله مغنينا من صالح فضله و الزوج كله خير وحافظنا في عيونه ..
والله رزقني ببنتين وولد ين من أجمل مايكون ..
وكان احساسي انهم ملكي. اِحساس غريب وفي كل مره أضاعف جهدي عشان أكون أم مثاليه وكنت أحبهم حيل00حيل مره وضمتهم أشتهيها وريحتهم تدخل جوا وتمشي في دمي ..
حبهم ماله وصف ..ان فرحوا بكيت وان حزنوا بكيت << حاله مستعصيه مافيها ملح
والدموع جاهزه يااااااااااه عليها هالمرحله.. ملكت الدنيا ومافيها0


أعطي هالمرحله 88% عشان ماأكون مبالغه0



آخر مرحله اللي هي أنا عايشتها الحين :41:
عيالي صاروا شباب وفي سن المراهقه والخوف عليهم مسيطر على مخي وعقلي وعلى كل قوه أمتلكها...ان كان باقي قوه00 :(
وين ماتلفين تلقين الفتنه في كل مكان ..الله يكفيهم شرها0
أعاني فيها محن ثم تزول ويفرجها الله من عنده 0
..ادعي الله انها يجعلها بردا وسلاما علي ..
وأرجو من الله أن يكون حظي فيها ماأطمع وأقول
100% ولكن ياسلام لو صارت 99,99% 0

طلعت بنتيجه ان حظي من الدنيا وسط .. من كل شي وسط ..
والحمد لله على كل حال0





والحين دوركم يابنات احكوا لي حظكم وقدركم وكم تعطين نفسك في ال % من كل مرحله وأي مرحله مو شرط من اللي أنا ذكرتهم 0..
بس يكون بصدق .. وبواقعيه ..وشفافيه .. وهذي حال الدنيا 0





كلي آذان صاغيه ..