حفلة زفاف حول العالم

امس طرى على بالي فكره
بما اني قاعده اخطط لحفلة العرس قلت ليش ما اشوف طرق تجهيز الحفلات في كل مكان او مجتمع

انا راح اوصف لكم طريقة حفل زفاف الكويتين من اصل ايراني شلون صايره
اتمنى تعجبكم

اهم شي في حفلة العرس هو سفرة العروس و تقوم العروس واخواتها وصديقاتها المقربات باعداد هذي السفرة لان يكون لها ذكرى حلوه
مع ان بعض الشركات صارت تقوم فيها الحين وتسهل الامور بس لما العروس تجهز وتتعب عليها تكون مجهزه بالحب والوفاء

المهم
السفره عباره عن طاولة طعام بس من النوع الواطي شوي وتكون دائريه او بيضاويه او مربعة او مستطيله حسب ذوق العروس
تغطى السفره بمفرش مطرز يدوي برسمه مميزه تكون مثل الشعار لهذه السفره

وتحط بالنص حوض زجاجي مملوء بماء الورد وعليه شوية زهور حلوه تكون عايمه على الماء ممكن تحط شموع بس الحوض واسع وكبير

لان الماء يرمز للطهاره
بعدين تزين السفره باوراق الشجر الخضراء لترمز الى ان طريقها اخضر بأذن الله
وتلف كاكاو بقطع مطرزه يدوي ودانتيل ومربوطه بشرائط حلوه

وتلف حناء معجونه جاهزه بنفس الطريقه بس ممكن تغيري الالوان يعني كل نوع تلفينه بخامه لون مختلف
مكسرات ، ورد مجفف ، اي شي يطرى على بالك

طبعا كل نوع يصف في جهه معينه حول حوض الماء
كذلك يجب وجود البيض الملون ، يخرجون ما به من سائل ويلون بالوان حلوه وتكون مناسبه لتصميم السفره
البيض يرمز للخصوبه

كذلك وجود خبز محشى جبن بس بطريقه حلوه ومبتكره ليرمز الى قناعه العروس ورضاها بالعيش مع المعرس لو على القليل

وطبعا تزين بالورد وشرائط ملونه بطريقه حلوه

ولازم يحطون وعاء به عسل طبيعي

ولما يجي المعرس يضع اصبعه الصغير في العسل والعروس كذلك وكل واحد ياكل العسل من يد الاخر علشان يحلون ايام بعض ان شاء الله


هاه وشرايكم بعرسنا ان شاء الله يعجبكم

والحين اي وحده تشوف ان العرس عندهم مميز تذكره لنا
علشان نتعرف اكثر على عاداتكم و هم ناخذ افكار جديده لتجهيز عروسنا

مع تحياتي