حلمي بس شعري يرجع مثل زمان / قديم

السلام عليكم ورحمة الله وبركاته
كيفكم بنوتات
مشكلتي شعري وآه من شعري
كان قبل تقريباً ٥ سنوات كثيف وثقيل ويطول بسرعه رغم اني مااهتم فيه بالعكس اصبغ شهرياً واسشور اول مااطلع من الحمام على طول وبعد الاستشوار يطلع خيال ولايخرب حتى مع الرطوبه
والحين رغم الاهتمام مرررره معدوم
والسبب فرد الاعشاب قريت عنه ولاني طماعه كنت ابغى ارتاح من السشوار ورحت سويته طبعاً في البيت اللي فيه حديده وعفص واللللللخ
في البدايه كان كل شئ تمام مافرد شعري مره لكن سهل علي الاستشوار
وبعد ٦ اشهر صار شعري يتساقط بشكل يخوف وخسرت تقريباً نص شعري
بس بعد فتره الحمدلله خف التساقط وكان الشئ السلبي الوحيد ان شعري قل بشكل ملحوظ
ومرت الايام خخخخخخخ صارت قصه
المهم قبل سنه ونص اقرا موضوع لتاجره تبيع فرد اعشاب وتحلف انه خالي من الحديده والعفص ومافي اي مواد مضره للشعر وبعد ٩ اشهر تقدرين تصبغين عادي ويجيني ابليس يقول سويه ماراح تخسرين شئ
واشتريت الفرد بعد مااكدت لي كلامها واستخرت ورحت عند كوافيره تسويلي اياه ونبهتني الكوافيره كثير بس انا غبيه ماسمعت الكلام
المهم سويته وانفرد شعري يمكن 50% وبعد ٤ اشهر بدا يتساقط شعري بس اخف من الفرد الاول
لكن المشكله الاسوأ بديت الاحظ الشعر الجديد اللي طلع لي مرررره خشن وخفيف وماينفع فيه حتى الاستشوار
وانا طبيعة شعري كيرلي ناعم وثقيل يعني نفس الشعره ثقيله
المهم بعد ٩ اشهر قلت بصبغ عشان الشعر الجديد يثقل شوي
واروح اصبغ في البيت اخذت غارنييه لانها خفيفه على الشعر وانا استحم بغى يجيني سكته قلبيه
نص شعري طاح والاغلب يتكسر وصارت قصه جديده خخخخخخخخ
المهم بعد المعاناه طال شعري وقصيت الشعر المفرود وبديت اهتم فيه
بس بعد ماقل شعري خصوصا من المقدمه وصار خفيف مره ومجعد والمشكله ماعاد يستشور بسهوله واذا تسشور ثواني ويخرب حتى في الجوء الجاف
والمشكله مع الزيوت يتساقط بزياده يمكن لان الفروه صارت دهنيه من الفرد الله لايعيده
الحين ابغى شئ يرجع شعري مثل ماكان رغم اني اتوقع مستحيل يرجع مثل ماكان بس على الاقل احاول
واهم شئ عندي شئ يثقل الشعر
تكفون ساعدوني لان والله نفسيتي تعبت مره بسبب شعري
وربي يجزاكم الجنه
ويحقق اماني كل وحده ترد علي
واللي ماعندها حل ترفع الموضوع ربي يسعدكم