حل بسيط لتساقط الشعر و تطويله (من تجربة شخصية و الله )

السلام عليكم و رحمة الله و بركاته

اول شي الحمد لله رب العالمين على هالنعمة و لا حول ولا قوة الا بالله العلي العظيم

انا كنت عاني كتير من تساقط الشعر ... رحت على دكتورة و عملت تحاليل بس مافي شي غير طبيعي .... و رغم هالشي عطتني انواع فيتامينات لحتى يوقف تساقط الشعر بس مافي امل .... هيك لمدة سنتين , تعبت و فقدت الامل انو يكون عندي شعر حلو و طويل....
صرت و الله احيانا خاف مشط شعري مشان ما شوف الفرشة اديش فيها شعر متساقط , و اكره اتحمم مشان ما شوف الخصل الي بتنزل من شعري بالحمام .... و ما عاد تمنيت اصلا شعري يوصل لخصري لانو دائما يوصل لنص ضهري و يكون مقصف و ناشف و حالتو حالة , غير عن القشرة الي بتقرف و بتخلي منظر الشعر بشع .... :44:

الحل:
حبوب زيت السمك (اوميغا 3) عيار 750 و ما فوق
انا استخدمت هالحبوب كمقوي عام (بناء على مقالة طبية قرأتها بمجلة) و تذكرت انو اهالينا كانوا يعطونا حبوب زيت السمك و نحنا صغار مشان القوة , بس لاحظت انو شعري فجأة وقف عن التساقط , يعني بمشط شعري و يا دوب بتنزل شعرتين تلاتة و نفس الشي وقت الي بحمم شعري التساقط صار خفيف كتير ما متل اول خصل خصل (الحمد لله رب العالمين ولا حول ولا قوة الا بالله)...و القشرة اختفت تماما من شعري مع اني قبل الحبوب ما خليت نوع شامبو للقشرة مااستخدمتو....غير عن انو شعري طول خلال شهرين ووصل لخصري متل ما انا بدي و الحمد لله رب العالمين , مع تقصيف خفيف لحقتو و قصيتو قبل مايزيد :hahaha: (حتى رفقاتي ما لاحظو اني اصلا قصيت شعري كالعادة :35:)

بقي عندي مشكلة الشعر الخفيف ... لسا شعري خفيف ما متل اول ... بس بدي رد ارجع للحبوب لانو العلبة خلصت عندي ,,, انا كنت استخدم حبوب اوميغا 3 عيار 750 مغ بس هلأ جبت عيار 1000 ملغ و رح داوم عليون ان شاء الله , و ممكن تحصلو هالحبوب من ايا صيدلية

و الله نصيحة من قلبي لالكون لاني عانيت كفاية من تساقط الشعر و القشرة و بطء نموه

ملاحظة: انا ماني دكتورة او صيدلانية , يعني اذا بتشكي هالحبوب فيها ضرر الك ولازم تستشيري طبيب ما تترددي , انا اخدت هالحبوب بناء على مقالة طبية بمجلة و الحمد لله ناسبتني و ما اثرت بشكل سلبي عليي فيا ريت تسألي الصيدلي قبل ما تاخذيه و يصير ذنبك برقبتي :hahaha:

و ايا سؤال (مع انو ما اظن انو في اسئلة لاني حكيت و لعيت كتير) انا جاهزة للحلوين


سلام يا حلوات