العفو اختي جود

نصيحه اللي دشت التاسع من الحين تبدا تمشي بس مو لدرجه انها ترهق نفسها
لاني قبل مشيت مشي وتعبت وقام رحمي يعورني وعاندت وكملت لاني وقتها كنت اجهز بيتي الجديد وكنت بخلص بسرعه عشان ورا النفاس اروح فيه .. والله من كثر العوار مانمت وطول الليل أون من الالم وبالمستشفى قالولي مو زين لانه ممكن يأثر على الجنين بس الله ستر
يعني امشي واذا تعبتي او حسيتي بعوار اقعدي

امس الطبيب يقولي وزني زايد 3 كيلو عن المعدل الطبيعي ( وضاق خلقي :( ).. وان الجنين ماله علاقه بكمية الاكل

وواجد قالولي ان الجنين الكبير احسن من الصغير لان الصغير يلزق بالرحم عكس الكبير اللي ينزل

لاتنسون تشترون اعشاب الولاده وتجهزون غرفة النفاس .. واللي بيتها بروحها او ماعندها ناس يجيبولها اكل دايما من الحين تسوي القبوط وتحطه بالفريزر .. عشان وقت النفاس بس الخدامه تسوي مرق وتحط القبوط فيه

اهم شي النظافه والشيره لان الوحده ماتضمن متى تولد .. وزهبي جنطه المستشفى

اووووووووف شكثر قرقت

تحياتي :26:

أختي قلبك تلج!..قلبي نار! :
الله يهون علينا وعليكِ ، بالنسبة للوزن إن شاء الله بمجرد ما تفطمين مولودك تبدأين رحلة إعادة وزنك الطبيعي ، وإن شاء الله ربي يسهل عليكِ .
وبالنسبة لشكلك هونيها وتهون ، وحاولي تفكرين بالبيبي وإن شاء الله تنسين الشكل :) .
والحمام هذا شئ كلنا مشتركين فيه معكِ ، زوجي صاير يضحك عليَّ إذا طلعنا برة البيت ، أول ما ندخل المجمع أو المحل لازم يسأل عن مكان الحمام !!

أختي التوت الزاكي :
جزاكِ الله خير على هذا التوضيح ، والله يهون على الجميع .

أختي لا تنسوا أسرانا :
جزاكِ الله خير على هذا التنبيه ، واسمحي لي أزيد على أهمية دهن البطن والثدي والأرداف بزيت الزيتون حتى يرطب الجلد وبالتالي يخفف من التشققات بإذن الله .

أختي أم عيون فتانة :
وعليكم السلام ورحمة الله وبركاته
يا أختي آلام الحوض والورك هذه شئ كلنا نعاني منه ، إنتي لو تشوفين شكلي أول ما أقوم من السرير وكيف أمشي من الألم كان هانت عليكِ آلامك من الضحك على شكلي ، وبالنسبة للسواد تطمني لأنه يروح بعد الولادة بإذن الله ، هذا شئ أكدوه لي أكثر من وحدة بعد ولادتهم ، وبالنسبة للمشي طبيبتي نصحتني أمشي من يوم دخلت التاسع ، لكن أكدت على أهمية إني ما أجهد نفسي بالمشي ، يعني أخليها تدريجية ، أول وثاني يوم عشر دقائق ، وكل يومين زيدي خمس دقائق ، حسب تحملك . وبالنسبة للسكر ما عندي علم ، إن شاء الله الأخوات يفيدونك .

أختي المعتصمة بالله :
ابعدي عن ذهنك التفكير السلبي ، فكري بإيجابية ، ما بقي إلا أيام بإذن الله وتلتقين بالكائن اللي قاعد يرفسك ليل نهار :)

أختي ^ما مثلها^ :
وعليكم السلام ورحمة الله وبركاته
الله يهون علينا وعليكِ ، وجزاك الله خير على نصائحك ، الحالة النفسية أهم مؤثر على سهولة الولادة وتخفيف الألم .

اجمعين اختي
ودهن الجسم بالزيت مفيد بس المفروض تبدين فيه من زمان مو بالشهر التاسع

تحياتي :26:

انا قريت ان كمادات منقوع الزعتر لعلاج تشقق حلمة الثدي

:26:

الله ايهوّن على الجميع انشالله..

والله خوفتوني.. انا هذا أول حمل لي.. و ما اعرف شو ينتظرني.. !!:06:

أنا توني داخله الثامن..

بس حبيت من اختي التوت الزاكي أو زوجة زوجها.. أنهم يحسبون لي أنا بأي اسبوع
لأني صراحه تلخبطت.. و حابه اتأكد اذا كان حسابي صحيح و لاّ لا..

آخر دوره لي كانت 21/ 7 / 2003

و قالت لي الدكتوره انه موعد ولادتي بيكون 20 / 4 / 2004

و اني كل 20 الشهر اكمل شهر من حملي.. يعني 20 / 2 كمّلت السابع و دخلت الثامن..


يا ريت تتأكدون لي من الحساب و اتخبروني انا الحين في أي اسبوع.. و بأي يوم اكمل اسبوع من اسابيع الحمل..

و الله يجزيكم ألف خير..