حياتي تدهورت

-


الله يسعدكم يابنات داخلة على الله ثم عليكم
اللي تقدر تساعدني بكلمة لا تبخل علي اعتبروني بنتكم او اختكم
لأني في حيرة وخوف وقلق مايعلم فيه غير ربي ..
أنا عمري 20 سنة ، بين يوم وليلة انقلب حالي فوق تحت وتغيّر وضعي وتحولت حياتي
وفقدت أشياء كثير .. وتدهورت اشياء اكثر
كل شي فيني جميل الحمدلله شكلي وجسمي ووزني وطولي حتى بدراستي متفوقة
وبعلاقاتي الإجتماعية ناجحة وكنت بالثانوي محط انظار الكل
قبل ثلاث سنين من اليوم فجأة وبدون موعد صابني مرض بالعظام اللي هو اعوجاج العمود الفقري والأسباب مجهولة ..
عشت فترة صعبة كيف اعيش حياتي طبيعية وفجأة يصيبني مرض اول مرة أسمع عنه
مريت بحالة نفسية سيئة ..
بعد كذا قلت بقرأ الرقية قرأتها ونمت كأني مغمى علي ويوم ماصحيت طلعت من حسمي دمامل كثيرة
فوق ال12 دُمّل وكلها بأسفل الظهر والاقدام والأفخاذ وكان وضعي محزن لأنها مؤلمة فكنت مااقدر انام من الألم
بعدين راحت هالدمامل واهملت الرقية خوف من انه ينعاد اللي صار
وعشت كذا حزينة ع حالي ووضعي ومااقدر اسوي شي
توالت علي امراض العظام السنة هاذي جاني الديسك
تخيلوا اني حتى عشرين سنة ماكملت وصابني الديسك فجأة وبدون سابق إنذار
وصرت احس بوهن في عظامي والم
مع ان فيتامين دال كامل ومرتفع
والكالسيوم مرتفع
بس اتعب من الوقفة ومن المشي ومن النوم ومن الجلسة اتعب بكل الوضعيات لأن ظهري صار معووج
مو اي جلسة تريحه
حتى بنومي مااقدر امد رجلي
انا اخاف اصحى بيوم مشلولة والله العظيم خايفة من اشياء كثير
خايفة من المستقبل
ودي اعيش مثل باقي البنات اتزوج ويصير عندي عيال واكمل دراستي
ماابي يضيع عمري وانا الاحق بالمستشفيات
برمضان الماضي استمريت ع الرقية وكنت احس بنعاس احيانا وانام فقط
وصرت كل يوم أقرأ سورة البقرة وادعي واصيح
واقول يارب لو كان اللي فيني ضر أكشفه عني واذا كان بفعل فاعل اكشفلي الفاعل
وظليت ع هالحال لين يوم 28 رمضان نمت وحلمت حلم غريب جدا
كل مااقوله لأي احد مايصدقني
تخيلوا حلمت اني جالسة ببيت خالي وفيه كل الناس اللي مروا علي بحياتي
صديقات وقريبات وزميلات كل الناس اللي اعرفهم
وكانت فيه وحدة جالسة هاذي البنت مدري وش جابها ع بالي
كانت معي بالمدرسة بس كانت فعلا تكرهني ودايم ترمي علي كلام وتتهاوش معنا انا وصديقتي
والأسباب مجهولة ..
المهم طلعت لي هاذي البنت بالحلم وكأنها تناظرني بنظرات غريبة
وقامت جابت لي عصير وقالتلي اشربي العصير
وكأن ربي الهمني بالحلم ان عصيرها فيه سُم ، قلتلها لا شكرا ماابي
قالت اشربيه قلت لا وأصرّت اشربه وانا رفضت
بعدين راحت
قلت لبنت خالي خلينا نطلع غرفة امك لأني مو مرتاحة بالجلسة
قالت طيب
وحنا طالعين الدرج بنروح غرفة امها جت البنت ورانا تركض بشكل مخيف
تركض وتصارخ وتكلمني بصوت عالي وهي تقول ( والله لأنتقم منك والله لأنتقم منك )
وانا خفت ودخلت غرفة زوجة خالي وقفلت الباب بالمفتاح
بعد شوي تأكدت انها راحت مو عند الباب
ورحت نزلت للدور الأول ودخلت المطبخ
اول مادخلت المطبخ رحت جهة المغسلة أبي اغسل يدي والمغسلة وراها مثل الشباك الكبير اللي يكشف ع الحوش
المهم هي فجأة طلعتلي وصارت تحاول تدفني ع الشباك
لأن الحوش مليان نمور واسود وهي تبي ترميني عليهم وتدفني بكل قوتها وانا اقاوم
اخر شي كأنها راحت وانا رحت فتحت جوالي وجتني رسالة بالواتس
مكتوب فيها انتبهي من فلانة الفلاني وهي نفسها اللي بالحلم .
وانتهى الحلم
ويشهد ربي اللي خلقني إني ماكذبت بكلمة وحدة بكل شي ذكرته ولا ظلمتها بشي
انا اقولكم الحلم وفق ماظهر لي وربي راح يحاسبني ع كل كلمة انكتب هنا
طبعا بعد الحلم جتني حالة صدمة ودقيت ع شيخ مفسر احلام
قعد يتحسب كثير وقالي اذكري الله واعزمي هاذي البنت ببيتكم وخذي اثرها
المشكلة اني مدري كيف اعزمها ومتى وانا مو ذيك الميانة معها
بس عندي رقمها واقدر اتواصل معها لأن اختها صديقة اختي
ومدري وشلون آخذ اثرها ووش اسوي فيه
واخاف لو ماعزمتها عندي الفترة هاذي تروح ولا تسافر ولا تدرس برا مدري عنها
ساعدوني يابنات كيف اتصرف
انا والله ماكتبتلكم إلا لأن حياتي تدهورت بمعنى الكلمة
حتى الرقية صار مالي نفس أقرأها
صحتي جالسة تضيع من يدي
وعلاقاتي الإجتماعية فقدتها
ونشاطي الدراسي فقدته
وتصالحي مع نفسي فقدته
حتى المرض اللي صابني ممكن بالمستقبل يأثر بشكل الجسم
وانا اكثر شي يميزني جسمي وطولي المثالي اخاف افقدهم
اسئلة كثير بمخي تلف وتدور
مختصرها من وين أبدأ وكيف اتعالج ؟