حياتي خربت بعد انجابي للتوأم استغفر الله

السلام عليكم 
كيف حالكم خواتي؟  

انا عندي توام اعمارهم ست شهور، و في غربة بعيده عن اهلي، هم في الدمام و انا في جده، جلست عند اهلي الين ما صار عمرهم اربع شهور و نصف، و رجعت،  شغالتي حبشيه و مو كويسه، بس تعصب و ما تنفع في مساعدة الاطفال،  صارت مشاكل و مشيتها و بناء على طلبها، بعدها جبت اندونيسيه يلي بالشهر هي كويسه و طيبه بس للاسف ما تهتم بنظافتها، و هي فحصت دم ما فيها امراض و الحمد لله، و قلت لها باسلوب حلو، انك راح تساعديني بالاطفال، فبليز تروشي كل يوم و غيري ملابسك بس برضو ريحتها مو تمام و اهم شيء النظافه عندي، المهم مشيتها، زوجي مضايق جدا، مع انو المسؤولية كلها فوق راسي انا اغسل ملابس و اعقم الرضاعات و احمم الاولاد لحالي و اغيرلهم و اجيب وحده مره بالاسبوع اخليها تنظف البيت كله و اعطي الاولاد لزوجي يمسكهم مو عشان اروق انا او اروح عند حدا لا عشان اطبخ، اطبخ للاسبوع كامل، تخلص الشغاله البيت و اخليها تنظف المطبخ و تمشي، كدا كل اسبوع، و انا حياتي صارت كلها قهوه تركي رايحه جايه بهاذي القهوه، هو يساعدني فيهم لما يرجع من الشغل الين وقت نومهم، ، بس احسه طفش من المسؤوليه، و انا قلت له روح غير جو مع اصحابك تعودت على الضغط و على اني امسكهم لحالي قالي ما يجيني قلب اتركهم عندك لحالك قلت له انا تعودت و الله مو مشكله روح غير جو، و انا بيني و بين نفسي قلت ما شبعت في الثلاث شهور و نص يلي عشتها لحالك؟! 

و مع العلم ما جا زارنا غير ثلاث مرات، بس اظن يلي صار انه تعود على عدم تحمل المسؤوليه كوني جلست فتره عند اهلي، و يبغاله وقت يتعود، اليوم عطيته اياهم عشان اروح اغسل ملابس،  الولد لقيته مع الخدامه يلي مو نظيفه لسه ما مشتها بمشيها بكره، تضايقت قلت له البنت مو نظيفه راح عصب و قال انا طفشت و قالي راجع المسا انتي دبري امورك لحالك، و الله لما اسيبهم شوي عنده لا اروح انام و لا اتزين و لا شيء، اروح يا اعقم رضاعات و انظف و لا اغسل ملابس، مدري حاسه بضغط شديد، و للاسف الى دحين ما لقيت شغاله كويسه تساعدني، و قاعده في غربه، و مشاكل بيني و بين زوجي كثيره وصلت للطلاق كذا مره، ما عكمرنا تضاربنا كذا كنا سمن على عسل، بس جو التوام و احنا مشاكل و كان راح يطلقني، يمكن بسبب عدم النوم الكافي، هل حياتي كدا الى الابد؟! مشاكل و عدم نوم و ضغط، الصراحه تعبت جدا و احس المسؤولية كلها فوق راسي، هو يساعدني بس طفش و يبغى الشغاله هي يلي تمسك و تسوي هو يبغى يجلس على شيشته و علىكمبيوتره، و انا اصلا ما احب الشغاله تمسك اولادي و مشاكل بيني و بينه ليش ما تخليها تمسك قلت له ممكن تساعدني تحت اشرتفي مو مشكله بس ما لقيت المناسبه، وحده عصبيه و التانيه مو نظيفه ايش اسوي اذا حظي تعيس مع الشغالات؟! 

هو دحين طلع معصب لاني قلت له ليش خليتها تمسكه و هي مو نظيفه و قالي دبري امورك و مشي