حياتي كانت ستدمر و السبب حسن نيتي...

بسم الله الرحمن الرحيم .... هذا اول موضوع صار لي و بصراحة ترددت كثير قبل لا اكتبه وخصوصا انه صار له قريب السنتين و لكن نار الظلم للأسف صعب انها تنطفي و انا متأكدة انه ماراح يحس بكلامي غير اللي جرب... و الله لا يكتب على مسلمة انها تكون ظالمة أو مظلومة....

في البداية انا حابة اتكلم عن نفسي و اتمنى تتقبلوني برحابة صدر و طبعا تنصحوني لأن هدفي الأساسي ابي احد ينصحني و يهووون علي...

أنا و العياذ بالله من كلمة أنا...تربيت في وسط عائلة متحابة و ملتزمة ... والداي يعملون في السلك التعليمي و حالتنا المادية جيدة جدا و الحمدلله و لا أذكر اني تمنيت شي إلا و وفروه لي و خصوصا لو كان له فايدة الله يطول لي بعمرهم و يخليهم و يشفيهم يارب...
المهم من صغري و انا اتوصف بالأدب و الجمال و الحمدلله و لكن كنت دايم اقول لنفسي انا مو حلوة انا احلى ما فيه طيبتي و حبي للناس .... كنت متفوقة في دراستي و كانت حياتي ماشية إلا أن دخل ناس ما يخافوا الله بين امي و ابوي و بدأت مشاكل بنهم و كنت احس انها مشاكل عادية تحصل بين اي زوجين<<ما كنت ادري إن هالمشاكل بتلاحقني طول عمري و انا مالي ذنب فيها..و الله يا بنات قصتي طويلة و مو عارفة من وين ابدأ و لو انها كتبت فيلم بتنجح و لا بعد بيقولون الناس هذا خيال مو معقول فيه ناس بهذا الشكل..
غلطة والدي انه كان يفضفض مشاكله لأهله و لكن للأسف أهله من النوع اللي يحب خراب البيوت و كانوا ينشحنون على امي و يحرضونه عليها لدرجة التبلي عليها عشان يكرهها...و ياريت وصلوا لكذا وبس حسبي الله عليهم...

انا كانت امي ما تخرجني مناسبة إلا و لبسي احلى و اغلى لبس لكن عمري ما كنت مغرورة بالعكس و لما كنت اروح عند اهل ابوي كانت اخته الكبيرة تحاول انها تحطمني طبعا عشان ابكي و اروح لأمي و امي تزعل و هنا الهدف اللي هي كانت تبيه عمتي ... كانت تتغزل في بنات العيلة اللي كانوا موجودين فلانة لبسها احلى لبس... و فلانة شعرها يهبل و فلانة احلى بنت في العيلة...و انا بشهادة الكل كنت احلى بنت في العيلة ...تخيلوا يابنات سمعت بعد فترة طويلة من هذه المواقف انه عمتي كنت لما اطلع من الغرفة او البيت بمعنى ما اكون موجودة تقلب الكلام و تقهر في قريباتي و تقول عني بنت فلان جمال و اخلاق و شياكة مين مثلها يعني الحكاية كلها نفاااااااااق و كانت من و حنا اطفال تزرع نار الغيرة و الحقد بيننا...و قسما بالله العلي العظيم اني ماكنت اتأثر بكلامها من ناحية قريباتي بالعكس كنت احبهم و احب اجلس معهم خاصة واني ما عندي خوات...كت اشوفهم مثل خواتي <<للأسف ما عرفت انهم يكرهوني غير قريب و ح اقولكم القصة اللي صارت لي معهم بعد شوي

المهم قريباتي هذول كان عندهم اخو اكبر مني ب 7 سنين و لما كنت اروح بيت اهل ابوي (بيت جدتي) يكون هو هناك مع خواته يا بنات و الله اني كنت بريئة و طاهرة بشكل ما تتخيلونه و كل تفكيري كان لايمكن اسوي شي يهز ثقة اهلي فيني و دايم ادور المثالية في ديني .. في اخلاقي في تعاملي معهم...
المهم تخيلوا كنت في الابتدائية يعني صغيييرة لكن لما كنت اشوف قريبي هذا كنت استحي و احس قلبي يدق بسرعة مو طبيعية ...و انا و الله ما اعرف لا حب و لا خرابيط فكان لما هو يجي اخرج بسرعة من الغرفة اللي هو فيها <<سبحان الله يمكن كان عندي احساس انه بيصير زوجي و ابو عيالي...

كنت هادئة و خجولة و حساسة جدا .... المهم لما صار عمري 14 سنة كان فيه مناسبة ... و كنت اول مرة انخطب فيها طبعا ابوي كان رافض تماما على اساس اني صغيرة و توني بالمتوسطة .. و ما احد دراني و كنت كل ما اروح مناسبة كان برضوا يجون خطاب لغاية في يوم صارت شبكة لوحدة من قريبنا في بيتنا على اساس كان عندنا حوش كبير المهم نزلت انا و صديقتي نتمشى و فجأة دخلوا عماني و مع اخو قريباتي ... و ترى حنا كنا في منطقة مفصولة بزرع يعني ما نبان إلا لو احد حاول انه يناظر ما بين الشجر....المهم و يشوفني قريبي و يقول انه دخلت قلبه على طول و راح كلم اخته في الموضوع و وصف لها البنت اللي شافها و هي عرفتني و قالت له إي هذي فلانة و بعد كذا خطبني في نفس الوقت اللي ابوي كان يرفض اللي يتقدموا بحجة اني صغيرة ...المهم ابوي لأنه يحب ابو قريبي كثييييييييير و عشان تعرفون القبايل يحبوا زواج الأقارب جا و قالي ....عاد انا ذيك الفترة و الله نسيت سالفة قريبي هذا و كنت اقول انا بعدني بالمدرسة و هو في الجامعة و شلته تماما من بالي و صار تفكيري في دراستي و صديقاتي ...المهم ياطويلات العمر يوجا الوالد قالي ما ادري وش ذا اللي جاني ...احساس غريب يمكن يكون فرحة....

المهم تمت الخطوبة <<خطوبة بس من غير تلفونات او كلام
و بعد فترة صار بين امي و ابوي خلاف كبير و بعدها حصل طلاق في عيلة اهل ابوي...و في هذي الحادثة انقلبت موازين حيانتا رأسا على عقب..لأن اللي طلق خالي و اللي تطلقت عمتي؟
و تبدأ حياة الانتقام طبعا فكروا عماتي كيف يقهرون اهل أمي... طريت انا في بالهم ... كيف ؟ وش بيسون؟
فكروا و فكروا و فكروا و قالوا ايه بنحرق قلب امها عليها و ينادوا خطيبي و هو يصير ولد عمي وش تتخيلون قالوا له؟
بكل بساطة افسخ الخطوبة هذي ماتنفع لك؟قالهم ليه ؟ و عشان مين وش سوت لكم؟ قالوا لها هي انطوائية و حساسة و شرانية مثل أهل أمها.. شوفوا الكلام بس...وهم متعودين مع بعض خوانهم يكون كلامهم اوامر..بس وش تتوقعون خطيبي وقتها قال لهم : انتم ما تخافون الله ابوها راعي مساجد و يحبكم و هو الوحيد اللي يساعدكم و فاتح لكم بيته و اخرتها تتطعنونه في بنته؟و هي وش ذنبها و عصب عليهم و رفع صوته و قالهم انا بنت عمي احبها و ابيها و مو انا اللي اسمع كلام حريم...و طلع من بيتهم و هو مستغرب و كانت هذي بالنسبة لي البداية فقط

و بعدها بسنتين ولد عمي سمعت انه نفسه يكلمني خاصة انها كان مسافر على منطقة ثانية بسبب دراسته لكني ما رضيت مع ان امي جابت لي التلفون لحدي و قالت لي كلميه قدامي و سلمي عليه بس انا سمحت لك بس انا مارضيت لكن كتبت له رسالة و عطيتها لأخوي الصغير يسلمه اياها و من بعدها صرنا نتراسل بس و حكايته مع عماتي عرفتها لما كان يكتب لي ويحكيني و اذكر انه كتب فيه شعر و ما شاء الله يا بنات هو الحمدلله يعزني و انا بعد الله لا يغير علينا....و صارت الملكة وانا ثاني ثانوي و تزوجنا بعد ما تخرجت من الثانوية ....
كانت من احد اهم الأسباب اللي خلتني ارتبط فيه رغم مشاكل اهلي اني احب خواته من كنا صغار و كنت فرحانة فيهم

المهم سافرنا شهر عسل و انبسطنا لكن اهل ابوي مارضوا يتركوني في حالي كانوا يرسلون خوات زوجي لأمه يعبونها علية و اني راعية مشاكل مثل اهل امي و كلام كثير....و كانت الله يهديها دايم تخاصم ولدها عشاني ليه يخرجني و يطلعني و كيف ان بناتها ما احد يخرجهم و يجيبهم و عاد انا كنت صغيرة هذيك الأيام حتى انا لما كنت ازورها تقعد تزعلني و تجرحني بالكلام بس انا ما كنت أرد لسبب: انا ما تعلمت الرد (يعني ضعيفة للأسف)
اذكر وحدة من المواقف اني كنت حامل ببكري و الدكتورة قالت لي امشي على نص الثامن و في نفس فترة حملي خواته كانوا مسوين رجيم و كانوا يبونه يمشيهم يتريضون ... انا ما كنت اروح معهم لأنهم يروحون اماكن حارة بينما انا كنت افضل الأسواق و التجمعات لأنه كانت تجيني كتمة و كان وقتها بعز الصيف...المهم الأم تعبت و ذاك اليوم جيناها انا وزوجي و تقول له : هذي(قصدها أنا) تمشيها اربع ساعات و اخواتك المساكين ساعتين و تردهم بسرعة و بعدين مين قالك تمشيها الحين انا اعرف المشي للحامل في اخر التاسع.
تتوقعون وش كان ردي...و لاشي سااااااكتة و رخيت راسي في الارض....بالله انا حامل و داخلة على ولادة و هذول عشان يبون ينحفون ...بالله فيه وجه مقارنة

مع العشرة مع اهل زوجي كنت الاحظ عدم تقديرهم لي بمعنى ممكن تصير عزايم و انا ما انعزم يعني اشياء كنت اشوفها و احسها ... كنت احس انهم ما يحبوني بس كنت اقول لا هذي وسوسة شيطان أعوذبالله منه
لغاية ما صار موقف و سبحان الله ربي يريد و يظهر كل شي

انا الحين لي تسع سنين متزوجة و من قبل سنتين......تزوجت اخت زوجي و صار في العيد انه اهل زوجها سوو عزيمة عشان يتعرفوا العيلتين على بعض المهم عزموا كل واحد و مرته و زوجي انعزم لوحده؟هو استغرب و قال يمكن العزيمة رجال بس ...و الله اذكر يا بنات ذاك اليوم في العيد هو بغت تروح عليه نومة و انا صحيته و قلت له ما يصير كذا تكسف اختك لازم تروح و لبسته و كشخته و توكل على الله و لما راح تفاجأ بأن العزيمة فيها عوائل خاصة لما شف عيال خواته قال طيب حتى انا عندي عيال و كان نفسي ارحمي يشوفون عيالي و جا حكاني مستغرب
المهم اتذكر جا و قال لي انا بكلم اخواتي ليه كذا ينسوكي و ما احد يعزمك ترى قدرك من قدري و انا و الله العظيم قلت له ما في داعي تصير مشاكل قالي لا وش مشاكل عادي انا مو رايح اتضارب انا بس ابي اشره عليهم

و ياريته سمع كلامي و ما فتح الموضوع لأنه للأسف فتح علينا نار و جرح في قلبي لا يمكن يبرى
بريح يدي شوي و اكمل سامحوني لو طولت عليكم بس و الله من النار اللي تحرق في قلبي