بسم الله الرحمن الرحيم
اتوقع 99% منكم ما قد سمعتوا بهالمرض ومو بعيده ولا وحده فيكم عمرها سمعت بهالاسم الغريب ! ممكن تقولون هذا اسم انجليزي اكيد محنا عارفينه! مهي مشكله اعطيكم الترجمه حقته ..
(الالم العضلي اللامفصلي) .... ها ..كم وحده قد سمعت فيه؟
انا كنت مثلكم الى جا اليوم الي للاسف تعرفت على هذا المرض وعز المعرفه بعد :44:!!
الهدف الاساسي من كتابه الموضوع ان هذا المرض موجود ومهو
نادر وللاسف 90% من المرضى نساء . واغلبهم يعانون من الاعراض ويتنقلون من طبيب لطبيب وياخذون اشكال والوان من
الادويه لكن من غير نتيجه وينتهون بحاله اسوء من حالتهم الاساسيه . هذا الي صار معاي وعانيت الكثييييييييييييير وشفت
دكاترة كثيييييييييييييير وبلعت حبوب اكثر بكثير !!
وللاسف محد فادني او حتى عطاني سبب للاعراض الي اعانيها.
الى درجه حسيت بعض الاحيان اني مجنونه ويتهيألي ..لكن لا يمكن احد يتهيأ هالاعراض !
لكن البدايه كانت مع هالكلمه ..
(فايبرومايالجا ّ fibromyalgia ) الي نطقها احد الدكاترة الي رحت لهم . طلبت منه يكتبها على ورقه ,رجعت البيت فتحت النت ..لقيت الترجمه .. لكن للاسف ما لقيت الا كم موضوع قصيروما يقدم اي فايدة لحالتي.سويت البحث بالانجليزي
وهنا........لقيت الي ادور عليه وللاسف مو شي يسر ابدا !!
لكن المعرفه مع المرض افضل من المرض والجهل سوا !!
اعراض المرض :
- التعب والخمول والاجهاد المستمر
- الالام في المفاصل والعظام والعضلات (باختصار جسمك كله)
-احساس بالتيبس والتكسر خاصه في الصباح عند الاستيقاظ.
- الارق وعدم الراحه بعد النوم حتى لو نمتي 12 ساعه !
- الضيق والتوتر لاتفه الاسباب ومن غير سبب بعد .
- الاكتئاب وممكن يكون بسيط غير ملحوظ او شديد .
-صداع
-انتفاخ وغازات والم في البطن وكثرة التبول .
-دوخه وتشوش في الذاكرة
- الم وقت الدورة .
هذي معظم الاعراض .. ولكن مو لازم الكل يعاني منها كلها ..انا مثلا عندي من العشرة تسعه بس :09:!
لكن علشان ما توسوسون لازم هالاعراض تستمر لاكثر من 3اشهر متواصله ..ويتم استبعاد جميع الامرض الثانيه المشابه في الاعراض ذيك الساعه يكون التشخيص .
سبب حدوث المرض :
لا يوجد !!:mad: مع كل هالاعراض والسبب لا يوجد !!
قصدهم غير معلوم .
لكن من الاسباب المحتمله :
1-حساسيه كيميائيه او غذائيه .
2-القلق والتوتر والضغوط المستمرة .
3-الاكتئاب والمرور بحالات تعب نفسي وحزن لفترات طويله.
4-التهابات فيروسيه .
5- قله وعدم انتظام النوم والسهر المستمر .
العلاج :
مرة ثانيه ... ( لا يوجد ) !!!!! تخيلوا :mad:!!
هذي للاسف قصتي مع هالمرض الشبح مثل ما يسمونه ..ليش ؟
لانه ما يظهر باي تحليل او اشعه ! لكنه موجود ووجوده قاتل بكل معنى الكلمه .
اعطيكم نبذة بسيطه ..جا وقت النوم وانا نعسانه وتعبانه وودي انام
اروح السرير الساعه 11 مساءا ..اتقلب في السرير واتقلب واتقلب اضغط الساعه جنبي ... الساعه 4 الفجر وانا لسا صاحيه . لما تدق الساعه الصباح لازم اقوم ..ما اقدر اتحرك
ايديني متيبسات .. رجليني متيبسات وجسمي كله مكسر كاني البارحه داخله حلبه مصارعه مع 10 مصارعين !
لما اخيرا اقدر اقوم يبدا الالم المتواصل .. ولما اقول متواصل اقصد الالم 24 ساعه في اليوم !! الم في راسي ..رقبتي .. كتوفي .. ظهري .. ايديني ورجولي واقسم بالله على هالكلام ..
لاني لو مكانكم ما صدقت بعد !
طبعا بعد ما اقوم بساعتين احس اني تعبانه وهلكانه وكني لي يومين ما نمت .ما عندي طاقه لاي مجهود مهما كان بسيط !
قلق وتوتر واكتئاب وضيقه في الصدر وحزن وبكاء بدون سبب !
(اي بدون سبب يكفي الالم الشنيع )..اكيد بتسالون .. ليش ما تاخذين مسكن؟ ليش ؟؟ لان (لا حول ولا قوة الا بالله )ما في اي مسكن ينفع لهالحاله ..من البنادول الى الايبوبروفين والفاليوم !!
كلها ما تنفع !
مع قتامه الموضوع جتني ايام فكرت ادعي على نفسي بالموت علشان ارتاح ..ما منعني من كذا الا خوفي على اولادي من بعدي! بس ايش ممكن تسوون لو كنتم مكاني ( ما اتمنى هالمرض ولو ليهوديه !)..مرض غريب عجيب ماله سبب ولا له علاج ولا له حتى مسكنات تخليكي تمشين حياتك !
سويت سيرتش وما يئست قلت لابد في حل ممكن دكاترتنا ما يعرفون لكن برا ممكن .الي لقيته نفس الكلام تقريبا لكن مع بعض الادويه مثل مضادات الاكتئاب والمنومات وغيرها الي تغطي على العرض بس ما تعالجه .
لكن ..
there must be a light at the end of the tunnel !
جمله اعجبتني (لابد من وجود ضوء في نهايه الممر المظلم )
لقيت حلول مقترحه في العلاج البديل :
-حميه غذائيه معينه
-فيتامينات ومكملات غذائيه
-الرياضه الخفيفه واليوغا
-الابر الصينيه والحجامه
-العلاج بالطاقه, العلاج بالاسترخاء ,العلاج بالحرارة .
هذي نبذة بسيطه من حكايتي مع هالمرض .اتمنى من اي وحدة
تعاني من هالاعراض ..او تعرف اي احد يعاني منها انها تتواصل
معاي . لاني للاسف صار عندي خبرة بالدكاترة والتحاليل والادويه وممكن اقدر اساعدها ما تمر بكل ما مريت فيه قبل ما تعرف وش فيها .
اتمنى منكم الدعاء لي بالشفاء ولو من غير كتابه . لانه اولا واخيرا الشفاء من عند الله ..وما انزل الله داء الا انزل له دواء
اسال الله العظيم رب العرش العظيم ان يشفيني ويشفي كل مرضى المسلمين شفاء كامل عاجل غير اجل
امين
simply-gold @simply_gold
محررة
يلزم عليك تسجيل الدخول أولًا لكتابة تعليق.
بـداية جديدة
•
الله يتمم على الجميع الصحة والعافيه
بلبونة
•
أختي عليك بآيات الشفاء يوميا وبقراءة سورة البقرة
فهذه الأمراض التي لا علاج لها قد يكون اغلبها أمراض روحية او مشاكل من نوع خاص (عين مس حسد سحر)
عليك بالإستشفاء بماء زمزم المقروء فيه مع آيات الشفاء يوميا وسورة البقرة والصدقة بنية الشفاء
وسيشفيك الرحمن بإذنه تعالى انا شخصيا اظن اني اعاني من كل ماسبق ومن الممكن أن اضيف على القائمة آلاما أخرى..
لم يأتوا على ذكرها...ولكني متوكلة على الرحمن وألتمس الشفاء بماذكرت.
اسأل الله الشافي المعافي الشفاء العاجل لي ولك ولكل مريض إنه سميع مجيب
فهذه الأمراض التي لا علاج لها قد يكون اغلبها أمراض روحية او مشاكل من نوع خاص (عين مس حسد سحر)
عليك بالإستشفاء بماء زمزم المقروء فيه مع آيات الشفاء يوميا وسورة البقرة والصدقة بنية الشفاء
وسيشفيك الرحمن بإذنه تعالى انا شخصيا اظن اني اعاني من كل ماسبق ومن الممكن أن اضيف على القائمة آلاما أخرى..
لم يأتوا على ذكرها...ولكني متوكلة على الرحمن وألتمس الشفاء بماذكرت.
اسأل الله الشافي المعافي الشفاء العاجل لي ولك ولكل مريض إنه سميع مجيب
اسال الله العظيم رب العرش الكريم ان يشفيك ويشفي مرضى المسلميناسال الله العظيم رب العرش الكريم ان يشفيك ويشفي مرضى المسلمين
مشكورة اختي على الدعوة
الله يجزاكي خير
الله يجزاكي خير
الصفحة الأخيرة