اهلين وسهلين بكل الصرقوعات بالواحه الكركريه
اكيد انتن سمعتن عن مسابقة القصه القصيره اللي اقترحت فيها اخيتنا الغاليه رحوقه
وتم الاعلان عن المسابقه من مشرفتنا الغاليه أم سلطان
وتحمس لهذي الفوكيره المشرفات والعضوات
ومهوب مهم اننا نفوز المهم اننا نتعاون على الخير دووووووم
عاد انا قرقرت قصدي قررت اني اشترك بها المسابقه قمت
وعصبت راسي ولبست حذياني
علشان اتسابق بالمسابقه ولا مهوب تسذا
وابي اسولف عليكن بقصيصه اخذت قنزه من الخيال وقنزه من الحقيقه
ورتبت لكن هالحتوته
عاد ابي اصير لكن حبابه واسبحن عليكن ..... هاه نبدأ
صلوا على محمد (( اللهم صلي وسلم عليه))
اللي جانا وجاكم خير لفانا ولفاكم وشر تعادانا وتعداكم
زور ابن الزرزور اللي ذبح بقه وترس سبعة اقد ور وخلى الشحوم واللحوم على الصواني تدور
معاني الكلمات:
البقه = هي الباعوض وفي بعض الروايات ناموس وتسمى في بعض المحافظات قارص
لانه تقرص الواحد ويجلس يتمقرص من الوجع
ترس= يعني ملئ وعباء
قصتنا مكان الاحداث الغابه السعيده
والابطال هم حيوانات الغابه
وتبدأ القصه بخطبة بنت الفهد
وكان اسمها فهيده على ولد الشيخ قسوره بن أسد 
وما اخفيكم اهل البنت سووا الشبكه والملكه وما عزموا الا المقربين للعايلتين بس
لكن انهم وعدوا ان عامة الحيوانات لهم يوم علشان يشوفون فيها طقم الالماس
اللي قدمه زين الشباب قسورة لعروسه فهيده كشبكه
لكن اصرت فهيده على اهلها ان يكون زواجها زواج ماصار مثله
زواج مميز يخلي كل الغابات اللي حولهم يتكلمون عنه
و حدد الزواج في يوم الخميس الموافق 78/50/2005ق.م يوم الزفاف
وحجزوا قاعة في فندق الانتر كونتيننتال الغابه مكان للحريم
وحجزوا قاعة الهوليدي إن الغابه مكان للرجاجيل
وقامت كل عوايل الحيوانات تستعد ليوم الزفاف
من دوجان بالاسواق وتردد على المشاغل علشان يلحقون يخيطون لبناتهم وامهاتهن فساتين
وقاموا يحسون بالاسواق علشان الاكسسوارات والجزم المناسبه والشناط
لكن اكثر من بلش بعمره فيفي
بنت الفيله فلفولهالبنت فيفي : ياماما ليا حولي الشهرين وانا ادور فستان جاهز علشان الزواج
ولدحين ما سويت حاجه
مابقي الا اسبوعين ايش اعمل ياربي
الام فلفوله : احسن يالدبى ، احد قال لك تصيري مشفوحه ماتخلي فمك يرتاح
شغال على طوووووول بدوام وخارج الدوام ، مافيه يوم عطيتي معدتك إجازه
فيفي : حرام عليك ياماما لا تعيرني!! مافيه الا كام همبرغر حوالي خمسين
على كام بيتزاء بالعدد تقريباً سبعين
على كام كرتون جالكسي على كام ترته على شوية جاتوه و عشرين قارورة ببسي العايلي
وكم علبة آيس كريم يادووووب ياماما
بس الله يخلي ليا بابا اللي مايقصر ولا يعايرني
الام فلفوله : والله انا اللي انكسفت من ابوكي
اللي كل يوم رايح لماكدونالدز وبيتزاهت وكنتاكي علشان يسدد لهم
مع انهم مافيه خير لا للإسلام ولا المسلمين .
انتي لو تبطلي عنك الوجبات السريعه هادي كان صرتي زي خالتك غزاله وبناتها
فيفي: اهئ اهئ اهئ لاتذكريني بخاله غزاله
اليوم بناتها بالجامعه يقولوا : انهم جابوا فساتينهم من باريس
مالت عليا أنا وجسمي
فيفي بعد ماجلست تشاخر وتناخر وبعد موجه من الصياح قالت: ايش العمل ياماما
مافيه الا اني اشترك في نادي صحي واجري كتير في شارع المشاة واشترك في دايت سنتر
علشان الحق انزل كم كيلو
وبعد كذا اروح للمشغل علشان افصل فستان
لانو مافي أمل اني احصل جاهز
الام فلفوله : فين الهمه هادي من زمان ،، كل هذا راح تسوينه في اسبوعين
لكن يالله استعدي وحنا نشوف النتيجه
وتتمم الام بينها وبين نفسها........ ( اقطع يدي لو حصل ونزل لو ربع كيلو بنتي وانا اعرفك )
اليوم الخميس الموافق 78/50/2005 ق.م يوم الزفاف
الزرافه
تتصل على بيت الغزاله تبي تعرف الساعه كم يبون يرحون للزواجترد الشغاله بطه
: ماما غزاله مافيه ، شادن مافيه ، مها مافيه ، ريم مافيه ،كله راح صالون سوي مناكير وبدي كير وتسريحه واستشوار وسوي هواجب وسوي صبغه
يعني كله سوي تشييك علشان زواز
الزرافه : اهب قالت كل اسرار بيت معزبينها
قلعتهم وشوله يعلمون هالمسروعه
كان زينوا امورهم بالكتمان والخصوصيه مهوب يهذرون عند اللي يسوى واللي مايسوى
حتى الشغاله تعرف ويش يبون يسون !!!
تسكر السماعه الزرافه وتجي لبنتها زيزي وكانت جالسه على جهاز الكمبيوتر
وما جابت خـــــــــــــبر الزواج
ماغير تطقطق بالنت والمنتديات
الام زرافه : زيزي انتي هنا
زيزي : لا هناك خخخخخ ايه يمه ويش تبين آمري
الام الزرافه : تنكتنين انتي ووجهتس
ماتجهزتي ولا بعد تروشتي
اشوف شوشتس طايره
وراء ماتقوم تعركين شعرتس بشوي زيت اغديه يهبط وهمن تغسلينه وكثري البلسم اغديه يهبط
زيزي : وشوله ؟ وش عندنا؟
الام زرافه : الله يخلف تسأل بعد !!! الحين ناس مدهرين ورايحين للمشغل اوه قصدي الصالون على قولت
بطتهم وناس مرتزين عند الكنبيوطر اقول قومي قامت عصبتس فزي استعدي
زيزي : طيب على هونتس وش عندنا؟؟ نبي نروح لخالاتي فيه جمعه؟؟
الام زرافه : وانتي ماتروشين وتهبطين شوشتس الا لخالاتس ؟؟
لا نبي نروح للعرس ،،عرس الفهد على الاسد
زيزي : لاتكفين يمه ماودي اروح للعروس تعرفين اني ما احب العروس والصجه واللجه .
الام زرافه : يابغضي لتس يالوره ما ادري من انتي طالعه عليه
انا والله اجتماعيه واحب الخبه والروحات والجيات والمناسبات
من انتي طالعتن عليه الله واعلم ؟؟
ايه طالعه على ابوتس هو اللي مايحب لا الروحات ولا الجيات بيتوتي حطني لقيتني
طيب الزبده من يروح معي ؟
زيزي : خلي خاله ام هلال القرده تروح معتس والله ياهي تبي تطير من الفرحه
الام زرافه : أي والله شورك وهدايه الله
هي اللي ماتقول لا،،مهوب مثل بعض الناس
تتفق زرافه مع أم هلال انهن يروحن للعرس ومن فرحة أم هلال بالخبر اغمى عليها
وفي بيت الارانب يقول ارنوب لام عياله ارنوبه
ارنوب
: متى تخلصين علشان اوديك في طريقي للزواج؟ارنوبه : والله اني ما ادري ويش اسوي بالعيال؟
ارنوب : وراه وش بهم ؟
ارنوبه: مكتوب بالبطاقه ممنوع اصطحاب البزران
ارنوب: طيب وراء ما تحطينهم عند امك ؟
ارنوبه: اخاف يغثونها مع عيال اخوي يجلسون يتهاوشون مع بعض
ارنوب: ماحنا متأخرين ان شاء الله
ارنوبه: طيب اقوم اتجهز واجهز العيال
* ( داخل قاعة الهوليدي إن الغابه الخاصه بالرجاجيل ) *
النمر
: ويش اخبار الاسهم يالحمار؟الحمار: ابد على خبرك على قولت الشاعر حبه فوق وحبه تحت
يوم راقي وطالع وشهر منخفص
وأنا ماغير مقابل شاشات الاصهم بالبنك ، اجلص بالبنك اكثر من بيتي
الكلب
: ياجماعه متى العشاء ابي الحق على مبارة بين فريق الفوز والبدر ما ابي أتأخر ابي الحق عليها واشوف التحليل الرياضي
الديك أبو صياح : يقولون هم يقولون وأنا سمعت انهم يقولون
الحمار
: ويش يقولون تقلقلت حنوكك الديك أبو صياح : وش بك يالحمار هبيتي بي ؟
الحمار : لك صاعه وانتي تعيد كلامك اهرج بصرعه
الديك أبو صياح : طيب ابي اهرج بسرعه يقولون هم اللي يقولون ان بالقاعه يابو كليب
بس الكلام مهوب موجهه لك يالحمار بلا لقافه ضف وجهك تكفى
ارجع لمحور حديثنا
يقولون يالكلب انا فيه تلفزيون خلنا نروح نلحق نشوف الاخبار
في قناة شبه الجزيره ما ابي تفوتني اخبار هوش ولا اخبار طاعون
اللي ماخلوا العالم يرتاح من شرهم
وعقب الاخبار شف انت ياكلب الاخبار
الكلب: اذا انت تبي تشوف الاخبار عز الله ما لحقت على شي !!
الديك أبو صياح
: ولا التحليل الرياضي !!!الكلب : قم يالله، نلحق على اللي نلحق عليه
الحمار : ياثقل دم هالديك ماغير كل كلامه بالصياصه فقع روصنا فيها
اشوى انه راح وانقلع عنا
ويش صار عليك ياذيب بالانتخابات حقت البلديه ؟
الذيب
: والله ماغير خساير الله لا يخيب التعب ولا الخساير وانا خاب فانا مالي الا اقعد عند بيبان المساجد عشر طعش سنه يالله اعوض الخساير
الله يسلمك صرت اغدي واعشي الجماعه المنتخبين اخاف ما املى بطونهم يهونون
صلحت اعلانات بالجرايد
صوتك = سكن مريح + مدارس راقيه مافيها فرق عن الاهليات + حدايق يقدرون عيالكم يلعبون فيها سكوتر
+ مستوصفات فيها ممرضات حلوات ودك تصخن علشان ماتطلع من المستوصف
+ محلات ابو يالين على كيف كيفك
وتصدقون ياجماعة الخير ان لي استراحه كنت أأجرها بملغ زين
وتدر على قروش خليتها مقر للانتخابات
ما اقول الا ياحمس قلبي حمساه ان ما فزت
الثعلب
: من بغى الدح ماقال اححححح ، الا ماتبي سياره كشخه تشخص فيها وصل عندي بالمعرض موديلات جديده من BMW وفياقرا
ما تعطى ولاتنباع الا للغالين بس
الجمل: الاماعندك VXR جيب لاند كروزر ابي دبل ما يفشل
خبرك انا راعي بر وكشتات وابي الدبل مضمون
ما ودي اتفشل عند المدام،، الله من مرة ومره غرزت وقمت تدفدف وتبرح للسياره اذا غرزنا
الثعلب: الا عندي وأنا أبو هندي
بس أنا بعد ابيك تخدمني يابو جمال ، ودي تدور لي ارض كبيره من هالمساهمات اللي انتم مصلحينها أبي اصلح
مشروع سياحي
القطو
تجيه رساله بالبلوتوث يفتحها ويقوم يسعبل الله لايبلانا
الجمل
: وش عندك يالقطو من يوم شفت الرساله وانتي مبسوط ومستانس القطو : بلاك ماشفت اللي شفته ، قرب شف وانت تعذرني
الجمل : اهوه اشوف ، من هن هالبساس ؟
القطو: هذي البسه مفتكره عسرم، وهذي القطوه أنيسه، وهذي القطيوه فيفا نجدي،
بالله عليك وش رايك بهن يا أبو جمال؟؟ صح يهبلن
الارنب ارنوب:الا انت اللي انهبلت
استح على وجهك وخف من رب فوقك
وتذكر قوله تعالي:
((إن الذين فتنوا المؤمنين والمؤمنات ثم لم يتوبوا فلهم عذاب جهنم ولهم عذاب الحريق))
القطو: ياخي ويش فيها حنا ماغير نطالع ونتفرج
الارنب : ماعندك حرمه ماعندك خوات تخاف عليهن وتغار عليهن
القطو: ياخي ويش نسوي بلانا من حريمنا ،، لا اجسام ولا اهتمام
الوحده من تجيب الدفعه الاولى من العيال تنتفخ وتغدي مثل البرميل
وتنسى عمره ، وماتقوم تهتم بالرجال مثل اول
ماغير تهتم بالعيال وش اكلوا وش لبسوا وتخلي الرجل على الرف منسوف
الجمل: والله أنا اقول لو انك تجي للمره بالاسلوب وتبطل عنك مطارد
وراء بنات بليس وتتركهن
وتدلع أم عيالك وتحسسها بقيمتها وتغنجها
وتسوي انت كل واجباتك اتجاه البيت والعيال والمره
تبي تشوف النتيجه ويش راح تكون ,
وبزاويه من زوايا القاعه جلس الحصان والثور ماغير طايرتن بوهتهم
بالجوال ماغير يقلبون بهالرسايل
والقرد بهلول
ماغير يناقز من مجموعه لمجموعه يقول لهم نكت وهو أول من يضحكيتبع
*( داخل قاعه الانتركونتيننتال الغابه الخاصه بالحريم)*
وصلوا الحريم مع بناتهن
البنات مثل العاده ارتزن بالمنصه ورزن اعمارهن
ماغير تصفيق وتصفير وتصريخ وملاغه
مع هاللي ماتسماش النهاقه اوه عفوا اثر اسمها المخربه اوه قصدي المطربه
وهي من قبل يسمونها طقاقه بس
انها تمدنت مع تقدم الزمن ايه تراهم بـ 2005ق.م
ماخلت هالطقاقه ولا الات موسيقى ماجابتها معها هذا غير الاغاني الماجنه
الله يمصع لسانها مصع
كانوا بنات غزاله وبنات الدجاجه اللي مع الخيل ياشقراء لابسين لبس مافيش
يعني متفصخات الا شوي
بمعنى ثاني فساتينهم عريانه الله لا يبلانا
ومهوب بس البنات اللي نقول سفهاء ومابعد ركدن اللي مسويات هالسوات
لا و بعض الامهات اللي عليهن الشرهه وهن القدوه لبناتهن مسويات النون ومايعلمون
تلاقون لهن اسبوع وهن يدوكن بالليفه المغربيه والحمام المغربي يبن يلقن
ويجدعن الوصخ اللي له شهور متراكم على جلودهن
كل هذا علشان يتجلعن
لغير الناطقن باللغه الاستقراطيه يعني يتفصخن ويتعرن
كانت شادن مغطيه اللي فوق بس من تحت كاش بالحيل
وريم كل ظهره وصدره وذرعانه ( بالطراوه) يعني ماكلف عليها القماش الا متر الا ربع بس
ومها اللي يقولون انها متستره عليها فستان استرتش كل التضاريس واضحه
عاصرتن نفسه يابعد تسبدي عصر ومعها قطيعة شال
تطيح من كتوفها اكثر مما تجلس في مكانها الطبيعي
اما بنات الدجاجه صوصي وديدي ولوسي واللي كانوا لابسين قماش شيفون
بس والله لو يسمون القماش شوفون وبحلقوا بي كان اصرف لهم
وكانن بعد عريااااااااانات
جلست الزرافه مع القرده ام هلال على طوله
أم هلا ل القرده: متى الحلى والقهوه؟
الزرافه : يامال المــــــــــر اثقلي
أم هلال القرده: طيب متى يجيبون العصير نبل حلوقنا ؟
الزراقه: عقب شوي لا تفشليننا كنك ما ذقتي العيشه
أم هلال القرده: زين العشاء الساعه كم ، ميته من الجووووووع
الزرافه: يامال الطحل ،، أنا الشرهه عليّ اللي اجيب اشهباء معي
وكان كل ما داروا العاملات الوز والبط بصواني الحلى والموالح والفطاير
تقوم ام هلال وتضف نصف اللي بالصينيه وتأكل بعضه وبعضه تدخله بالشنطه اللي كنها خيشه
الفيله فلفوله لبنتها فيفي: قومي يافيفي مع البنات اترقصي ورزي عمرك
ماتشوفي بنات الغزاله والدجاجه ويش مسوين !!!!
فيفي : لا ياماما أنا ما اتحرك لحد ماتجي خاله غويلاء الخطابه هي اللي تقدر الجمال الرباني
فلفوله: صحيح ، هي فين خاله غويلاء لحد هالوقت وما جت؟
فيفي : لما تشوفي كل البنات اللي بالمصه راحوا ركض عند المدخل
تعرفين ان خاله غويلاء حضرت
فلفوله : تلاقينها زي العاده بالمشغل تصلح في نفسها
ماشاء الله حرمه كبيره وما زالت تتصلح وتهتم بنفسها
تدخل الطاووسه نوسه اللي ماصار لها الا شهرين متزوجه يعني عرووووس
وكانت تمشي بكل دلع وتغنج ويا ارض انهدي ماعليك قدي
تناضروا البنات اللي بالمنصه وقاموا يبحلقون فيها
المشيه مشيت نوسه ،، بس شكلها متغير بالحيل
البراطم منتفخه ، والخدود طاقه من الوررررررم ، وحواجبها ماغير خطيط صغينووووون
بس والله من اول كانت حلووووووه
بس صارت المضروبه على عينها مصلحه عملية تجميل
وصلت البقره نفيسه ومعها بناتها هنادي وبنادي
ولمّا شافت هنادي البنت الكبيره للبقره نفيسه مناظر البنات وتعريهم وسمعت الموسيقى
الصاخبه قالت : اللهم ياكافي يمه أنا ما اجلس في مكان كله معاصي
ابي اتصل في ابوي الثور يجي يأخذني من هنا
قالت اختها بنادي: وما تشوفين الزفه وما تتعشين من البوفيه، والله يا انتي ياهنادي معقده .
قالت البقره نفيسه : الله يعافيك يابنادي وفرتي عليّ الكلام اللي كنت ابي اقوله
وازيدك من الشعر دواوين
ماراح تعرس وتلاقي رجل اجودي
الزواجات فرصه للبنات انهن ينشافن ويستعرضن جمالهن ويترزقن الله
هنادي: الله يغنيني من هالعرس اللي بها الطريقه
قالت البقره نفيسه : هنادي
هنادي : سمي يمه
قالت البقره نفيسه : قولي لابوك لا يجي يأخذنا مبكر
عقب ما يصلي الفجر يتصل ان كاننا مخلصين ولا نجي مع سواق فلفوله
اتصلت هنادي على ابوها وجلست تنتظره بصالة الاتنظار
حتى ارنوبه يوم دخلت للزواج وسلمت وباركت لاهل الزواج ،
تضايقت كثير من المناظر اللي كانت تشوفها هذا غير الموسيقى قامت
واتصلت على ارنوب وقالت تعال خذني ورجعني للبيت
وراحت لصالة الانتظار تنظرأبو ارينب
واستغربت وجود البقره هنادي جالسه هناك
وقالت لها: غريب جلستك هنا ليش ماتدخلين للزواج مع باقي البنات
ردت هنادي: اعوذ بالله ، انا اخاف من سخط الرحمن اني اجلس معهم ويعمني الله بعذابه.....
ارنوبه: والله انك بقره اجوديه،، انتي متزوجه ولا مخطوبه ؟
هنادي: لاهذي ولا هذيك
ارنوبه: اجل الله يعافيك عطيني رقم جوالك ابي اتصل على الوالده
علشان تنسق معها جارتنا أم الدكتور ثوير
خابرتها تدور لولدها بنت الحلال
وتراه شاب ملتزم وناجح في حياته العمليه وماهم لاقين احسن ولا ابرك منك
هنادي : لا وخزياه ،،، وش رقم جوالي خوذي اذا كنتي ملزمه رقم أمي نفيسه وكلمي عليه
وصل أبوها الثور وطلعت بعد مادق عليها جوال وكتبتت لارنوبه رقم بيتهم
ورقم جوال امها نفيسه
و ارنوبه تطلع من قاعه الزواج تدخل الخاله غوريلاء وتوافقوا عند الباب وسلمت عليها وطلعت
وكانت الخاله غوريلا مصلحه ذيك التسريحه اللي ماتقولون الا لبنت أم اربع طعش سنه
وشوي الا كل البنات متجمعات عليها تقل قعر على تمره
يامال القطع لهن ياحبهن للفهاره مايستحن
وخاصه بنات الغزاله شادن ومها وريم
وبنات الدجاجه صوصي وديدي ولوسي
ولا بنت الفيله فيفي فهي لزقت لزقة جبسون بخاله غوريلاء وعساها تحصل له عريس الغفله
صارت الساعه 2 ونصف طفوا الانوار وشبوا الشموع
وعلت اصوات زغاريد البط والوزززز
عاملات القاعه اللي الظاهر انهم مشربينهم جالون زيت زيتون علشان يسلكون حلوقهم
وكانن البط والوز مايستحن بعد،،
وصل لهن داء الفهاره لابسات كلهن طقم تنانير فوق الركبه وبلايز كت
صارن حتى الشغالات مايستحن بها الغابه
دق جوال البقره نفيسه وصار زوجها الثور
الثور: هلا ام هنادي
البقره: هلا بك بس تراني ما اسمع زين ارفع صوتك
الثور : ريضين
البقره : وشووووو ؟؟ ايه ريضين
توها الزفه وعقبها العشاء رح نم بس وكبر الوساده
ومثل ما قلت لك : دق علينا عقب ماتصلي الفجر ان كنا خالصين ولا نجي مع سواق فلفوله يالله مع السلامه
وتنزف فهيده بنثر الزهور وحولها الرقصات والهشك بشك الله يدفع البلاء
وتجلس في كرسي اللي حوله الكوشه وبعد كذا يبدون الرقص عنده والتصوير ومباركة من حولها
وشوي ويفتح باب من جهه ثانيه ويدخل المعرس وابوه واخوانه
وابو العروس واخوانها وعمومتها وخوالها
يعني رجال × رجال وسلموا عليها وباركوا لها وكان المفروض يضفون وجيههم
بس ما صار كذا
جلسوا يتميلحون ويرقصون والكل يعرف ان الرقص للحريم
وشلون وصل هالداء للرجال الله واعلم
بعد ساعه من فهارتهم وملاغتهم كنهم استحوا وضفوا وجيههم وراحوا
جلس المعرس قسوره كنه رادار ماغير يقلب عيونه من يمين شوي ومن يسار شوي
ومعطي العروس فهيده الخامس
فهيده : قسوره قصورتي وش شعورك ؟
قسوره: ايه اليوم محلق شعري عند الحلاق
فهيده : اقول الله يعظم اجرك وش شعورك انت مبسوط مثلي؟
قسوره : ايه ايه يعني يمكن!!!
فهيده : انت معي ، وش بك قمت تقط خيط وخيط
اللي آخذ عقلك في أي شي تفكر خلك معي
قسوره: أقول انتي ممدي عليك ،، خليني اركز واتفرج ترى الفرجه ببلاش
وتغار فهيده على المعرس اللي ماعطها فيس
وتشر لا مها وخواتها انهم تبي تمشي
ماش خافت على عريس 2005 ماقبل الميلاد
والمعرس متقضب بالكرسي ماوده يتلحلح من مكانه لو الود وده كان يتسمر بمكانه
احيوا الحيوانات ذيك الليله في انواع كثيره من المعاصي
من اهمها التبذ ير بالاكل والله تعالى يقول( كلوا واشربوا ولا تسرفوا)
والموسيقى واللباس الغير شرعي
وتأخير النساء خارج بيوتهن الى طلوع الشمس وبالتالي تأخير صلاة الفجر والعياذ بالله
واحب اخبركم قبل لا انهي حكايتي ان ولا وحده من بنات الحيوانات انخطبت بعد هاك الليله
ماعداء بنت الزرافه زيزي والبقره هنادي
بارك الله لهما وبارك عليهما وجمع بينهما على خير
وفهيده عقب 3شهور تطلقت ورجعت لاهلها تجر اذيال الفيشيله
والسبب ان قسوره حط عينه على بطه من عاملات القاعه ويبي يتزوجها
وعذر اهل فهيده بالطلاق ان الطبايع ماتوافقت
وتوته توته وخلصنا الحتوته
سؤال القصه
صح كل قصه يكون فيها اسئله !!!
وانا سؤالي
او ابي اخليه سؤال واحد
س1/ كل ما اكتب انا أم تأبط موضوع بالواحه الكركريه بالعاده استعمل
ههههههههههه او خخخخخخخخخخخخخ
ليش هالمره ما استعملتهن ؟
واللي تجاوب صح لها مني هديه حلووووووه
اتمني ان تكون القصه وفت بالغرض اللي قدمت القصه له
وهو التعاون والمحبه والفايده للجميع
ودمتم لمن يحبكم وأنا أم دحومي منهم