خايفة أختي تنجن هذا إذا ما انجنت

السلام عليكم ورحمة الله وبركاته
عساكم بخير عزيزاتي
عضوة جديدة ولكن متابعة المنتدى من مراهقتي
سجلت بعد ماتعبت نفسيا من موضوع اختي يارب تفرجها على عبادك الفقراء
البارحة تجمع العايلة، أختي كانت غريبة جدا، ماعارفة أرتب كلامي بس إن شآء آلله تفهموني
أختي هذي مدرسة مطلقة، زواجها دام سنة ونص وتطلقت لأنه الزوج يشرب وتارك للصلاة، طبعا بتشجيع من أختي الكبيرة وأمي انها تتطلق
بصراحه ف قرارة نفسي ماكنت اتمنى تتطلق لأنها بتم وحيدة مع أمي، وأمي نوعا ما جافة عاطفيا وقاسية بالكلام وأختي هذي حساسه وايد
مر على طلاقها سنة وشهر، كان فيه بعض الخطاب ايونها بس هيه ترفض، رغم رغبتها الشديدة فالزواج والاستقرار بس ترفض لأسباب تافهة وهالشي بالنسبة لي غريب جدا
جلست مع أمي فالبيت ومعاهم اخوي وزوجته فالبيت يعيشون، أخوي هذا ماينزل إلا بالويكند بحكم عمله، يعني مايعرف عن أخته ولا أمه
طبعا بقية اخواني ونحن الاخوات مستقلين ببيوتنا و في مناطق متقاربه نوعا ما
من 3 شهور أخوي اللي يعيش معاهم بالبيت عند مديرتها فالشغل وهزأها وفشلها عند المديرة لأنها تغيب وايد أو تستأذن من الشغل، طبعا كلنا توقعنا إنه زوجته زنن براسه لأنها طانت معاه فالسياره لما رايحين ومحد منا نحن يعرف انه كذا براسه
طبعا واضح انه المديرة فهمت انه أخوها بشك فيها ليش ما تداوم وليش تستاذن
اخوي أصلا ماموجود كيف عرف لنها تغيب كثير غير من حرمته الله المستعان بس
اختي صحيح كثيرة غياب واستئذان بس ترجع البيت أمي تعرف بدوامها وماعندها مانع
تخيلوا يقولها انتي قليله ادب وكلام كثير غيره
اختي ياعالم مالها بقلة الأدب ولا بالشباب
صحيح عنيده ووحيدة وحساسه بس طفولتنا البائسة شكلت شخصيتها كذا
من روحة أخوي لمديرتها صارت مشاكل مالها نهاية بين اختي والمديرة والمشرفه(هندية)
كل مره يذلونها ذل انتي ماتنفعي للتدريس انتي تغيبي وايد انتي انتي وكله بأسلوب اهانه
أبد ماتقربوا منها وفهموها أو مسكوا بايدها عشان يطورون شغلها
أختي الاسبوع الماضي ف تجمعنا قالت خلاص بستقيل كرهت الدوام وكرهت المديرة والمشرفة يهزؤوني كني طفله وأنا ماعرف ادافع عن نفسي
قلنالها براحتج ارتاحي هالفتره ولكن لاتستقيلي لأنه هذا مصدر رزقج واستقلالج
أختي تسوق مسافة ساعتين رايحه الدوام راجعه ساعتين ويمكن هذا ضغطها زياده
المشكله إنها البارحه داومت ورجعت من الدوام بحالة يرثى لها
الشغاله تقول نزلت من السياره تضحك بهستيرية
لما نكلمها تسكت
امي شلتها البحر عشان تسبح وتهدا قالت انها مره تضحك ومره تبكي
كل شوية كلامها مختلف عن اللي صارلها بالمدرسة
مره تقول المشرفة تحبني وطيبه ومره تقول يهزؤوني واني صعوبات مافهم شي
ومره تصيح بهستريا ومره تضحك
ونحن مره خايفين عليها
أحد خواتي شلتها لصالون يسوولها مساج بالزيوت عشان تهدى اعصابها
تخيلوا اختي قالت انها ضحكت بهستيريا مره ومره صرخت تبكي والكل التم عليهم شوفيها البنت
امي ياتني الصبح قالت انها ساءت حالتها اكثر ومانامت وطول الليل تهذي وتصرخ، وامي ترقيها وتقرى القرآن بس ماتاثرت ابدا
رحنا اليوم الصبح عندها قامت تكلمني انجلش وتسميني بغير اسمي وماعرفت اني اختها
على فكرة هي معلمة انجلش
امي قالت انها طول الليل تهذي بالدوام والمدرسه وتييب كلام غريب
الأيام هذي اجازه ومافي مستشفى وتخطيط عشان نعرف اذا مخها سليم او لا
وفيه مطوع راح له أخوي الثاني وقاله ييبوها عندي العصر اقري عليها
ماعرفنا هل هو انهيار عصبي هل هو مؤقت وله دائم هل هو ضر
تفسيري الشخصي انها تعرضت لصدمة عصبيه من تراكمات كثيرة سابقة وماعندها حاسية بالأشياء اللي حواليها
ياخواتي الكلام كثير واسفه طولت عليكم بس إذا حد مرت عليها مثل هالحاله كيف تعالجت، محتاجه نصائحكم
أرجو منكم الدعاء ف يوم الجمعه انه الله يفرج عنها كربها
ملاحظه..أمي ذكرت انه هااحاله صارت لأبوي الله يرحمه لما كانت حامل بأكبر إخواني وابوي وحرمته الاولى ساروا الحج، ابوي رجع بدون حاسية وهم يسمونها فرة الراس وماتشافى إلا بعد ماانوسم وسمتين فالراس وانعزل بغرفة لاربعة ايام
هالكلام قبل 42 سنة
أمي مصرة انها نفس الحاله
هل عندكم اي فكرة عن هذي الحالة او سمعتوا إنه لها علاج شعبي
المشكله ماعدنا وسيمة خبرة، كلهم توفوا رحمة الله عليهم
ارجوكم لاتنسوها من دعائكم أن يشفيها الله ويسعدها سعادة تعوضها عن ماضيها