خبرتي بالرجيمات .....واللي حابه تبدأ تدخل

السلام عليكم
اول شي حابه اكتب موضوع كامل عن كل المعلومات اللي اعرفها ممكن تكون مكرره عالبعض وممكن تكون جديده
طبعا انا اسوي رجيمات من انا بسادس ابتدائي والان عمري 26 سنه زي ماتقوله نظام حياه وطول حياتي جربت انواع الرجيمات ماتتخيلوها
اللي حابه تتبع رجيم النقاط هذا افضل رجيم بس انا همم مدري ليه ماناسبني لانه لازم شي محدد امشي عليه ولمن يكون الشي مفتوح اخبص فاللي حابه تبدأ معايا اوك
اول شي المعلومات العامه
1)لازم تمشو من نص ساعه لساعه عالسير او بممشى لو تحبي جهاز الاوربتراك ولو ماعندك جهاز ولا تقدري تطلعي افتحي اليوتوب وسوي اي نوع رياضه يكون صعوبته متوسطه عشان تقدري تلتزمي فيه
2) كيف تسدي جوعك اللبان للي زي حالتي تحس انه الاكل يخليها سعيده وملي فراغها العاطفي وكل ماطفشت راحت اكلت ولو ما اكلت تكتئب اللبان يخلي فمك شغال 24 ساعه وماتدوري شي تاكليه ...بس فيه حاجه معروفه اللبان يخلي الهضم اسرع وممكن يخليك تجوعي فاللبان استخدميه اخر اليوم
3) طريقه ثانيه تسدي جوعك بشراب اسويه يخسس وانتي واقفه تسويه ماياخذ وقت
تجيبي كوب وحطي زنجبيل مطحون ملعقه صغييره ولو فريش افضل بس ممكن تكسلي تبشريه (انا ابشر كمييه واحطها بكيس وعالفريزه يسهل عليك ) وبعدين لبتون الشاهي الاخضر بنفس الكوب وشويه قرفه ونص ليمونه كبيره او ليمونه صغيره وحليه بملعقه عسل والمويه الحاره وانتي واقفه مايطفش
واللي تشرب قشر كمان ممتاز
4) كولو 5-6 وجبات بدل 3 وطولي المدغ عشان اللي حولك مايحسو انك قمتي من السفره بسرعه وغير انتي تعطي للمعده فرصه ترسل اشاره للمخ انك شبعتي
5) الاسناك الفشار مرره كويس ..يجبلك هرمون السعاده وسعراته الحراريه قليله ومفيد بس سووه بدون زيت او بزيت زيتون (مايبين طعم زيت الزيتون)
وبرضو الشابوره حقت الرجيم وبسكوت الرجيم دايجستف كويس للدايت لو مرره طفشانين من الخضار والفواكه ^_^
6)نفسك بشوكولاته جيبي الدارك السوداء كلي جزء بسيط (بس انا لاحظت لمن تجيبيها ماتقدري تقاومي ماتاكلي كم قطعه ) فبدلته بشي ثاني ....تعرفو الكاكاو الخام البودره جيبي كوب وحطي شويه كاكاو وشويه حليب انا احط سكر دايت بس الافضل مثلا عسل وبدل الحليب كوفي ميت 0% دهون واشربي شراب الكاكاو اولا دافي ولذيذ ثانيا مايجيك رغبه انك تشربي كم كوب زي قطع الشوكولاته وكمان الشوكولاته الخام والسودا تجيب هرمون السعاده وتساعد عالنحف (اقرأو عنها لو حابين)
7) لو ثبت وزنك لازم تعملي يوم مفتوح انا ما احب اعمل يوم مفتوح نهايه كل اسبوع بعد شهر ابدأ اترك نفسي اسبوع واعيد الرجيم ....لانه نهايه كل اسبوع اعرف نفسي اخبص بهذا اليوم بشكل هستيري
خلصت تقريبا اهم النقاط
رجيمي ينفع للمرضع والغير مرضع
ينزل بالاسبوع كيلوين ل3 ....تقريبا كل 3 ايام اشوف وزني نزل كيلو
نزلت عن طريق هذا الرجيم 28 كيلو ماشاء الله خلال سنه ونص وكنت ارضع وقتها ادري طويل بس لاني اترك نفسي فتررره حق كم شهر وارجع والحمد لله مايزيد وزني لو اكلت بشكل طبيعي
الفطور :
نص رغيف عيش اسمر +جبنه بيضاء قليله الدسم او بيضتين او لبن زبادي
مع خضار مع اي نوع من الفطور (خس...جرجير ..جزر...خيار ...طماطم ) لا تكثرو من الطماطم لانه فيها كميه ملح ....والملح يسبب احتباس الماء بالجسم
سناك 1
كوب حليب ....او تمر 7 حبات يفضل غير حالي او موزه او تفاحه ...
الغداء
12 ملعقه طعام رز او مغرفتين مكرونه (مو تعبو الملاعق بقلب ههههه خليها طبيعي )
مع قطعه دجاج (يا صدر يا فخد) او قطعه لحمه او شويه مفروم براحتك او سمك ( او تونه )
طبق سلطه
سناك 2
نفس سناك 1 ولكن لو حبيتي تبدلي بنوع ثاني فاكهه ماعدها المانجا او حبيتي مثلا الفشار او الشابوره او مثلا بسكوت الدايجستف براحتك لكن للمرضعه الافضل تتبع الاسناك 1 عشان الحليب وتكثر خس وتشرب شمر كثير وتمر
العشى
نفس الفطور ويفضل لبن زبادي فقط
مسموح ملعقه صغيره وحده سكر عادي اما الدايت براحتك والافضل عسل
الزيت ملعقه وحده تكفي بس انا كنت ما التزم يعني سويت رز بخاري اكلت 12 ملعقه سويت مندي سويت كبسه كله بالاخير 12 ملعقه فليش التحكم بالزيت ويصير الرز ناشف والعائله ماتاكل كويس ومحيجبها الاكل
مسموح الشاهي والقهوه بدون سكر وطبعا مايحتاج اقول انه المويه مهمه جددا
بصراحه اوقات ما القى رغيف اسمر كنت استبدله بالابيض ويمشي الوضع او واحد توست وطبعا التوست مايشبع زي الرغيف والابيض مايشبع زي الاسمر
وكنت احيانا اكل جبنه العادي كامل الدسم مش القليل وبرضو مشي الوضع لكن لو تحبي تخسي اسرع تاكلي قليل الدسم طبعا
احيانا يكون الاكل لا مكرونه ولا رز يكون مثلا ملوخيه او ادام تتورطي انا صراحه كنت احط مغرفتين بس والرز اخليه بدل 12 ......ل 6 ملاعق وبس
اي وحده حابه تعمل معايا انا بديت من اليوم ممكن تبدأ معايا اي وقت
انا سمنانه 13 كيلو بسبب اني حملت وسقطت ورا بعض فعشان كذا بانزلهم باذن الله واوصل لهدفي


هذا اللي عندي اي سؤال انا حاضره