السيدة ماما

السيدة ماما @alsyd_mama

محررة برونزية

خبز الخمير الاماراتي (خطوات مصوره)

المعجنات والمخبوزات والسندويتشات



السلام عليكم خواتي

اليوم يايبتلكم طريقة خبز الخمير .. بصراحة هاي اول مره اسويها .. و الله اطالع الصوره و مش مصدقة اني انا الي مسوتنه ، حتى طعمه لذيذ .. من زماااااااااااااااااااان و انا احن ابغي اسويه بس ما اتشجع ، كل على بالي صعب او يباله شغل و ما يسوونه الا الخبراء .. خذت كذا طريقة من عند كذا حد .. بس مااااااااااااااا سويتهم .. بس البارحه قلت لااااااااااااااااااازم لازم اسويه .. مشتهتنه موت و ما عندي حد يسويلي اياه .. و الجو بارد -و يا محلاة الخمير في البرد- .. بس دورت الطرق الي عندي ما لقيتهم ، و ضربت في راسي لازم اسويه .. الحمدلله لقيت طريقة في الانترنت
امي فديتها مطرشتلي المخبز التقليدي و مطرشتلي المخبز الكهرباء .. و بما اني انسانه مال اول ، استعملت المخبز التقليدي -اصلا مخبز الكهرباء ما يشتغل على كهربة امريكا-
و لازم تكون عندكم علبة معدينه خاليه -مالت البسكوت او الماكنتوش- نحط عليها المخبز
اول شي لازم تعجنين العجينه قبل ما تسوين الخبز بفتره .. يعني اذا ناويه اتسوينه الصبح ، اعجني بالليل .. و اذا ناويه اتسوينها حق العشاء اعجنيها الصبح بدري
على فكرة ما عليكم من الكلام الي انا كاتبته وايد و بتقولون الطريقة صعبه و معقده .. بس تراني احاول اشرحلكم عدل عشان اسهللكم الطريقه


سموا بسم الله

مقادير العجين
كوب و نص طحين رقم 1
كوب و نص طحين رقم 2
1 م ك خميره
نص كوب ماي دافي للخميره
كوب مريس (كوب تمر منقوع في كوب ماي مغلي)
نص م ص مثيبه حب
بيضتين


طريقة العجين
- ذوبي الخميره في نص كوب الماي مع اضافة شوية سكر و طحينض
- انخلي الطحين و ضيفي الخميرة و المريس -المشخول- و البيضتين و المثيبه واعجني يلين ما تصير متماسكة -مع اضافة الماي اذا احتاج-
- و غطيها بكيس بلاستك و بطانيه و خليها تتخمر على راحتها


وقت الخبز
الافضل انج تكونين مجهزه كل شي قبل ما تبدين الشغل ، و الاغراض هي:
بيضتين مخفوقات و فرشاة -انا ضفت زعفران للبيض- ، ماي لبل اليد ، دهن -طبعا بلدي اصيل اذا متوفر ، او زبده اذا ما عندج- ، سمسم ، حرّاره
العلبة المعدنيه حطيها على عين الفرن و فوقها المخبز خليهم يسخنون
و كوري العجين في صينيه مرشوشه بطحين و غطيه بفوطه مبلله -مقدار العجين ها سوا 16 خبزه تقريبا قطر كل وحده 15 سم-


يالا نشتغل
بللي يدج عدل ، و افردي كورة العجين زين -انا فرديتها و حركة يدي دائرية، طلعت مدوره بشكل مرتب- ادهني بالبيض و رشي بالسمسم(ملاحظة .. في ناس ما تحب السمسم ، الي ما يحبه لا يضيفه .. و بعد حلو اذا رشيتيه بالزعتر -زعتر المناقيش- لذييييييييييييذ)

اقلبي المخبز وجهه لداخل العلبة المعدنيه عشان يحمر الوجه ، لو خليتيها تحمر من تحت اول قبل الوجه راح اطيح الخبزه في العلبه و تحترق -عشان جي ابدي بالوجه-


اعدلي المخبز بعد ما يحمر الوجه و خليها تحمر من تحت شوي

و كل ما تخلصين خبزه حطيها في الحرّاره و ادهنيها بالدهن او الزبده

التقديم
قدمي الخبز حار مع الدبس -للأسف ما كان عندي دبس- او العسل او السكر و جبن كرافت

و بالعافيه على قلوبكم
52
6K

يلزم عليك تسجيل الدخول أولًا لكتابة تعليق.

تسجيل دخول

روزااا
روزااا
روعة روعة الله يعطيكي الف عافية
شكلو مرة يشهي لكن في خطوة ما فهمتها يعني لما اقلب المخبز يكون الخبز لاصق فيه ؟
والعلبة فتحتها من الجهة التانية والا لاء ؟
( سكر زيادة )
( سكر زيادة )
ماشاء الله عليج ...........
انزين العيينة ماطيح في العلبة ؟؟؟؟؟
ويوم تعينينه كيف يكون شكله ؟؟؟ يلصق في الايد ؟؟؟

ومشكورة .
ام سويلم
ام سويلم
السلام عليكم ورحمة الله وبركاته
جعله الله في ميزان حسناتكم
السيدة ماما
السيدة ماما
يا هلا فيج يا روزااا
العلبه تكون بالوضعيه العاديه لما تحطينها على عين الفرن .. يعني القاعده تحت ، و الفتحه فوق .. طبعا الغطاء ما تستخدمينها .. يعني تحطين العلبه مفتوحه على الفرن
المخبز لما تقلبينه تكون الخبزه لاصقه فيه .. بس ابدي بتحمير الوجه يعني اقلبي المخبز اول ما تحطين الخبزه عليه و تدهنينها بالبيض
ان شاء الله فهمتي
السيدة ماما
السيدة ماما
سكر زيادة
لا العجينه ما بطيح في العلبة بتكون لاصقه بس اهم شي تحمرين الوجه اول مثل ما قلت حق الاخت روزا .. لان العجينه رطبه فبتكون لاصقه
طبيعة العجينه بتكون مرنه و شووووي تتلصق باليد ، يعني ما تضايق اذا لصقت في يدج .. بس شوي .. و مشكوره عزيزتي على المرور ، و اذا عندج اي سؤال حاضرين

ام سويلم
مشكوره الغاليه على المرور .. يزاج الله خير