خدامتنا والحرامي

مساء الخير 
حبيت نغير جو الكآبه واقول لكم موقف صار لنا مع خدامتنا 
طبعا انا كنت متزوجه واهلي كان عندهم خدامه سيرلانكيه كملت  سنتين وزياده وهي رافضه تسافر ✈وتبغي تقعد عندنا تشتغل وتطبخ وكانت كبيره شوي بالسن بس مو مره ومعتبره نفسها واحده من العايله واذا احد مثلا قال لها جيبي عشا او كذا وماسوت اللي يبي لازم تحطها سالفه وتخانق وترفع صوتها حتي عالأولاد ولما تنتهي السالفه تجي تبوس امي عشان ماتسفرها لان امي طاقه كبدها منها ومن لجتها 
المهم كان فيه حرمه تقرب لنا وماعندها خدامه قالت لها امي حنا خدامتنا تبغي تشتغل بس انا مابغاها فيني ضغط ومااتحمل لجتها قالت انا ابغاها بيعوها علي وافقت امي ويوم قالت للخدامه رفضت وقالت انا ماني بطالعه من هالبيت حاول اخوي يقنعها مافيه فايده 
فكرت امي قالت لاخوي  انت نادها وقل لها نبغي نروح لبيتنا  الجديد عشان تنظفينه لانها هي دايمن تقول انا بقعد عندكم واذا سكنتو البيت الجديد ابنظفه المهم ناداها اخوي وقال لها يالله ابيك تنظفين البيت الجديد 
فرحت الحرمه وركبت السياره من غير عبايتها وراح فيها عند بيت الحرمه اللي تبي تشتريها منا يوم وصل عند الباب رفضت تنزل الخدامه وقعدت تبكي قال لها اخوي انزلي ولا سحبتك من شعرك ونزلت وقعدت بالشارع تصرخ وتبكي 
طلعت الحرمه من بيتها ودخلتها ورجع اخوي لبيتنا واخذ كل اغراضها واعطاهم اياها واكتشفنا معها جوال وسحبته امي منها
بعد يومين كنت انا عند اهلي ابنام وحامل بالتاسع علي وشك ولاده ومعي بنتي صغيره ونايمه واختي الثانيه راحت مع زوجها طبعا حنا بالليل وقلت لهم سكروا باب الشارع المهم الوقت متأخر بالليل وامي نايمه وخواني كلواحد بغرفته انا الوحيده اللي تحت بغرفه منومه بنتي وابغي انام الا سمعت اللي يطق علي النافذه  وانا كنت توني غمضت عيوني يمكن مرت خمس دقايق بس من التعب وماكان عندي خدامه المهم فزيت من نومتي وسمعت اللي يطق النافذه خفت وقلت انا ماني متوهمه وهذا مو حلم بس الغريبه ليش يطق علي النافذه وباب الغرفه مفتوح قمت وقفلت باب الغرفه علي لان بنتي نايمه خفت علي بنتي لانه لو طلعت احتمال احد يدخل عليها من الصاله وياخذها  ذبحني الخوف وعندي جوالي بس ماكان فيه شحن وانا ماعندي شاحن بعد تقريبا نص ساعه من الخوف سمعت صوت اخوي فتحت الباب بسرعه وكلمته قال انا كنت عند الغساله اللي عند الصاله وكأني سمعت واحد يمشي وراي التفت بسرعه وماشفت شي وصرنا ندور بالبيت الا اختي بالمطبخ وقاعده تصخن لها سندوتشات قالت من فيكم اللي طل علي طيب ليش ماتردون ناديت وسمعت صوت مشي وكملت التسخين 
طبعا ماانسرق منا شي ولا فقدنا شي 
خفنا وقعدنا نفكر وش ممكن يكون لانه استحاله انه كلنا نتوهم 
لما سألنا اختي الي راحت قالت انا سكرت الباب بس شفت مجموعه عمال ماني عارفه بالظبط ايش جنسيتهم كانو بعيدين شوي بس استغربنا انهم يناظرون لنا واتحرونا مامشو واحنا رحنا كأني شفت الباب الثاني حق بيتنا مفتوح 
 استغربنا اذا فعلا واحد من العمال داخل بيتنا وش يبغي وليش ماسرق شي وليش يطق علي الباب
قالت امي احتمال هذا واحد فقد الخدامه ماكلمته وممكن يكون يجي عندها بعد استغفر الله العظيم هذا شي ماشفناه بعيوننا بس احتمال 
خصوصا ان الخدامه هذي ماتبي تنام بغرفتها بادور الثاني تبغي تنام بالسطح وقعدت تتوسل وتتشحذ وامي سمحت لها 
الله اعلم بس فعلا شي يحير ليش يطق علي النافذه