خربت علاقتي مع زوجي!! ومب عارفه أعدلها

السلام عليكم بنات حواء!!

أنا ضايق صدري ومب عارفه شقول :icon33:

كانت علاقتي مع زوجي ما تنوصف!! ومافي مثلنا اثنين!
متزوجين عن حب! وبعد معاناة.. وأسسنا بيتنا خطوة خطوة وكله بحب
وتفاهم!! يعني من كثر ما احنا كنا متفاهمين أحيان انسى انه زوجي!! احس
كأنه صديقتي او وحدة قريييييبه مني !! من كثر ما انا ماخذه راحتي معاه
أشاوره ويشاورني بكل شي كبيرة كانت أو صغيرة! حياتنا وأمورنا نقضيها
مع بعض!

اللي صار يا بنات زوجي إنسان يهتم بالتفاصيل! وأنا التفاصيل تتعبني
يعني تقول هو المره وأنا الريال! عرفتو!

بدا خلافنا من هالنقطه.. يعني انا شحنت وشحنت وشحنت فترة طويلة!
وانفجرت في ويهه مره وحده!! صرت كل ما يقول شي انتقده (مع العلم اني قبل كله امدحه)

بنات زوجي يمكن مثل كل الأزواج ما يقول كلمة طيبة في حقي ! وهالشي من زمان
محزني! ما قد سمعت منه كلمة يعطيج العافية! أو تستاهلين كل خير! يهتم فيني ما
أكذب عليكم ويهتم فيني بزوووووووووووود يعني إذا كحيت لازم يوديني مستشفى
مستحيل لو أقول لا من اليوم لبكره لازم بيغصبني وأروح!! بس يا بنات احس كأني
ضحية العيد!! مراعي صحتي وأكلي وكل شي إلا نفسيتي!

لكن يا بنات يوم أسوي شي زين!! يخليني أكره نفسي
مثال: كلمت امه الصبح! ومن بين الكلام قالت انه ناقصها غرض من أغراض المطبخ
والعصر كلمني من السوق على أساس يقول تجهزي بنروح بيت اهله!! قلت فرصه
! قلتله حياتي قلبي ممكن تمر تييب لي هالغرض! (اللي هو ناقص على أمه)
قال ليش؟ قلتله ابغيه انا احتاجه!

ما حبيت أقوله حق أمك! يعني بتطلع كأنها شوف رح هات لأمك!
أنا بغيتها تكون من عندي..

المهم قعد يحاول فيني يفهم ليش قلتله بس هاته وبعدين اقولك
ياب الغرض واحنا طالعين رايحين بيت أهله اتصل بأمه يقولها
إننا احنا يايين لهم! قلتله اسألها الغرض الفلاني شرته؟!!!! (منعاً للإحراج)
قالت له اييه خذته!! (ما لحقت الصبح كانت تتشكى انه تبغيه ومب لاقيه حد)

المهم هب فيني! وانتي مخليتني اييبه انزين قولي انه لأمي!
وأنا اضحك عادي!! قلتله ما لحقت تاخذه!! يالله راحت علينا
قال ولو قايله كنت سألتها بدال ما اني رحت وشريته
قلتله مب مشكله يالله بنرجعه وبناخذ شي بداله لنا!
رد علي بدون نفس!! ما يترجع خلاااص!! مثل اللي معصب على حركتي؟!!!!!!!!

عاد انا طنقرت وسكت وقلتله هذي يزاتي ومن هالكلام!!

يعني بنات بامانه انا بغيت أبر بأمه! ليش يكلمني بهالأسلوب! طافت السالفه

وتكررت كذا سالفه من نفس النوع أو أشياء ثانيه يبين انه متضايق أو غيره
ومع انه كان واضح انه مقصدي زين! المهم كثرة هالمواقف قستني!! وصرت
احس اني ابغي ادور في عيوبه مثل ماهو يشوفني كلني عيوب! ودايم سلبي معاي!

بنات إذا طلبت منه شي يقول مب مشكله بحاول أدبرها! (حتى لو كان هالشي بأمية درهم)!!!
كلامه كله احسه يبين لي انه طلباتي ثقيله! مع العلم يا بنات انا قلتلكم في البداية اني وياه
متفاهمين وكل شي نسويه مع بعض!! لذلك انا وايد اشياء استغنيت عنها عشان نكون مرتاحين
في حياتنا والماديات شي تكميلي ما حطيته اساس حياتي! لكن كوني مثلاً دايماً آخذ بمزاجه هو
يعني أثاثي مب عاجبني بس خذته لأنه السعر يناسبه! مراعيته !!! بيتي تنقصه أغرااااض كثيره
وعنده خبر اني مراعيته ومطنشه هالأغراض!! ومخليته يتكلم براحته عن ماديته
مع انه يا بنات احنا ترى وضعنا المادي جيد جداً لكن هو في أمور يشوف انه مالها داعي!
مثل أغراض البيت ياخذ الأساسيات وإذا قلتله هات الشي الفلاني يتأفف ويقول والله انا ما
أعرف هالشغلات ومافيني ألف السوبرماركت أدور!!! (ومستحيل يخليني اروح انا اشتري للبيت)!!

سكتنا وقلنا ماعليه هذا طبعه ما يحب !! صرت هالكماليات أنا آخذها كل ما حصلتلي طلعه
ومستحيل أطلبها منه.. (مع العلم ترى مب بخل منه هو كريم فيني لأبعد حدود)

يعني لو أقول له بروح أشتري فستان بـ 10000 بيقول أخذي مستحيل يقول لي لا
في اللي يخصني ولبسي ومظهري وعلاجي !! ممكن يوديني ثلاث إلى اربع مستشفيات
خاصة بس عشان يعرف هل الأول بيقول نفس كلام الثاني ويدفع ما عنده مشكله!!

لكن محيرني في أشياء دايم يقول مالها داعي!! وفي أشياء من أول ما تزوجنا طالبتها
وللحين ما تمت!!

يعني اللي هو مقتنع فيه بيسويه اليوم!! واللي لا بدون مبالغه تمر سنه!! وبعده ما سواه!!

في أمور يمكن بكيت!! من كثر ما بينت له احتياجي لها!! وللحين ما سواها !!! مع انه يتعاطف
معاي ويحسسني انه فاهمني وحس فيني!!

بديت احس انه حياتنا مع بعض عشانه هو ومافي شي عشاني! ولكن اقول لحظه هو مب مقصر معاي بشي! وأب حنون وزوج مرح ومايفرض علي شي! صح انه يسبب لي توتر كبير في حياتي بتدقيقه التام على التفاصيل!

يعني مره كنت رايحه السوبرماركت! تهاوشنا وين بوقف سيارتي! يعني يتدخل في كل شي
ومتعبني هالشي ..

برجع لكم وأكمل .. ولدي قام