خلاصة تجاربي و بإذن الله تستفيدون من كلامي

السلام عليكم يا بنات
انا انسانه من عمري ٢٦ سنه و من ايام الثانوي كنت اعاني من السمنه والربربه😑
عموماً قدرت انحف مرتين بحياتي واوصل للمثالي والجسم الممتاز اول مره في ثاني ثانوي كان وزني ٦٠ وسار ٥٢ 😍في اسبوعين عن طريق رجيم الشوربه الحارقه
والمره الثانيه وانا في ثاني جامعه كان وزني ٧٤ و سار ٤٦ 🤩في ٥ شهور برجيمات كثير ورياضه وكان جسمي ياخذ العقل
الزبده بعد ٦ سنين وصل وزني ٨٢ و قلت خلاص الى متى وانا سمينه وتعلمت اشياااااء كثييرررره من خلال تجاربي واهم شي تعلمته هو كيف احافظ على وزني وقررت اطبق اللي تعلمته بعد م انحف ان شاء الله واوصل للمثالي باذن الله
اول شي يا بنات رح اعطيكم كل شي تعلمته في مجال خسارة الوزن وبعدها المحافظه وانا حالياً نحفت من ٨٢ الى ٧٥ و باذن الله شهور واوصل للمثالي واحافظ عليه للابد باذن الله💖
اول شي يا بنات لازم تعرفون شغله 🔴
مافيه شي اسمه اراااده ، هاذي مجرد كذبه او شي كثير بنات سمينات يقولون انتظر متى تجيني الاراده عشان انحف شوفوا مافيه شي رح يجيك لو انتي م تحركتي وبديتي تشتغلين على نفسك
الاراده او الشعور القوي بالعزيمه والتحفيز ترا يجي لما تشوفين النتايج
يعني ابدي الحين وترا اول ما تبدين تشوفين كيلو ورا كيلو راح و الكيلو سار ٣ وال٣ سارت ٦ و ال٦ سارت ١٢ رح تستمرين والاراده تكون حديد ولا فيه شي يوقفك💪🏻
ثاني شغله🔴
الحرمان هو اساس البلا لازم يا بنات تسوون رجيمات مافيها حرمان و انظمه حلوه تقدرين تستمرين عليها شهور
فيها رز فيها خبز فيها فواكه عشان تقدرين تستمرين وبشرتك م تخترب و شعرك مايطيح و الدوره تبقى منتظمه
لان اذا سويتي رجيم فيه حرمان اول ماتتركينه على طول تكونين مجنونه عالاكل و مفجوعه عليه صدقيني عن تجربه وهذا اللي خلاني افشل بالمحافظه على وزني لما وصلت للمثالي
ثالث شغله🔴
المويه يا بنااات المويه هي اللي رح تنحفك ، الجسم ترا يطلع الدهون اللي تخسرينها في الرجيم والرياضه عن طريق البول وانتي بكرامه ف اول م تشربين مويه جسمك يحلل الدهون فيها و يطلعها وحطي ببالك شغله ( جسم جاف لا ينحف ) ممكن تنحفين بس ترا رح تخسرين بس عضل وسوايل وشوية دهون وبعد فتره ترجعينها كلها وكنك يابو زيد ماغزيت
رابع شغله🔴
الرياضه مهمه مرره لازم تسوينها امشي نص ساعه او ارقصي نص ساعه او اسبحي اللي هو اهم شي تتحركين اولاً تسير من ضمن يومياتك وممتعه جداً
ثانياً عشان جسمك وهو ينحف ينشد وتسيرين تلبسين اللي تبغين بدون خجل من ترهلاتك والجلد الطايح
بالنسبه للمحافظه :
1. احسبي ٣ ساعات بين كل شي تاكلينه حتى لو كان ربع كتكات لازم بين كل اكله والثانيه ٣ ساعات اقل شي
2. احسبي قبل النوم ٣ ساعات اقل شي ما تاكلين فيها شي
3. اول م تشبعين وقفي اكل
4. كلي اذا جعتي مو اذا طفشتي
5. اشربي مويه كثير تشبع
6. كثري حركه
وسلامتكم اتمنى تكونون استفدتوا
وتذكروا بنات انه باقي ٦ شهور على رمضان لازم نشتغل من الحين عشان المناسبات نكون فيها مرتاحين نفسياً وجسدياً💖