ربنا يباركلي فيكم جميعا والله مشاركتكم معايا هونت علي الموضوع...انا فهمت ملخص كلامكم وهبدا في المايونيز وكل الحاجات الباقية ويارب ييجي بفايدة
بس من فضلك يانورا ممكن تقوليلي اسم الفيتامينات اللي بتجبيها وبتتاخد كم مرة في اليوم ولمدة قد ايه

هبة حبيبتي انا بعتلك عالخاص

تماتيااااااااا...حرام عليكي يابنتي ردي علي الله يخليكي النهاردة راح علي اهو الله يخليكي ردي علي اول ماتوصلي شغلك عشان اروح ضروري يامروة

يا جماعه محدش يعرف مروه فين هيا مختفيه بقلها كتير

ألف شكر omahmed لى التوضيح يعني آخد راحتي ... :)

يلله نشمر ايدينا زي العمدة في فيلم الزوجه التانية ونبدأ بسم الله ندخل عرض في أول موضوع..

كهرمانة بالنسبة لتساقط الشعر فده كان مشكلة مزمنه عندي لعدة سنوات فضل شعري يسقط يسقط لغاية ماترفد قصدي لغاية مافروة راسي ظهرت منه
جربت كل الحلول الممكنة والغير ممكنه واستشرت ناس كتير اتحسن شويه لكن مارجعش طبيعي غير مع الحمل والولاده ...

وهقولك على خلاصة خبرتي في الموضوع ده بس طبعا قبل نتكلم عن العلاج ندور على الاسباب .. خذي عندك ..

الصبغات , فرد الشعر , الاستشوار , تغطية الشعر لفترة طويلة بقماش صناعي , الحيوانات الاليفة , عدم اكل الخضراوات بشكل كافي , التوتر العصبي , الشعر الدهني بشكل كبير , الفطريات وقشرة الرأس , ربط الشعر بقوة , تمشيط الشعر وهو مبلل جدا أو استخدام العنف في التصفيف , اضطراب الهرمونات , اسباب وراثية ( صلع وراثي) .وفعلا حكاية البلسم دي سمعتها في التلفزيون انه بيوقع الشعر ولسه مختبراها بنفسي من اسبوعين جبت نوع بلسم جديد وكل ماغسل شعري يقع بالخصل ولما غيرت ومبقيتش بستخدمه الحمد لله التساقط توقف ..

طبعا عشان توقفي تساقط الشعر لازم توقفي كل الاسباب السابقة او تقللي منها .. يعني لو مبتاكليش خضار كويس لازم تاكلي كل يوم لو شعرك دهني وهو ده السبب استخدمي شامبو للشعر مع غسول او تونيك وهكذا , وفي كل الاحوال توقفي او قللي جدا من الاستشوار والصبغات وخلافه ..

طبعا ماسبق ده تخليه اسلوب حياة عشان شعرك يرجع يطلع تاني اما الحلول السريعة لاصلاح مااتلفه الدهر فممكن تجربي حاجه من الآتي ..

عن نفسي جربت مجموعة فيتامينات اسمها "هير فيت " عبارة عن كبسولات تاخذي كل يوم كبسولة وحده العلبة سعرها 30 جنيه وفيها تقريبا عشرين او ثلاثين كبسولة مش فاكرة .. ده هو الحل النافع الاكيد وفعلا بتطلع الشعر كويس جدا بس عيبها طبعا محتاجه مواظبة واستمرار ..

دي الحاجة الي فعلا جربتها وجابت نتيجة وانصحك بيها وهتحسي بالفرق .. اما الحاجات الي سمعت عنها ومجربتهاش فهقولهالك وهي كلها من مصادر موثوقه وسامعاها من اكتر من مصدر لكن برضه للامانه انا مجربتهاش ..

في تونيك للشعر اسمه "هير باك " ده ممتاز بتستخدميه مرة كل يوم لمده ثلاث شهور لغاية ماالشعر يبدأ يطلع .. اختي جربته وطلع شعرها لدرجة ان كان احيانا وهي بتدهنه يتساقط على ودنها .. طلع لها شعر خفيف على صوان الأذن :) .. بس عيبه كالعادة ان مجرد مابتبطليه الشعر بيرجع يقع تاني ويمكن اكتر من الاول :(

طيب نشوف حل آخر ..


عن الوصفات البلدية ...

قالوا تجيبي ورق نبات السدر من عند العطار .. يدق جيدا او يطحن .. يوضع في ماء .. هتلاقي طلع له رغوة زي الصابون .. تغسلي بيه الشعر بدال الشامبو ولو مرة كل شهر .. قالوا انه يحسن الشعر جدا .. بصراحه مجربتوش لكن ناس كتير قالوا جربوه ونفع ..

في فكرة قالتها لي وحده ست كبيرة عربية من بتوع زمان .. قالت لي ان احسن حاجه تكثر الشعر هي غسيله بالباميا :) ... تجيبي الباميا بعد ماتقمعيها وتاخذي الاقماع الي بنرميها دي .. حطيها في البلكونه في مكان ظل لغايه ماتنشف .. بعدين تدق وتحتفظي بيها .. كل ماحبيتي تغسلي شعرك حطي شويه في علبة شامبو فاضيه وعليهم شويه ميه ورجيها كويس يطلع لها رغوة استخدميها بدال الشامبو برضه .. قالت ان نتيجتها ممتازه .. طبعا انا سمعت الحكايه دي من يجي سبع او ثمن سنوات ومن يومها وانا ناويه اجرب بس معرفش ليه مبجربش ..

في حاجه تانيه قالت لي عليها جدتي وقالت انها مجربة والناس كانوا بيعملوها زمان .. مقرفة شويه بس كتير قالوا لي بعد كده انها علاج ناجح وفعال .. تشوفي اي حد بيربي طائر الحمام وتطلبي منه شويه فضلات من بتاعت الحمام :) ... بتدق ويتحط عليها شويه ماء وتعجن زي الحناء وممكن تضيفي لها حنا برضه وبعدين يدهن بيها الشعر ويغطى ويترك مده بعدين يتغسل .. قالوا الحكايه دي مرة وحده وتطلع الشعر .. انا بصراحه ترددت كتير قبل ماعملها واخيرا توكلت على الله وطلبت ( الماتيريال) الازمه من وحده عندهم حمام وجابتها لي فعلا بس توقفت عند المرحلة دي بصراحه مقدرتش احطها .. برضه كتير صحباتي من السعودية قالوا لي عن بول الابل انه بيؤدي لنفس النتيجة بس برضه مقدرتش اجرب ..

وحده صاحبتي قالت لي على الجاز وانه بينعم الشعر جدا ويكثفه وانها هي شخصيا بتستخدمه وشعرها فعلا ماشاء الله كان رائع .. جربت الجاز مرة وفعلا حسيت انه بيكثف الشعر وينعمه بس مكررتوش تاني ...

وحدة صاحبتي تانيه برضه كانت بتدهن لبنتها زيت خروع وبتقول انه جاب نتيجة كويسه ..

اقول كمان ولا كفاية؟ لاه كفايه عشان محدش يحدفني بحاجه اصلي كترت رغي والناس عاوزه تنام ..

يلله سلامو عليكو

كهرمانة والله يا حبيبتي كنت بدورلك علي الرقم والتليفون هبعتهملك علي الخاص دلوقتي ان شاء اللهوو بصي هي البنت ماشاء اله عليها هايلة عملتلي قصة عمري ما تخيلت انها تليق عليا , بس مشكلتها انها تعملك القصة اللي شايفاها تنفع عليكي وتليق فخلي بالك علشان متشليكييش شعرك يعني تابعيها دي ماشاء الله قصتلي نص شعري ..بس طلع جديد وحلو قوي

السلام عليكم و رحمة الله و بركاته

ما شاء الله غبت عنكم كام يوم رجعت لقيت فاتني حوالي 6 صفحات. المهم، واضح ان البيت زاد سكانه و انا شايفة اخت جديدة هي ام عتريسه، اهلا و سهلا بيكي يا ام عتريسه و عاوزة اقولك اني لسه مقرتش اي حاجة في6 صفحات غير ردك الاخير و بصراحة مقدرتش امسك نفسي من الضحك على اسلوبك اللطيف في الكلام و خصوصا حكاية الماتيريال دي!!!!! كل ده عشان شعرنا يتقل و ميقعش؟؟؟ فينك يا دون تعالي شوفي!!!!! انتي بتعلمينا نحشي الحمام ازاي و ام عتريسه بتعلمنا نستخدم الماتيريال في شعرنا ههههههههههههههههههه

كلامك حلو جدا يا ام عتريسه و مفيد بس المشكلة فعلا هي المواظبة، يعني حبوب هير فيت دي انا فاكرة اني جبتها مرة واحدة و بعدين بطلتها، و برضه الزيوت و استخدامها لتغذية الشعر مش باداوم عليها. تقولي كسل، تقولي زهق، تقولي عدم اهتمام، بس فعلا الواحد مش بيقدر يواظب على حاجة. بس فعلا الاهتمام بأكل الخضروات مفيد جدا للشعر و البشرة بصفة عامة .

بالنسبة للبلسم، طيب فيه نوع معين كويس الواحد يستخدمه و الا كلهم بيوقعوا الشعر؟؟ لاني انا كمان جربت اكتر من نوع منهم نوع سويسري بس مش فاكرة اسمه لكن هو اصلا كان طبي و مع ذلك كان بيوقع الشعر كتير.

على فكرة كمان يا بنات الثوم مفيد جدا لفروة الرأس اما عن طريق تدليك الفروة بفص ثوم او عن طريق كريم مصنع خصيصا من الثوم و ده المتخصصين في الاعشاب الطبية همه اللي بيعملوه، بس مشكلته الريحة و لو ان ممكن التخلص منها بغسل الشعر بشامبو قوي الرائحة و شطفه بماء مذاب فيه معلقة نسكافيه. الثوم بيعمل كمضاد حيوي فيساعد على منع القشرة و معالجة اي التهابات في فروة الرأس تنتج عن الدهون الزايدة

صباح الفل ليكم جميعا و معلش انا لسه مقرتش الصفحات اللي فاتت، بس سلامي لكم جميعا لحد ما اخد فكرة انتم عملتم ايه من غيري اليومين دول

تحياتي