سبانش فلاور ..

مادام جومنجي بتسيب اللعب وتروح للمروحه يبقى دي نقطه هامه جدا لازم تلاحظيها .. الطفل في السن ده مهمته في الحياة اللعب واللعب فقط على رأي د. مختار في قناة المحور .. فاذا كانت بتسيب اللعب وتروح تلهي نفسها في حاجات تانية يبقى اكيد زهقت من العابها وبتدور على حاجه جديده ..

بصي هقولك على الحل الي بتبعه مع بنتي لما لاحظت ان العابها معادتش بتجذبها ..

عمرها دلوقت 11 شهر , في الاول كنت بجيب لها العاب كتير ( دباديب وحاجات بتزمر وحاجات بتتحرك ) لقيتها بتحب اللعبة وتتعلق بيها يوم ولا اثنين بعد كده بترميها وبتدور على غيرها .. ومع الوقت تكون عندي صندوق العاب كبير ومش مالي عينيها ..

طبعا ولاني استفدت من خبرات الامهات الي سبقوني الي قالوا ان اطفالهم بيعشقوا اللعب بادوات المطبخ و( النكش ) في حاجة البيت .. فقلت اخلي هي دي العابها ..

حطيت لها في صندوق الالعاب مع العابها كل حاجه احس انها هتلفت نظرها بس بشرط تكون آمنة .. مثلا .. سيديهات ليزر مش محتاجاها .. دسكين تلاته .. علبة كريم قديمة وملونه .. كرتونة صغيرة كان فيها برنامج .. علبة شامبو صغيرة فاضية ومغسولة .. اي حاجه تلفت نظرها .. بحط لها كل ده مع العابها .. ومتتصوريش قد ايه بتتلهي في الحاجات دي وممكن اتركها ساعه ولا اثنين بتلعب جنبي وانا على الكمبيوتر ..

احيانا بتزهق من كل ده فاجيب لهاحاجه جديده متكونش لعبت بيها قبل كده مثلا مجموعه من زجاجات المانيكير حطاهم في سلة بديهم لها تلعب بيهم بس بشرط اكون مراقباها عشان متؤذيش نفسها .. طبعا هي بتلعب بيهم لما تقول بس وتاني يوم كذلك بعد كده خلاص بتزهق وبكده اكون سليتها وفي نفس الوقت ضمنت انها لما تشوفهم بعد كده مش هيلفتوا نظرها عشان متبوظليش الدنيا ..

مثلا لما بكون بوضب الخضار .. فاصوليا مثلا .. أغسلها الاول كويس عشان متوسخش ايديها .. احطها في صحن بلاستيك عميق واديها لها تلعب بيها وانا بشتغل , مش هخسر حاجه .. هترمي شويه يمين وشمال بس هلمهم تاني وهي تكون اتسلت واتعرفت على حاجه بشكل وخامة جديده ..

وهكذا فانتي نمي حواس بنتك بانك تلعبيها بكل حاجه بس انتبهي لو حاجه خطيرة زي المروحه مثلا متعوديهاش ان دي لعبة فاحسن حاجه زي ماقلت لك قبل كده انك لو شفتيها بتلعب بيها تلفتي نظرها لاي حاجه تانية وبعد كده تنتبهي تحطي المروحه بشكل يمنع انها توصل لها ..

ازيكو يا حلوين
كويسين وسلامات انشاء الله
وربنا يحفظكم يا رب

صباح الخير يا يناتيت :27:
ميرسي يا داليا و ام احمد علي سؤالكوا الحمد لله جنا احسن دلوقتي
عقبال بنت مني ان شاء الله
سلامه يوسف يا ام يوسف :27:
ام عتريسه الف شكر علي ذوقك بس انا بنتي عندها سنتين و 7 شهور و كل الحاجات اللي قلتي عليها انا عملتها معاها من زمااااااااااااان يعني هي حاليا اكبر من سنها ما شاء الله
دي بتفصص البسله حالياا مش بتلعب بالفاصولي بس :D
ميرسي يا جميللللللللللل

ازيك يا روزاليزو :D
يا بنتي انا مش عارفه اقول اسمه ايه علي راءي بنتي :D
المهم نورتي يا كوكي
ازيك يا ظلال القراءن اسمك رائع تحفه شرفتيييييييي

هبة ..

شكرا ياستي على كلامك الحلو ولو ان الي كتبته ميجيش سطر في المعلومات الرائعه الي كتبتيها عن العناية بالبشرة

..
بالنسبة لفرد الشعر الضعيف اعتقد ان الكريم ده كويس بس بشرط تستخدمي النوع الخاص بالاطفال وحطيه على

شعرك اقل مدة ممكنه ( طبعا اقل مدة مذكورة في التعليمات مش اي مدة عشوائية ) بس اهم حاجه ميكونش مصبوغ

او مفرود قبل كده لان غلط ندخل الشعر في عمليتين مجهدتين في وقت واحد وهو في حالة ضعف ..

لا روزا ..

بالنسبة للآي لينر فخليها تشتري اي نوع ميكونش ( ووتر بروف ) يعني ميكونش فيه لمعة .. وانصحها بنوع كنت

اشتريته زمااان يعني بعد ايام الهكسوس بشويه من ماركة ياردلي بس كان شكله زي السمكة بالظبط ومبطط م

الاجناب .. ده كان راااائع وكل ماكنت احطه كانوا يسألوني راسمه عينك بايه .. المهم خلص ( قعد معايا كذا سنة

)وجيت اشتري تاني ملقيتش النوع ده ولقيت ياردلي تاني جربان بعشرة جنيه تقريبا وشكلة اسطواني زي القلم ..

ربما انه تقليد مش اصلي .. المهم اشتريته بس للاسف نوعيته عادية جدا وفيه لمعه بس اعمل ايه ملقيتش غيره ..

فلو لقيتي النوع الاولاني ده ان شاء الله هيعجبها كتير ..

أم يوسف ..

الف سلامه على يوسف وميشوفش شر ..

roseario ..

اهلا بيكي في وسطنا ==> ( جايه جديد بس بستهبل عاملة صاحبة بيت )

أم احمد ..

شكرا كلك ذوق على كلامك الحلو ..

ياستي اقولك ايه حكاية عتريسه .. اول ماسجلت في المنتدى كنت لسه حامل .. وكنت عاوزه اختار الاسم له علاقه

بالمولود لاني كنت متعلقه بيها جدا .. تقدري تقولي كده بتمحك عشان اجيب سيرتها كل شويه :P .. بس المشكلة

مكناش لسه استقرينا على اسم .. المهم اني لما كنت حامل كان بابا بيهزر معايا كل مايشوفني يقولي اخبار عتريس

ايه ولما عرفنا انها هتكون بنت بقى يسألني عن عتريسه :) .. ولاني عارفه ان دماغها هتكون صعيدية زي امها

ولانها آخر سلالات العتارسه المنقرضة فقلت خلاص هي ام عتريسه .. بس ده الي حصل ..

وبالمناسبة عتريسه ده الاسم الفني لكن اسمها الي في البطاقة ميار والدلع اسم النبي حارسها
.. مخيمر....

سبانش فلاور ..

مانا عارفه انها اكبر من بنتي ربنا يبارك فيهم هم الاثنين .. الي كتبته مجرد مثال وانتي اختاري من الخامات المحيطة بيها في المنزل الي يلفت انتباها وفقا لسنها ..

والجاي ده بقى هدية لعيون نودي عشان بس تعرفي انك لست وحدك .. وللامانة هو واصلني على الايميل يعني مش

انا الي كتباه بس بصراحه بحبه اوي واقعد اقراه من وقت للتاني .. واسيبكم بقى مع قواعد المرور في مصر ..

منقووووووووووووووووووووووول


قواعد جديدة للسيارات في مصر فقط!!



القاعدة الأولى: لو عربيتك كبيرة أو قديمة، أستخدم المبدأ القانوني: اللي خايف على عربيته يوسع!!

ملحوظة: ابعد عن سكة العربيات المخرشمة ، بيسوقوا بنظرية ضربوا الأعور على عينه!!

القاعده الثانيه: البوز بيز Booze Base: اللي يدخل ببوز عربيته الأول للتقاطع هو صاحب أولوية المرور! احرص على أن تكون صاحب أول بوز.

ملحوظة: لا تطبق الـ Booze Base مع أي لوري أو أتوبيس، حرصاً على بوزك لا مؤاخذة.

القاعدة الثالثة: الإشارات تكشف نواياك للأعداء، أياك أن تستخدمها!

القاعدة الرابعة: لا تترك مسافة للأمان بينك و بين السياة التي أمامك فهذا له عدة مخاطر:

1. عربية ثانية حتملا الفراغ في ثواني و برضوه ما يبقاش فيه مسافة بينك و بين الي قدامك، كل الي كسبته انك اتأخرت لورا شوية.

2. حتدي فرصة للعيال يعملوا غرز قدامك.

3. كل المشاة حيغمضوا عينيهم و يعدوا من الحته دي.

4. الي وراك حيقعد يزمر - لو كان مؤدب - أو تسمع شوية أسامي حيوانات لو كان سواق تاكس - مؤدب - ، أو حيخبطك من ورا لو كان سواق ميكروباص - و دول مفيش حد منهم مؤدب -.

الإشارات مش معمولة علشان تنظم المرور ، معمولة علشان شكل القاهرة يبقى متحضر بس!

اعتمد على العساكر ( مع تحملك كامل المسؤلية لو واحد منهم شاورلك تعدي و بلدياته الناحية الثانية فتح السكة للوري ) أو يفضل أن تستعمل البوز بيز ( راجع القاعدة الثانية ).

القاعدة الخامسة: اذا كنت مش واقف في الصف الأول في الاشارة اعمل حسابك تزمر بشكل متواصل و هستيري أول ما الأشارة تفتح، لأن الناس الي قدام بيبقوا واقفين في الاشارة من زمان و جايز جداً يكونوا ناموا!!

القاعدة السادسة: معظم الحوادث تحدث في التقاطعات أول الأشارة ما تحمر، كل ما عديت الإشارة الحمراء أسرع كل ما قلت فرصة انك تتخبط!

القاعدة السابعة: الشارع مكان مقرف، سوق بأسرع ما يمكن حتى تتخلص من هذا الهم بسرعة، الناس الي ماشيين بالراحة مرضى نفسيين بيستمتعوا بالعذاب ، يستاهلوا الي يجرى لهم.

القاعدة الثامنة: من حقوقك الدستورية أن تركن أمام باب المحل الذي تريد أن تشتري منه، اذا سبقك واحد ابن ستين في سبعين و ركن قدام الباب، فمن حقك أن تقفل عليه و تركن صف ثاني أو ثالث، و مش مهم لو الشارع اتقفل، ايه يعني أما الناس تتعطل عشر دقائق علشان تستمتع بحقوقك الدستورية؟ هيا يعني الدنيا طارت ولا كان وراهم الديوان؟

القاعدة التاسعة: من حقك أيضاً أن تخرج من مكان انتظارك في أي لحظة تشاء، اكسر الدركسيون شمال و اطلع، أي حد ماشي في الشارع لازم يقف لك فوراً، راجع البند السابق.

القاعدة العاشرة: إحترس من ثلاث أنواع من السائقيين بيسوقوا و كأنهم مش ممكن يموتوا:

1. العيال الروشين الي بيلعبوا Computer Games و فاكريين إن ممكن يكسبوا Life زيادة لو ساقوا أسرع.

2. موتوسيكلات توصيل الطلبات ( Home Delivery ).

3. سواقين الميكروباص.

ملحوظة: إوعى تحاول تثبت لحد منهم إن فكرته غلط. فاهمني!!!.

القاعدة الحادية عشر: لما تشوف حادثة لازم تهدي و تتفرج - مش مهم تساعد - الحجات دي دمها أخف من الأخبار المملة بتاعة التلفيزيون، و بعدين لما الطريق وراك يقف تحمي المجتمع من حادثة تانية.

القاعدة الثانية عشر: الكناسين لازم يحللوا اللقمة الي بياكلوها، حاول تنفعهم و ترمي أي حاجة من الشباك.

القاعدة الثالثة عشر: لما تخلص سيجارة أوعى تحطها في الطفاية، ارميها من الشباك أول ما تشوف واحد بموتوسيكل معدي جنبك ( علشان يحرم يعمل غرز ).

القاعدة الرابعة عشر: من حقك أن تعبر الشارع في أي وقت و من أي مكان.

القاعدة الخامسة عشر: اذا كان هناك سيارة قادمة اعمل نفسك مش واخد بالك و عدي براحتك خالص،ما تخافش، هوا حيقف، هو اهبل يدوسك و يودي نفسه في داهية؟

القاعدة السادسة عشر: اياك أن تنظر نحو السيارات القادمة، أعبر الطريق و ظهرك لها حتى لا يشك أحد قائدي السيارات أنك تراه و يحاول يخوفك علشان تقف انت.

القاعدة السابعة عشر: حتى لو شفته أوعى تخاف - خصوصاً لو معاك مراتك - تبقى راجل ملو هدومك و تخاف من حته عربية؟ عرض قفاك و سيبه يتفلق.

القاعدة الثامنة عشر: الرصيف ليس للمشاه، بل لركن السيارات و فرشات الباعة الجائليين و المحلات... الخ، لذلك يحق للمشاة السير في وسط الشارع، لمزيد من الأمان، راجع القاعدة السابقة.

القاعدة التاسعة عشر: إذا كان الماشي من فئة النقل الثقيل، فمن أبسط حقوقة إنه يمشي على أقل من مهله و يهتز براحته. واللي مش عاجبة الهز يدور على لوري يخبطة....



منقوووووووووووووووووووووووووووووووووووووول