دنيا + ذكريات

تتذكرون صديقتي الي قلتلكم عزمتها هي وامها؟ جتني اليوم وسولفت انا واياها مررره احبها وتذكرت أيام زمان لما تخرجنا من الجامعة... كان وقتها مافيه وظايف ابببداً وكنا بنموت نبي نشتغل ماخلينا باب ماطقيناه ندور شغل. صديقتي هذي لقت شغل في شركة تخيلوا كان دوامها شفتين من 9 الى 1 ومن 4 الى 8 كل يوم. وبحكم اننا مانسوق فمستحيل تروح البيت في البريك الثلاث ساعات فكانت تجلس في المكتب هالثلاث ساعات الين يخلص البريك. تخيلوا يعني كل يوم تطلع من البيت 8 الصبح وماترجع الا 9 الليل. ويوم الخميس (كان ويك اند وقتها) كان عندهم نص دوام بعد من 9 الى 1. كل هذا وراتبها 3 آلاف ريال لا وبعد غير مسجله في التامينات. تخيلوا اشتغلت ثلاث سنوات على هالحاله. وانا وضعي كان ازفت منها، انا كتبت لنفسي سيرة ذاتيه وماخليت مكان ماقدمتها فيه لدرجة ان اخوي كان يتريق علي يقول بقي شوي ويجيبون سيرتك الذاتيه في التلفزيون، وبعدها اشتغلت متطوعه ببلاش فترة وبعدين توظفت. وكل صديقاتي نفس الشي كل وحدة حاولت من جهه والي حاول تسوي مشروع تجاري صغير. المهم الحين بعد سنوااااات الحمممدلله تغيرت اوضاعنا كلنا... اليوم كله وانا جالسه اتذكر... الحين صرنا الي دكتوره والي مستشاره والي صاحبة بنزنس وكل وحده منهم لها مركزها وقيمتها بعد البهذله الي تبهذلناها. وصرنا لنا اسامينا في تخصصاتنا وبعضهم اشتهروا حتى وصرنا ننشر في التخصص و و و ... شعور غريب بعد ماتمر السنين وتطالعين ورى