احم احم اخباركم يابنااات انا حالتي حالة بمجرد مااقول لاحد سيرو علي تجيني حاله مادري وش تبي احس بتوتر وقلق وابدا اخطط وش احط وش مااحط اليوم الي فيه العزيمه عندي مافيه امل انام زين اذا جو عندي تصدر حركات غريبه وتفشل من الربشه احيانا اسلم عليهم مرتين خخخخخخخخخخخخخخخخ من جد حالات والله بس هذا قبل اما الحين ولله الحمد قدرت اتغلب على هالحالة وابدا اقص لكم برنامجي بالعزيمه قبل العزيمه باسبوع اقرر على كل شىء ابسويه واحطه يعني مثلا عشان تكونون معي بالصوره اخر عزيمه كانت عندي ماجا يوم العزيمه الا كل شىء جاهز وانا نفسيااا مستقره كشخت ولبست وتعطرت خخخخخخخخخخ عشان احس بالانتعاااش واستقبلت ضيووفي وانا مبتسمه وارحب واهلي اقولهم ياهلا والله وسهلا اسفرت وانورت واستهلت وامطرت زارتنا البركه بالسنه عيدين وهذا الثالث همن الله يسلمكم قدمت لهم العصير مع تارت وبعد العصير القهوه عاد القهوه لازم تتوصون فيها تصير مصلحه على اصولها ماتصير ثقيله ولا تصير خفيفه كانها غسال يعني تعرفون اغلب الناس تكون راعية كيف ولازم تكون القهوه صح وطبعاااااااا لازم التمر يكون موجود مهما بدعنا من هالحلويات والشكولاتات والتمر لازم ياخذ حقه من الاابداع يعني احرصو على التفنن في تقديم التمر وبعد القهوه الشاهي والنعناع اذا تحبون تقدمون معه شىء والا موضروري اذا فيه عشا دسم بعد ماتخلصون من الشاهي تجيبون المبخره وتحطون بخور زين وتبخرونهم وانتم تهلون وترحبون خخخخخخخخخخخخ يعني من يدخلون ويطلعون وانتي هلي ورحبي ووزعي ابتسامات لاني انا بالنسبه لي احس الترحيب والاستقبال الحار اهم بكثير من الاشياء الي تنحط بعدين قلطيهم على العشاااا وقولي تفضلو حياكم الله على قل كلافة مهما انتي حاطه وقولي والله هذا مو حقكم تستاهلون اكثر والله وياهلا وسهلا خخخخخخخخخخخخخ صارت سالفه هالترحيب بعدين تصيرين مجهزه المغاسل بالورود المجففه والشموع والعطورات والمخلطات واللبان والمناديل المعطره اذا غسلو وخلصو هاتي دلة القهوه وصبي لهم على فنجال فيه ناس بتروح وناس بتجلس بعد العشااا صلحي كابتشينو او قهوه تركيه وقدميها امممممممممم هذا الي يحضرني واحس اني طولت عليكم واتمنى اكون افدتكم وولو بجزء بسيط وياهلا وسهلا فيكم <<<<<<< شكلها تقمصت دور العزيمه خخخخخخخخخخخخ
يالله سلملم

بدررري يا رهيبه ياتسالي منورتنا بسنه عيدين وهذا الثالث الي شفنا لك رد فيه خخخخخخخخخ
ضحكت بقوه على ردك الله يوسع صدرك بالعافيه

وننتظر باقي المواقف والتخطيط الحلو والمرتب للعزايم :26:

..

.

اولا السلام عليكم <<<<<<<<< طبعا اتفلسف غلى بالي سنعه

المهم

يختلف الترتيب على حسب نوع العزيمه

اذا كان رجال يا حبيلهم وانتي بتكميلتك تحوسين بمطبخك

واذا كان نساء الله يعينك

واذا كان الاثنين فأنتي بتنسين اسمك

واذا كان عشا او قهوه او فطور في رمضان


واذا كان العشا من الطباخ او انتي بتسوينه

انا بالنسبه لي ما نعرف الطباخ (( ابو الشباب لاعب على )) يقول حريمنا ما يجيبون من برا <<<<<<< طبعا هذا اول الزواج يوم كنت حبيبه بس الحين غير ,, على حسب

المهم
1- لازم تكونين عافه عدد الاشخاص .
2- تكونين مجهزه الصحون والملاعق والمناديل ومطويتها وحاسبه حساب السفره ايش يكون وهذي الأشياء تجهزينها قبل بيوم من الصباح بدري وطبعا غاسله الاباريق والدلال و............ الخ
3- تحرصين انك تسوين اشياء تنحفظ في الفريزر وتجهزينها قبل ب 3 ايام وطبعا تحطين ضمن المنيوم اشياء تنعمل من الظهر مثل الايدامات والصياني .....الخ

وها المقالي وما حفظ في الفريزر تقومين بتجهيزهم للأكل قبل المغرب
4- اذا ما عندك خادمه الله يعينك قبل بيومين تنظفين البيت .
5-ترتبين السفره قبل المغرب في غرفة الطعام وتضعين عليها كل اللازم .
6- تحرصين انك تجهزين حلا العشا من الصباح والأفضل يكون كاسات اسهل من الغرف ولخبطه الصحون .

الآن انتهينا من مشكلة العشا

القهوه والشاي وملحقاتهم

فيه اختراع اسمه ترامس تجهزين كل شي فيها وتضعينهم على عربه في صالة الضيوف وتوزعين المكسرات والمقرمشات والحلويات بالتناسق على الطاولات بحيث يكونون في متناول يدك وتستطيعين تقديمها للضيوف بسهوله
مع مراعاة عدم اخراجها من المجلس بعد الانتهاء منها بل تركها مع الحرص على تغطيتها

وتقومين بالبس والتجهز ووضع المكياج قبل حضور المعازيم واثناء عمل القهوه والشاي

بالنسبه للعصير البعض يفضله قبل العشاء يكون جاهز في البراد وما يبقى عليك الا سكبه وتقديمه

وقبل سكب العصيرتقومين بتحميه الماكولات واثناء طفح المعازيم للعصير ترتبين انتي السفره بكل اتزان وهدوء وتضعي عليها كل ما عملته يداك

واثناء دخولهم على العشاء تولعين على الجمر عشان يحترقون أأأأأأ أقصد يتبخرون

وقبل كل هذا ضعي لك خطه اعددتيها على ورقه والصقتيها على باب الثلاجه

وفي الأخير الله يعينك على الكرف وتغسيل المواعين ((اذا ما كان عندك شغاله ))

وفي كلا الحالتين لا تهملي ضيوفك بل اتمي معهم باقي السهره وعندما بنقلعون اأأأأأأأأقصد يضفون وجيههم أأأأأأأأ أقصد يذهبون برعاية الله

اخلعي ملابسك ((وانتبهي لا تطلعين من غير هدوم)) وارتدي طبعا البيجاما القطنيه اللتي كانت عندك من ايام زواجك وراح لونها وتمططت من كثر الغسيل

واستعيني بالله وابدأي كرف وغسل وترتيب الى الصبح وطبعا اللي جايب لك الهم والعزايم ومتفشخر بحرمته انها تطبخ في البيت في غرفته يشاخر ويتاغر ((اي يتجشأ)) <<<لغير الناطقين السعودي النجدي

وانتي تونين في المطبخ وايدينك صارك تشتغل من غير ما تحركينها <<<طبعا اتبرمجت من كثر الشغل

ولا تنسين تشغلين على اذاعة القرآن عشان تطردين ابليس وما تكسرين الصحون

ودمتم سالمين

الله ياخذ عدوانك يا الحلوة

كلامك عسل وطريقة حلوة مثل اسمك

رهيبه ياتسالي...
مشكورة وفعلا نصايحك رووعة وقيمة كمان

][
مشكورة علي مشاركتك وفعلا ياريت يشاركونا البنات
لان هذي المشكلة موجدة دايما ماهي مؤقتة

الــــــحلوة ..
مشكورة حبيبتي واضحكني كلامك جدا وزوجي يشاخر ويتاغر,,,, اي يكرع عندنا بالحجازي
وانا اذا عملت عزيمة لازم اجيب ياشغالت اهلي او اهلة
وبصراحة انا اذا راحوا المعازين احس هم وانزاح فتلاقيني عشان المكياج اروح البس حاجة تفتح نفس زوجي عشان مايقول قدام الناس وبس لا وقدامة كمان
واذا كان في شغل بالمطبخ اخلية بعد مأنام وأرتاح