أنت حطيتي نفسك مقياس للجميع !!

يعني اذا أنت ما تقدرين تفارقين زوجك ولا ترتاحين في غير بيتك وتحسين نفسك ضيفة عند أهلك ... فمو كل الزوجات مثلك !!

وكل زوجة أعرف بظروفها وزوجها ، اللي خايفة على بيتها ومصلحتها أكيد ماراح تهمل وتضيع زوجها وبيتها ببياتها عند أهلها لو هو يضرها في شيء ..

لكن اذا نومها عند أهلها أمر يسعدها ويريحها والزوج متفهم لهالشيء .. ليه نقول لها أنانية !!!
يعني الزوج اذا سافر أو طلع يبات في البر وتركها هي وعياله عند أهلها ... ليه ما نقول له أناني !!

ليش المرأة اللي تفكر في نفسها وراحتها بشكل ما يضر اللي حولها نقول عنها أنانية ؟!!!


أنا معك في حالة ان الزوج رافظ لهالشيء .. فأقول لا تباتين عندأهلك من غير رضاه لأنك أول من بيتضرر ..
أنا معك في حال ان هالشيء يصير بشكل مستمر وعادة تخليها تقصر وتهمل في بيتها ..

ومسألة من يطبخ له من يغسل له .. فهو موب طفل .. والله يسلم المغاسل والمطاعم .. يعني يوم يسافر ويترك زوجته من يطبخ له ويغسل له في سفره !!
والا اذا هو في الديرة غير !! ما عاد يتقبل الأكل من برى ولا عاد يعرف يصرف نفسه !!

والمسألة كلها يوم وبالكثير يومين .. وما فيه وحدة تبات بالاسبوع عند أهلها وهم في نفس الديرة الا اذا كان عندها ظروف تضطرها ..
وهي الوحيدة اللي تقدر تقيم هالظروف .. ومهي بحاجة لأحد من برى يعلمها وش اللي يصلح وش اللي ما يصلح .

صدقيني ما فيه غبية تهدم بيتها عشان تبات عند أهلها ..
كل وحدة متفاهمة مع زوجها وعارفة نظامة ومصرفة امورها قبل ما تروح لأهلها ، وان كانت غبية وأخذتها عادة دائمة فلا تلوم الا نفسها .

لكن اللي أنا متعجبة منه .. فكرتك انه أهلي ما زوجوني عشان أنام عندهم !!!!

ليش تنظرين للموضوع بهالشكل !!!

ليش يعني خلاص .. ماعاد أبات عندهم .. وتصير علاقتي معهم مثل علاقة الضيف بالمضيف !!!!!!!!!
لو بفكر مثل تفكيرك والله ما كنت بتزوج ..

الحمد لله ان أهلي ما يحسسوني اني ضيفة عندهم .. ويحبوني أبات عندهم ..
والحمد لله ان زوجي متفهم جدا ويؤمن ان الزوجة مهما ارتبطت بزوج وأولاد ففي داخلها طفلة صغيرة متعلقة بأهلها ..


اذا أنت تنظرين للي تبات عند أهلها بتعجب ومستغربة من منطقها ..
فحتى اللي تبات عند أهلها تتعجب من منطقك وكلامك ..

أنا أعرف زوجات مثلك .. لو تموت وتقطعينها تقطيع ما تبات عند أهلها .. متعلقة ببيتها وزوجها بجنون ..
وأنا أتعجب منهم لكن ما أنكر عليهم وضعهم مثل ما تنكرين علينا وضعنا ..
عارفة ليش ..

لأني أعرف ان الناس مو سواء ولا ظروفهم سواء ..
الناس شخصياتهم تختلف واهتماماتهم وأولوياتهم .. سواء الزوجات أو الأزواج ..

فيمكن أنتي تعلقك بأهلك موب بشدة تعلقنا بأهلنا ..

بالنسبة لي أنا أحب زوجي وعيالي وبيتي رقم واحد أكيد .. لكن تعلقي بأهلي يظل شديد والزواج ما غيرني أبد ..

أحس اني ملكة ببيتي لكن موب معناتها اني أصير حبيسة هالفكرة فأحرم نفسي من الإحساس بأني مازلت بنت أهلي ..

يا شيخة ملك أو رئيس أي دولة .. يرفه عن نفسه بالسفر لدول ثانية غير دولته , هل نقول انه ضيع دولته ؟!
أكيد لا .. لأنه مرتب اموره وأوضاعه في فترة غيابه .. وهالشيء نفسه تسويه الزوجة قبل تروح لأهلها .

على فكرة لي أكثر من سنتين ما عدت أبات عند أهلي الا لسفر زوجي مو لأني شايفته غلط .. لكن لظروفي .

الزبدة كلن ينظر للموضوع من زاويته .
و ما لأحد الحق انه يستنكر على الآخر طريقة تفكيرة .. فالناس يختلفون في شخصياتهم وظروفهم .

ماأتفق معاك .. لكني أحترم رأيك وهذي حياتك وانتي أدرى بنفسك وزوجك لكن التعميم خطأ كبير ..

كل زوجين لازم يبعدوا عن بعض فتره علشان يجددوا حياتهم ويكسروا الروتين ..
وزي ماالزوج له حق الأهل برضه لهم حق علينا ولا خلاص كبرنا وتزوجنا بعد ماأفنوا صحتهم وشبابهم عشانا .. يصير جزاهم بس نجي نسلم مثل الغريب ونتعشا ونمشي !!
والله هذي قمة الأنانية ..؟؟
يعني أفكر بزوجي صاحي ولانايم تعشى ولا لأ بردان ولا متغطي .. أسألكم بالله عمركم فكرتوا نفس التفكير في آباءكم وأمهاتكم وهم أولى الناس بالاهتمام والمراعاة .. وهم الوحيدين اللي يحبونا بدون مقابل .. ولما أنام عندهم لضرف قاهر أكون متوترة !!
الله ابتسامة بابا وماما بشوفتنا تسوى عندي الدنيا ومافيها ..
وضحكتهم إذا قامت بنتي الصبح بتفطر معهم تسوى رجال الدنيا كلها ..
وطلعتي معهم للبر ووناستنا تنسيني كللل همومي ..
والله لو مافيها إلا اني أحني أمي ولا أهمز ظهرها هذا يكفيني ..

والزوج على كل حال مايحب المرأة " اللزقه " مثل مانسميها وربي اني أعرف وحده كانت تمووووت في زوجها وتكره تنام عند أهلها مع خواتها عشانه قال لها في يوم من الأيام .. يوووووه ابعدي عني خليني اشتاق لك لازقه فيني طول الوقت مو مخليتني أتنفس !!

عن إذنكم بجهز أغراضي يمكن أروح أنام عند أهلي ..

كلااامكم صحيح 100% ونفس اللي كنت ابا اقولو

ليش البعض مخليه الزوج اكبر همها.؟؟ ماخدين فكره غلط

اوكي تحبيه تموتي فيه تنظفي تطبخي تكوي تغسلي تهتمي فيه وتدلعيه
بس مو معناتو انو يسير هوا شغلك الشااغل

بالعكس حلو انك تروحين لاهلك منها تغيير جو ومنها تشتاقون لبعض انتي وزوجك
بس طبعا مو شهر او اكثر لا بالكثير 10 ايام اذا كانوا الاهل في مدينة ثانيه

مافيها شي لو الزوج ماعندو مانع كويس الوحدة تفك عن نفسها شوى هي وعيالها انا عن نفسى الويك اند عند اهلى