وصلنا حديقة النباتات مع اني ماكنت مؤيدة الذهاب لها لاننا سوف نذهب الى حديقة نوراليا فقلت كلها اشجار مابغى امشي هنا وهناك واتعب نفسي (تخصص كسل)بس زوجي اصر قال احنا جايين نشوف كل شئ عندهم ليش نحرم انفسنا واكيد في فرق بين الثنتين.
اخذنا عربية جواد والعيشه حقتنا وهذي اهم شئ وراح زوجي واشترى تذاكر وكانت الساعة 12,30 ظهرا والحديقة مليانه خصوصا من العشاق السيرلنكيين خصوصا انه كان يوم احد يعني اجازة عندهم .....
وانا انتظر زوجي والاولاد اشوف العالم كلها داخله بالمظلات مع انه الجو فيه مطر خفيف يعني رذاذ بس قلت اهلها ادرى بطبيعتهم يمكن يجي المطر القوي بعدين .....جاء زوجي بالتذاكر قلتله كلم السواق يجيب المظلات شوف الناس قال والله انك صقره=شاطره ونبيهه...قلتله شفتوا لو انا مو معاكم كان الحين انتوا حايسين والله العالم ايش كان صار فيكم(اقول انثبري محد يعطيك وجه)
طبعا بدى شغل التصوير واخذ لنا زوجي صورة في المدخل..
طبعا معانا خريطة قال زوجي حنمشي عليها عشان مانلف وندور على الفاضي طبعا الحديقة جنان سبحان الله فيها ورود وازهار واشجار غريبه وعيالي يقولون ايش اسم هذي الشجرة ياماما عاد انا ماصدقت الحين جاء وقت الفلسفه قلتله شوف ياحبيبي كل شجرة عليها اسمها مكتوب في لوحه وفرح سامر قال يالله قولي اسمها
جيت ابقرى الاسم والا الاسم طويل وصعب واتنحنح واشوف الكلام الصغير اللي تحتها والا انا اخرطي ماعندي سالفه وسامر نشبه تقولين يعني تقولين قال ماما ايش فيك قلت اقول يالله الحديقة كبيرة ورانا مشوار بلا قرايه بلا هم تفرج ساكت ...راح سامر ولصق في ابوة قال امي ماعندها سالفة وطبعا زوجي مشغول في التصوير قال امسكي الخريطة وارشدينا ....ياكرهي في مهمات زوجي قلتله طيب واطالع الخريطة والا انا ماادري فين راسي من رجولي واحطها بس على جنب ....شوي والا زوجي يقول هاه يا مره وين عدنا وانا اقول ياويلي ويلاه واطالع في الخريطه قلتله احنا اصلا وين كنا ......قال وين كنا والله ماادري الخريطه في يد مين هات عنك الخريطه ياشينك من قائده ......
ويتولى زوجي القيادة قلت فكه ....طبعا من دخلنا وسيف وسامر بالمظلات مع ان المطر رذاذ يجنن بس مساكين محرومين من مسكت المظلات ودقيناهم صور مع المظلات وهم فرحانين..
طبعا الحديقه كلها عشاق قلت والله يحقلكم مطر وشجر وورود الحب بيجي غصبا عنكم من هذا الجو الحلو.....
طبعا زوجي يناظر الخريطه قال في نهر في الحديقة قلت احلف يالله علينا وعليه وماراح نجلس الا على النهر طبعا سيف بدأ في التذمر والتململ كالعادة فاقترح زوجي اقتراح ان اللي حيتولى القيادة الى النهر سيف وسماه القائد سيف عاد سيف بغى يطير من الفرحه وقال يالله وراي قلت عزى الله ضعنا........
طبعا الحمدلله طوال الوقت جواد ساكت في عربته يتفرج عاجبه المكان ان شاء الله دوم ياجواد....
طبعا سيف من تولى القيادة وهو ماعاد يعرفنا الولد داعس مشي ولا درى عننا احنا وراه والا لا ......قاله زوجي سيف مايصير كذا القائد لازم يشوف كل اعضاء الفرقه معاه والا لا ......وسيف داعس مركز على الخريطة وعلى طريق النهر اما الباقين مع السلامه لو متنا مادرى عننا.......
طبعا وصلنا النهر ومشينا على جسر معلق من حديد ضيق مايكفي الا شخص واحد في المرور طبعا سيف في المقدمة وبعدين سامر وبعدين انا وبعدين زوجي وجواد......سيف لما صار يمشي على الجسر وبدأ الجسر يتحرك ويتهزهز سيف بغى يموت من الرعب وبدأ الوجه يصفر ويزرق....قال ياماما الحقيني الجسر بيطيح فينا قلتله تعوذ من الشيطان ماراح يطيح ولا شئ والولد يطالع في النهر تحتنا ويقول واذا انفك وغرقت ومت قلتله عاد ايش نسوي مقدر ومكتوب.ههههههه لو قلت لسيف هذا الكلام كان توقف قلبه
قلتله ماتشوف العالم كلها ماشيه عليه ماصارلهم شئ بعدين هذا من حديد ماينفك الحمدلله الولد تطمن......طبعا في ناس كانوا يمشون قبلنا ورجعوا لان الجسر يوصل للشارع وكان صعب لان الطريق ضيق طبعا بعد ماعدوا كلهم جلسنا احنا في النص ونصور وكان منظر النهر خطير وزوجي يقول تخيلي لوعندنا زي هذا الجسر كان صرفوا عليه مليارات قلتله لا وبعد كم شهر بيطيح بالناس ويبدون شغل اصلاحات....... متعقدة من جدة وطرقها......
المهم رجعنا ادراجنا وقلت لزوجي نبغى نصلي الظهر الساعه 2
طبعا احنا متوضين بس كانت الارض مبلوله طبعا الارض عندهم كلها عشب ماتشوف التراب جلسنا نمشي لين مالقينا عشب خفيف وشوي والا جايه بنت صغيرة تجري تبغى جواد البنت تأثرت بأجواء العشق اللي في الحديقة قالت حتى انا بدورلي على حبيب
واختها تسحبها وهي تبكي ماتبغى الا جواد قلتلها ايش اسمها قالت
(تتتتتتتتتتتتتت )اسم ياطوله ماادري وايش هو قلتلها ماشاء الله حلو
هههههه.البنت غصبى راحت لاهلها طبعا دقيناها صورة عشان المرة الثانيه نجيب المهر قلنا يابختك ياجواد بتتزوج سيرلنكيه ماراح تكلف عليك رخيصه بس نبنيلكم ذيك العشه ونحطلكم مزرعة رز وشاهي و نحط فيها بقر .....ههههههههه
طبعا جواد فاغر مو داري وايش السالفه فشلنا ماعبر البنت مسوي فيها ثقيل عليها....
طبعا بعد اجواء العشق والغرام الطفوليه نزلنا جواد من العربيه قلنا خليه يمد ظهره المسكين جالس طوال الوقت وسيف قعد معاه وانا وزوجي وسامر صلينا جماعة الظهر والعصر قصرا وجمعا ....
طبعا لما كنا نصلي كان مقابلنا شجرة مليانه عشاق ...لما خلصنا الصلاة الشجرةكانت فاضيه قلت لزوجي خربنا عليهم الجو.خخخخخخخ
طبعا توجهنا الحين مغادرين الحديقة وبدأ سيف يضارب سامر على الخريطة ويسوي قلق ....فقال زوجي الحين القيادة لسامر وزعل سيف وقال خلاص انا ماراح امشي معاكم بروح لوحدي قلناله مع السلامة (درب يسد ومايرد)
طبعا واحنا نمشي مروقين ونتفرج وهو زعلان ويمشي قبلنا بمسافة بعيدة ومايلتفت ويشوف احنا معاه والا لا .......
قلت لزوجي ايش رايك نتخبى خلف شجرة كبيرة عشان يفتكر انه ضيعنا ويتوب مايمشي لوحدة....بدت المجرمه تخطط
قال زوجي انت ذيبه=مجرمه ونادينا سامر بصوت منخفض وقلناله على الخطه وجلس يضحك قال احسن وتخبينا خلف شجرة لمدة دقيقتين والولد مارجع وخرجنا ونطالع والا الولد ماهو فيه قلنا وين راح شوي والا هو جاي من ورانا وماسك ضحكته عشان هو زعلان مننا قال تبغون تخدعوني واحنا ميتين ضحك عليه.
عاد هو الحين وصل الزعل عنده 180 درجه بسبب الحركه
طبعا لما كنا ماشين انا فغرت في الشجر وكان في عمال يكنسون اوراق الشجر وكان لونه اصفر .......كان على الارض كلب نايم ولونه ترابي زي لون الورق عاد انا مانتبهتله والكلب في طريقي على بالي مجموعة اوراق شجر(ياشيخة تكفين ايش جاب الكلب للورق)
عاد زوجي لما حس اني داعسه وماني مركزة قال انا اوريها الحين فغارتها (طبعا كانوا جالسين اثنين عشاق على شجرة بجنب الكلب)
جاء زوجي مسرع ومسكني من اكتافي بكل قوته ودفعني بكل قوته على الكلب وسحبني عاد انا الله لايوريكم صرخت وخصوصا لما الكلب نط يجري قلبي بغى ينخلع ويتوقف وزوجي والاولاد ميتين ضحك علي وانا مومستوعبه اللي صار لانه لما مسكني زوجي من كتفي بقوة على بالي تأثر الرجال باجواء العشق وبيحضني (ماادري والله مين اللي تأثر )لما استوعبت ان زوجي رماني على كلب ضربته وقلتله طيب والله لردها لك كذا تفضحنا من السيرلنكيين انا في اجواء حب وغرام وانت يالخبل بدال ماتشيلني عن الكلب تروح ترميني عليه (صدق انكم يالسعوديين دفوش ماعندكم رومنسيه)لكن لا مت ان شاء الله ماراح اتزوج الا سيرلنكي يعوضني اللي فات من عمري ابغى اقهره.......وزوجي يضحك قال والله لتموتين جوع قلتله ليه ربي كثر الرز والشاهي
حاسدتهم المساكين على عيشتهم....
بعدين وصلنا للمدخل وقلت لزوجي اعتق الكاميرا ابغى اصور وردة حمراء عاجبتني كانت على شكل قلب راح الملقوف وصورها قبلي واخترت وحده ثانيه وجلسنا انا وسامر نصور طبعا سيف وصل المدخل قبلنا ولسى زعلان لان في نص الطريق زوجي عصب عليه وقال بشتري لسامر لعبه خاصه وانت لا
لانك قليل ادب ومن بعدها سيف ماعاد له حس يعني انكتم وفكنا من طولة لسانه...لانه يحب الالعاب يعني مسكناه من يده اللي توجعه.....هههههههه
واحنا خارجين ونلفى حبيبة جواد وتجينا جري واحنا نضحك عليها
قلت لزوجي شكلها البنت عاجبتها العربية مو جواد لان العربيه فيها رسومات وكمان جواد مااعطاها وجه قال هذي خبله فضحتني من اهلي .......وودعناها

الله يحييك والله ان تنزيل الصور سببلي عقدة نفسيه ماخليت مركز تحميل ماجربته والحين حملت على مركز تحميل عالم حواء بس مستنيه الموافقه على الصور..........
تكفين لو تعرفين مركز تحميل سريع ومظمون قوليلي عليه.....

روووووووووووووووووووووووووووووعه

الله يسعدك ويحفظ لك عيالك وابوهم

ومن كلامك احس انك جنوبيه

انا احلم بس اقضي ساعتين في قطر لانها حولنا بس ماش

مافيه جواز

واو يا طموحه عليك اسلوب تشويق

ما شاء الله

ومبدعه في طرح افكارك

الله يخليلك زوجك وعيالك

ننتظر صور حديقة الرومنصيين

ههههه

الله يحييك يام هنوده .......وانا جنوبيه ابا عن جد ......

انا سمعت ان السفر لدول الخليج مايحتاج جواز سفر.....او لسى يدرسون القرار بس ان شاء الله تطلعين جواز وتسافرين قطر....ترى الاجراءات سهله يوم واحد والجواز خلص...