طموحة2010 :

بعد ماطلعنا من مدينة الالعاب توجهنا الى فندقنا بعد ساعة وصلنا فندق رمادا ويقع بالقرب من الشاطئ يعني نروح الشاطئ بالاقدام وكانت المنطقه محاطة برجال الجيش في كل مكان حول الفندق وعلى الشوارع بسبب حدوث تفجيرات في مدينه سيرلنكيه عشان كذا مشددين الامن في كولمبو لوجود مراكز التجارة وبيت الرئاسة والاماكن العسكريه والسفارات ....... دخلنا الفندق وراح زوجي يخلص اجراءات الدخول لكن فوجئ بالموظف يقوله مالك حجز عندنا قال زوجي الا انا الحين حاجزه من جوالي على موقع بوكينق واعطاه رقم الحجز قال الموظف خلاص ارتاح وانا حشوف بعد ربع ساعة نادى زوجي وقاله لقيت حجزك بس انت حجزت غرفتين لمدة ليلة قال زوجي بس انا ابغى غرفة لمدة ليلتين قال الموظف ماينفع انت خلاص حجزت كذا المهم جلس زوجي يحاول مع الرجال ويقنعه انه خلاص بدال غرفتين يخليها ليلتين والرجال يقوله خذها الليله غرفتين وبكرة غرفه قاله زوجي لا انا مو محتاج غرفتين لكن اذا ماراح تنفذ طلبي انا بطلع من عندكم والفلوس اللي انسحبت من البطاقة الله يعوضني عليها وزوجي مره عصب على الرجال قال ليش معقد السالفه مع انه الموضوع ينحل في دقايق.......المهم بعد يمكن نص ساعة قال لزوجي خلاص انت اجلس وانا احاول واشوف الموضوع بعد ربع ساعة نادى زوجي وقاله خلاص عدلت حجزك غرفة لمدة ليلتين وسجل البيانات واعطى زوجي كرت الدخول للغرفة اخيرا ..........دخلنا غرفتنا وكانت كبيرة وفيها سريرين مع ان زوجي حجز سرير مزدوج بس احسن الاولاد على سرير واحنا على سرير وكانت للاسف تطل على الشارع ......طبعا الليله ب600 ريال وبدون فطور يعني غاليه على الفاضي وانصدمت لان الكل يمدح هذا الفندق ..فندق فخم بس الهونس فولز والايرل ريجنسي احلى منه بكثير ومطلاتها جنان وفوق كذا ارخص والسعر شامل الفطور...... طبعا ريحنا في الغرفه الى الساعة ثمانيه وخرجنا الى الشاطئ بعد ان صلينا المغرب والعشاء ........... مشينا الشاطئ كله وكان مليان سيرلنكيين وفيه اجانب وبعد مالفيناها توقفنا وتعشينا في احد الكشكات اللي على البحر وكان زحمة بس اكله لذيذ اسم المحل نانا ......طبعا اشترطنا بدون بهارات وطلبنا جمبري وكان حار ودجاج طبعا مع الرز والخبز بس الاولاد مااكلوا يقولوا الاكل كله حار واكلوا من الرز والخبز........مع اني عارضت زوجي وبشده قلتله ماراح اتعشى في كشك مفتوح الرايح والجاي يتفرج علينا قال زوجي بنتعشى فيه لانه الاكل طازج وقدام عيني يسووه وبشروطنا واحلى شئ انه رخيص وطبعا غصب عني وافقت بس الحمدلله اكلهم حلو وبعدين توجهنا للفندق ونمنا......

بعد ماطلعنا من مدينة الالعاب توجهنا الى فندقنا بعد ساعة وصلنا فندق رمادا ويقع بالقرب من الشاطئ...

+2

الفراشه 2009 :

حلو الفندق بس ما يستاهل هالمبلغ غريبه مع انك ما شاء الله مطلعه على موقع العرب المسافرون وسفاري ما اخترتي فنادق ثانيه احلا لها مطل بس رحله موفقه ما شاء الله يارب ترزقني مثلها

حلو الفندق بس ما يستاهل هالمبلغ غريبه مع انك ما شاء الله مطلعه على موقع العرب المسافرون وسفاري ...

طموحة2010 :

يوم الخميس10-2-2011 صحيت الساعة 6 صباحا وجهزت الشنط لاننا حنتوجه الى كولمبو وصحي زوجي والاولاد الساعة8 ونزلنا وافطرنا وكان فطورهم لذيذ بيض اوملت سيرلنكي بدون بهاراتهم الحارة وبيض عيون نص استوى للاولاد ماعجبهم واحلى حاجه انه جاب لنا المربى بالفراوله والاناناس في علبها يعني ناخذ الكميه اللي تناسبنا واحلى حاجة زبدة الفول السوداني لذيذة انا وسيف خلصنا العلبه طعمها اصلي ومعاها قطع فول سوداني وعصيرهم فرش كوكتيل جدا لذيذ طبعا هم مايحطون سكر في عصيراتهم فطلبنا سكر في العصير عشان الاولاد بعد مافطرنا توجهنا لغرفتنا وجهزنا شنطنا وغادرنا الفندق متجهين الى كولمبو في الطريق زوجي حجز فندق رمادا كولمبو من النت الى على جواله من موقع بوكينق بس غلط حجز غرفتين لمدة ليله بدال مايحجز غرفة لمدة ليلتين وطبعا زوجي مو داري انه غلط في الحجز ......وحتشوفون ايش صار لما وصلنا الفندق....... الطريق الى كولمبو جدا رائع خصوصا اننا بمحاذاة النهر الى كولمبو بس احيانا ندخل مدن ومايكون فيها النهر وبعدين نرجع بمحاذاته..... في الطريق قلت لزوجي نبغى نروح في كولمبو مدينة ملاهي العاب الراحه فسأل زوجي السواق عنها فقال هي في طريقنا على كولمبو فقلت لزوجي نبغى نمر عليها قال ليش نكون تعبانين والاولاد نايمين قلتله بالعكس حنتنشط بدال الجلوس المتواصل في السيارة ونغير جو قال اوكيه وصلنا لها الساعة 12ونص الظهر وكانت الشمس حارة وعندهم التذاكر نوعين قروب A وقروب B وتشمل الالعاب المائيه ولكل قروب سعر معين وباقي الالعاب تشتري تذكرة للعبه الي انت تختارها في الداخل.... بعد المداولات والمناقشات اتفقنا اننا نشتري تذاكر من الداخل للالعاب اللي الاولاد يختارونها بكيفهم خصوصا ان اولادي من النوع اللي يحبون الالعاب الالكترونيه ......فاشترينا بس تذاكر للدخول وكان الجو حار والشمس قويه بس اخذنا المظلات وطبعا الجو مايهئ ان الاولاد يلعبوا في لالعاب المفتوحة فتوجهنا على الالعاب الالكترونيه طبعا الحديقه شبه فارغه بس احنا وعايله سرلنكيه ومجموعة بنات ...... دخلنا صالة الالعاب الالكترونيه وكانت صغيرة ومقفلين كل شئ فيها حتى المكيف وجات الموظفة وشغلت المكيف والالعاب وانا اخذت كرسي وجلست مقابله للمكيف والاولاد يلعبون يمكن نص ساعة لعبوا كل الالعاب وميزة العابهم الالكترونيه اذا لعبت لعبة وفزت فيها تنتقل للمرحلة الثانيه واللي بعدها يعني زي العاب البلاي ستيشن وبعد ماخلصوا الاولاد لعب طلعنا وجلسنا في المطاعم حقتهم وكانت جلسات مكشوفة وطلبنا ايسكريم للاولاد وانا عصير طازج كوكتيل ومن محل ثاني طلبنا وجبتين دجاج وسمك مقلي وطلع السمك حار ووجبتين كفتة دجاج محشية جبنة طعمها لذيذ وزوجي طلب سلطة فواكه بالايسكريم....وبعد ماكلنا راحوا الاولاد يلعبوا في المراجيح والزحاليق وانا وزوجي توضينا وصلينا الظهر والعصر جمعا وقصرا....... وبعدين خرجنا من الملاهي متوجهين الى فندقنا........

يوم الخميس10-2-2011 صحيت الساعة 6 صباحا وجهزت الشنط لاننا حنتوجه الى كولمبو وصحي زوجي والاولاد...