¤ ¤ يومن في الثمامه ¤ ¤
بعد ان من الله علينا باالأمطار
خرجت واطفالي برفقه بعلي نرتع ونلعب ونتنزهوا في طعيسات الثمامة
التي لايخفا عليكم ماتحتويه من مناظر خلابه من اكوام البنايات من خرسانات و بقايا حديد وإسمنتوا
بإالإضافتوا الي ذالك
الكميات الهائله من الزبائل من المخيمات المجاوره والمنتشره هناك...!!!!
وبعد ان دارت روسنا من الدوره على مكانون نظيف
وتعالت اصوات الوغدان
( الاطفال )
المطالبه بنزول واصوات قرقره البطون من الجوع تتعااالي
وبعد ان اكلت برطمي التحتي من التحمس
نزل رب أوسرتنا في احد البقاع
وتجادع الوغدان فوق الثرى
ونزلنا قشنا وفرشنا فرشتنا وطقينا رواقنا كي نحمي انفسانا من بصبصه الجيران الملاصقين بنا
( آه يااا هالرواق أتألم لحال زوجي وفلذات كبدي يساعدونه وهو مجتهد ويطق ها الرواق ××يمنع ذكر الفنانين××
وارقب نفسي من طرفن خفي ابشوف هاالجوهره اللي يركب الرواق علشان الناس
مايشوفونه آه ياالربعات شفت عجب خلوني ساكته بس
خلوها جو وتجرح ولا تطلع برا وتفضح )
حطينا المقسوم وتغدينا وانطلق فلذات كبدي بعد ان إمتلأت جعيباتهم باالبشاور واللبين يكيلون الشتائم والكماات لبعضهم البعض ويدحون رؤؤؤس بعضهم البعض باالرمال الذهبيه الملغمه بأنواع لاتوحصي من البلاااوي المتلتله
وبنتي الجميله لولو تطلق صيحات الإستغاثه والعويل بعد ان تلقفت على سنايدها إخوها وقام بدحي قنصوعه باالرمال الذهبيه المبتله بمياه الامطار النقيه
فلم اطق صبرآ وأنا اسمع جعيرها وهي تنادي يمه عندك ؟؟؟؟؟ الطلي يكب على تراب
وتزيد من تعنيفها لي وتقول
وش بك ...!! ماتشوفي ولدك يكب على تراب
عاد ماقدرت اتحمل واثور بعد ان بح حلقي
<< واالولوتاااه >>
واطلق سيقاني خلف ؟؟؟ الطلي
طنق ......طنق......طنق......طنق
وأمة محمد يتفرجون علينا
ويحاول يسحب فيني بس
على مين يابابا
تخصص تسحيبات أمك
وأنا اتعنقط ببلوزته واربط بريك
واشيله واضربه فوق شجر
وادحا راسه تراب وافتح بلوزته واسوي له كمادات باالرمال الذهبيه البارده
واعود لعريني بعد ان اديت مهمتي
وارفع برقعي لاسترد انفاسي
بعد ان حطزت داخل الرواق
______
وأنا أقف بين كل فتره وأخرى لاتطمن على المحيط القريب من عائلتي
وأرئ بعلي يرفع صوته ويؤشر بيده
ياااهيه ... ياااهيه
(( في هذه الاثناء أنا كنت أبوسم بعنف واقول بنفسي ياربي كل هذا غيره ...!! مايبي أحد يشوفن
حتى من ورأ الرواق ))
آه يااصقيقاتي أثاريني لابسه نظاره شمسيه وناسيه إني كاشفه وجهي اشوف الدنيا مظلمه أحسبني متغطيه صرت مثل النعامه تدفن راسها بتراب تحسب ماحد يشوفه
بعلي يااا ؟؟؟؟؟؟ ...!!! ...
( خير وش تدورن ؟ هاه ... كلام بعلي كله مشفر ماراح تلقن له إي كلمه .... بلاش شرافه وخلنكن بسوالفي أنا وفلذات كبدي )
_______
فاصل....
عاد جتن أم الركب عقب هالموقف
وأتحول الي حمل وديع مغير إهي إهي إهي( هاذي ضحكتي من النعومه )
وسم ولبيه
علشان امتص غضبه
لين هداه الله وارجهن
_________
مقتطفات.....
١....كنت أعطي عيالي درس وشلون يحفرون ونسيت نفسي وصارت الحفره عميقه
وطبعآ اترك لكم تصور الشكل
وأنا منزله راسي وايديني بالحفره
وباقي الجسم مرفوع
ولما خلصت المهمه
وعيت لنفسي وصرت اتلفت يمنه ويسره
الا الرجال اللي جنبنا واقف
عقبها رجعت لرواق وانا ازحف من الفشيله
٢.... بطاطس الوغدان التهمته وأنا اراقبهم واهم يسوقون الدبابات
رجعوا يلحسون الأكياس الفارغه
______
٣.... جلست اكور اكوام تراب المبلول علشان اكيل لعيالي الضربات اذا مروا من عندي
تقول اطفال الحجاره
حاميه تجديع واللي تجي بعينه ويقعد له صريخ
واللي ......
واللي
وإذا صوبته غزيت كراعي من الضحك
آه بس خلوها على الله بس
الله لا يولينا ولية مسرف
______
٤.... وإذا شفت بعلي بغا يتمشي
على رجوله
( عاد تشتغل الغيره عند السندريلا )
فأدخل ايديني بقزازه السياره واهي مفتوحه واحط رجولي على الرف اللي نرتفع عليه اذا جينا نركب واتدودل يمين ويسار
( عاد يرجع المسكين يابنت الحلال ماينفع كذا الناس يمينا ويسارنا
واجاوبه بكل برأه ماحد يشوف اتدرب وانت بتروح تمشا وانا ظايق صدري )
<<<<<---(مذهوبه الحيل حيليه )
وبعدها يهون ويجلس يحرس الشووووبهه ههههه
________
٥.....ياحب البنات لدبابات وركوبها
أحسهن مفجوعات
أهم شي عندهن ان الوحده تركب على شي يتحرك لو هو دنينه بدون لصتك
أجل دباب صغير حاطزه عليه وحده كبر حجم الدباب ثلاث مرات
لا وعنده من روحه كيس وخريطه
تلفت وتناظر خلق الله وتخيل نفسه إنها سوت شي ماسوأه احد من الخلق
وكأنه داخل قمره قياده طياره
والأمر والأدهئ
إذا جنك ثنتين فوق دباب وربي أحس إن الدباب بتنفك كفراته ويروح كل كفر لجهه
ويبقن هن فوق جرم الدباب يطحسن برجليهن:upsidedow
_______
٦....موقف جيرانا بالموقع
راح ولدهم يجيب لهم دبابات
يوم إنه أقبل تفرقعن من الفرحه تقول ذره بوسط قدر
ويشرن بيديهن
تقول مضيعهم ولقووه
بس ناقص ينشدون طلع البدر علينا
أنا وقفت من وراء الرواق (والله من الشرافه)
ابشوف ليه كل هاالوناسه تعتريهن ( لاتنسوا ترا الدبابات قطع صغير حقه اطفال لا يروح بالكم للبانشي)
ركبوا الأولاد وجايبين الطبلون
وهن يتشغمرنهم يبن يركبن
وكل بزر ركب له وحده
من الفتياات
المهم
هذاهم طايرين بهن بين السما والأرض
وعبياتن منتفخات والوحده
منهن متعنقطه بالوغد
(اتوقع اعمارهن ثانوي ووحده يمكن بالجامعه بنيت التوقعات على حسب ازوالهن هن اربع )
المهم
ركبت وحده مع واحد من الوغدان
ومروا من عند امهم الموقره
وتشيش الأأم ووتجلس تعزز للوغد وتشر بطرحتها
طر ياعايض...... طر ياعايض
والبزر جاب طبلونه
آه يابنات أنا خلاص نشف الدم بعروقي واقول لزوجي شف شف مسرع بقوه
قال زوجي والله إن ينقلبون وشلون يخلون البزر يسوق
وفعلآ انقلبوا والبنت أحسها ماتت من الفشيله
واهي تجمع نعالها وتنفض عباتها وجت لهم تعرج
بس وش السوات ( يديك أوكأت وفوك نفخ )
حسيت بقشعريره تسري بجسدي
والأم الحبيبه مازالت تعزز لفلذات كبدها وهدفها ان ترجع
لمنزلها باكبر قدر من الإصابات:11retcher
______
٧..... جيرنا من الجهه الثانيه
يلعبون كوره طايره
وفيه ثنتين حريم درابي وفي روايه دربيات
يلعبن معهم ووحده منهن تحمست فوق المطلوب
وصارت تناقز تقول قعرتن ماخوذن منه حبه رز
وترفع العباة
وتعالوا شوفوا الشكل عاد ( أنا عن نفسي تحسفت بهن كان شكلهن وقور بس الشكوى لله )
_____
اشتد البرد مع غروب الشمس
وودعنا الثمامه وسلامتكم
انتهاء ...
ليله الجمعه ساعه ٢ صباحآ
أختكم ..... طيبه قلب
الله يهنيك كان عاد عزمتونا معكم كود نونس بعضنا مع الوغدان ههههههههه