اليوم حابه اكتب لكم عن طريقتي في الاهتمام ببشرتي ..
البشره الجميله الخاليه من التجاعيد والتصبغات والحبوب والأثار ماراح تجي بدون اهتمام وعنايه حتى لو كنتي تمتلكين بشره رائعه وصافيه وذات رونق ونظاره بدون الاهتمام والمحافظه عليها ماراح تدوم لك هالبشره ..
روتيني بسيط مافيه تعقيد وخزعبلات وخرابيط البنات . اللي للأسف صدمت انه في لحد الان بنات يعملون خلطات صابونيه لبشراتهم ولأجسامهم يارباااه .. خافوا الله في انفسكم فيه احد يبشر صابون على صابون علي صابون وزيوت وكريمات وماأعرف ايش وتحطينه بوجهك ليش يابنت ليش بتقولين تبين بياض ؛ رونق ؛نظاره ؛ وتوحيد لون .. ابشرك بالخرابيط هذي ماراح تحصلين على هالبشره .. بتقولين جربناها وصرنا واو بقولك استمري سنه سنتين وحطي على هالبشره صابون ورا صابون وشوفي بشرتك بعدين وش راح تكون .. الموضوع في هالكلام يطووول شرحه ( إذا حابين افرد لكم موضوع اتكلم فيه عن هالخصوص )
نرجع لروتيني
في البدايه لازم تعرفون انك تغسلين بشرتك بغسول وخلاص ماينفع أو إنك تغسلينها وتستخدمين التونر بعدها برضو ماينفع الأمر يعتمد على ثلاث اشياء رئيسيه ( الغسول - التونر - المرطب ) فيه اشياء أخرى تستخدم إذا حابه عنايه افضل أنا اشوفها جدا مهمه
نبــــــدأ
جهــــاز foreo luna mini
الجهاز اصدر حديثا تقريبا في عام 2013 من السيلكون .. عند تشغيله تحصلين على ذبذبات تساعد على
تنشيط الدوره الدمويه والتقليل من الرؤوس السوداء يقوم على تقشير سطح البشره ويجعلها نظيفه وصحيه
أجمع البعض على انه افضل من جهاز كلاريسونيك بحكم ان الكلاريسونيك يتطلب تغيير الفرشاه كل 3 اشهر ويعتبر استنزاف للأموال .. اضافه ان فرشاه الكلاريسونيك فرشاه نايلون فيلقط البكتيريا .. واضافه اخرى إن الفرشاه مو ناعمه حسيت اثناء استخدامي لها بخشونتها شوي بعكس جهاز الفوريو جدا جدا ناعمه بحكم انها سيلكون
( وبرغم هالكلام كله مايمنع أن جهاز الكلاريسونيك جيد وفعال في تنظيف وتنقيه سطح البشره .. الجهاز عندي وسبق تحدثت عنه في موضوع سابق .. بس لاضير من اقتناء جهازالفوريو وحبيته كثيير وارتحت عليه ( الجهاز فيه منه احجام عاديه واحجام صغيره mini وللرجال والنساء . اللونا ميني زي ماانتوا شايفين فيه جهتين للتنظيف .. بالنسبه للونا العاديه جهه تنظيف وجهه للتجاعيد ) ( اتمنى تقرون عنه )
طريقه استخدامه من ضمن الروتين ( تغسلين يدينك أولا بعدها وجهك وتحطين اي غسول انتي مرتاحه له ويتلائم مع نوعيه بشرتك
وتستخدمينه على بشرتك لمده دقيقه واحده .. بعدها تغسلين بشرتك وتمسحينها ايضا بأي تونر إنتي مرتاحه عليه
راح اتكلم شوي ع تونر الشاي الأخضرمن لش ..
من افضل التونرات اللي جربتها في حياتي قد ايش رائع وناعم على البشره أثناء استخدامي له ماحسيت باي حراره أو لسعه في بشرتي .. بعكس تونرالشاي الأخضر من بودي شوب يلسع ويسبب حراره على البشره بس برضو حلو .. بالنسبه لتونر لش انصح كل بنت ذات بشره دهنيه أو مختلطه خصوصا بشرائه جد جدا رائع وراح يناسبكم إن شاءالله
بعدها تستخدمين الكريم أو السيروم المرطب على حسب نوعيه بشرتك
أنا بعد الكريم استخدم هالسيروم من اميج .. حتى يساعد على امتصاص الكريم ويكون اكثر فائده لكل اللي عملته هو عبارة عن مجموعة من فيتامينات A.e.c التي تعتبر من مضادات الأكسدة ، بحيث يقوم على ترطيب البشرة وتقليل علامات الشيخوخة وهو مثالي لأولئك الذين يعانون من الجلد الجاف أو تلف بالجلد بسبب العوامل البيئية القاسية، والإجهاد، والتدخين أو التعب. وأولئك الذين لديهم حساسية الجلد والأكزيما و الوردية.
بعدها استخدم سيروم للعين من سيتريكس يحتوي على فيتامين (C)وخلاصه الشاي الأخضر يعمل على تخفيف الهالات السوداء ويمنع التجاعيد هالكلام مكتوب على العلبه ( بالنسبه لي ارتحت له وحسيته يخفي الهالات مع ان هالاتي خفيفه جدا لكن بعض الأحيان تطلع لي نتيجه ظروف الحياه من قله نوم وووو
طبعا موكل يوم استخدم هالسيروم في اوقات احس انه مااحتاج له .. وتحسين بعض الاحيان بحاجه لترطيب الجفن فاستخدم مرطب العين من يوسيرين
الكريم لترطيب عميق وهو بالفعل كذا جدا رائع ويستحق الاقتناء .. اساسا هالشركه رائعه لكن للأسف ماعليها اقبال كثير عندنا ..
أخر شيء ترطيب الشفايف بعد تقشيرها سواء كان بزيت زيتون وسكر أو تقشيرها بواسطه فرشاه
أنا اقشرها حاليا بواسطه مقشرسكر من لش ريحته جدا رائعه تقشيره مايختلف عن تقشير السكر وزيت الزيتون يعطي نعومه وتقشير للجلدالميت .. طبعا هالخطوه تكون اثناء تنظيف البشره
هالمرطب حليو للشفايف .. ترطيبه حلو ويستمر لساعات
هالمرطب برضو حلو يعطيك احساس فكسي ويشعرك بالبروده ..
هالمرطب جدا جدا جميييييل ترطيبه رائع احطه قبل ماانام واصحى وشفايفي جدا مرطبه .. كل مااخلص ارجع اشتريه يحتوي على شمع العسل وحبه البركه ..
وقت احس بشرتي بحاجه لشوي تقشير زياده استخدم هالكريم المقشر بأحماض الفواكه سبق وتكلمت عنه بموضوع سابق من جلايكولكس
وبس خلصنا ..
بالنسبه للأسعار
جهاز فوريو لونا ميني : 620 اما سعر العادي تقريبا 900 - من تاجره بالانستقرام باامكانكم تطلبونه من موقعه الرئيسي .. سعره مايتعدى بالكثير 600 وسعر العادي تقريبا 900 .. انا شفت تاجره تبيع الميني ب 900 مو حرام بالله فاانتبهوا ينلعب عليكم
سيروم اميج : 210 من صيدليه آدمه
سيروم العين من ستريكس : 195من صيدليه أدمه
سيروم العين من يوسيرين : 100من صيدليه النهدي وموجوده باغلب الصيدليات الكبرى
التونرتبع لش : 46 تقريبا
مقشر الشفايف تبع لش : تقريبا 60
مرطب flexitol : تقريبا 15موجود بالصيدليات والسوبر ماركات
أما مرطب بيزلين ب 13
مرطب ب40 kelyane HD
أتمنى اني مانسيت شيء
دمتم سعيدات ..
سلمتِ ماقدَّم