زواج وطلاق

السلام عليكم ورحمة الله وبركاته ،،،
هذي مشكلة صديقتي إللي مأرقتني وأبغي أشوفها لها حل لأنها عزيزة علي كثير
واللي راح إترد علي أنا أشكرها مقدما والله يجزيها كل خير .

تتمثل مشكلة صديقتي في إنها كانت إتحب ولد عمتها من يوم كانوا صغار ، ولما كبروا راح وخطبها أكثر من مرة ولكن أمها كانت ترفض بحجة إنه من دولة خليجية ثانية وهي ما تتحمل إن بنتها تكون بعيدة عنها ، وكان الشاب هذا شاب طيب وخلوق بس إمكانياته ماكانت إتساعد على إنه يتحمل مصاريف الزواج في هذاك الوقت .
المهم إنهم رضخوا للأمر الواقع وكل واحد راح في طريقه ، واتزوج ولد عمتها من زميلة له في العمل وجابوا أولاد والله فتحها عليه وصار ميسور الحال وعنده شغله الخاص إلى جانب وظيفته .
وصديقتي تزوجت أخو صديقتها وكان مدمن ويشرب وياخذ فلوسها وما يهتم فيها وكان عاطل عن العمل ، ما أدري كيف وافقوا عليه ؟ المهم إنها تزوجت وعاشت في معاناة مع أهله ومع زوجها ، والزوج هذا إنحكم في قضية مخدرات وكان حكمه أربع سنوات .
طبعا صديقتي تألمت وقالت الحمدلله على كل حال وهذا نصيبي وما أقدر أعترض عليه ، وزوجها وعدها إنها إتكون آخر مرة وإنه بيتوب وبيصلح من حاله ، ساعات إتكون عندها ثقة فيه وساعات إتقول هذا ماشي في هذا الدرب ومستحيل إنه يتركه .
بس قالت في النهاية بعطيه فرصة ثانية يمكن ينصلح حاله والهداية من رب العالمين .
وفي يوم ولد بنت عمة صديقتي كان في زيارة هو وعايلته لبيت أمها وشافها هناك وحس إنها متضايجة فعطاها رقمه على أساس إنه يعرف شو فيها ، المهم إتصلت فيه وقالت له كيف هي تعبانة ومتضايقة من زوجها ومشاكله ، فعرض عليها إنه يتزوجها لأنه بعده يحبها وهو قادر إنه يوفر لها كل إللي تتمناه ومستعد إنه يفتح لها بيت ويسجله باسمها ويدفع عنها كل ديونها المهم هي محتارة وهي في نفس الوقت متأكدة إن ولد عمتها ما يكذب عليها خصوصا وإنه إنسان ملتزم غرضه شريف ما يعرف الحرام أبدا لأنه عانى كثير في حياته وهو يحب صديقتي كثير حتى كل العائلة تعرف بس الظروف هي إللي حرمتهم والنصيب هو إللي حرمهم من بعض وهو ينتظر ردها ومستعد إنه يتزوجها في الحال ، وخصوصا وإنه إعترف لزوجته قبل إنه كان يحب صديقتي وإنهم كانوا لبعض بس الظروف فرقت بينهم .
وكان دايما يقول لزوجته إنه يبغي يتزوج وحدة ثانية علشان يزيد من النسل ويكون له أولاد كثير وهو ما يحب الحرام أبد .
فما ما أعرف شو الحل وصديقتي محتارة كثير ، علما بأنها صلت صلاة الاستخارة أكثر من مرة وشافت أشياء حلوة كثير في المنام تبشر بالخير .
فدلوني على حل أساعدها فيه ؟
مع الشكر مقدما لكل وحدة إترد علي .