زوجك بيسافر .. وأنتِ اللي بترتبين الشنطة .. يا ترى ايش محتوياتها؟

حبيباتي في الله ..

نبغى من كل زوجة تقول لنا عن شنطة سفر زوجها وعلى إيش تحتوي هذه الشنطة ؟؟
وخصوصا غير الأشياء العادية المتعارف عليها ... وببدأ بنفسي ..

أولا لازم نستغل التطور إللي احنا فيه ؟؟؟ كيف ؟؟؟ اقولكم ..
يعني الكمبيوتر مثلا .. انا قبل سفرات زوجي اكون طابعة قائمة بالأغراض والمحتويات اللي لازم تكون في شنطة سفره .. واحملها وأدور بالبيت واجمعها والناقص اشتريه قبل بوقت .. وبذلك أكون ما نسيت شيء .. يعني لازم قائمة مطبوعة موجودة دوما في جهاز الكمبيوتر الخاص بكِ أو ورقة موجودة في ملفاتك ..

ثانيا .. الشنطة لازم تحتوي على أشياء غريبة شوي بس كثير :) يعني:
أنا دوما أحط له بين أوراق الشغل مواضيع مختلفة حلوه اطبعها بالبيت من الانترنت علشان يتسلى فيها وقت فراغه بالفندق أو بالطائرة .. وبعد في كثير من الأحيان أكتب له رسالة أعبر فيها عن حجم الشوق اللي بشتاقه له طول فترة غيابه .. وكمية الفراغ اللي راح يتركها بعد سفره .. وصدقوني بتجيب نتيجة فتاااااااااكة ..

ثالثا .. أحط بين أغراضه (قميص نوم) من قمصاني وأملاه بالبارفان اللي يحبه علي !! لا تستغربي تراه بيطلعه في الفندق ويحضنه لي نام .. ويذكرك .. ومو بعيدة يتصل عليكي نص الليل .. يهامسك ويتغزل فيكي وبحركتك :)

رابعا .. بين أغراض (الحلاقة مثلا أو مشطه ) .... الخ يعني مكان أضمن إنه بيشوفه كل يوم في الفندق أحط كلمة بسيطة مطبوعة على شكل قلب أو بخط يدي أقوله فيها إني أحبه وانتظر رجعته بفارغ الصبر .. علشان يستعجل ويرجع مو يخلص الشغل وتحلى بعينه السفرة ويقعد هناك يستانس بروحه لالالالالا .. لازم يرجع وإن ما كان على الموعد قبل الموعد بعد، وإنت وشطارتك .. :)

خامسا .. وهذا قبل كل شيء .. ذكريه بالله وإدعي له .. وحطي في الشنطة نسخة من القرآن الكريم وحطي عليه ورقة صغيرة ( لا تنسى تلاوتي ) فأنا من يحفظك من الشيطان ووساوسه وغوايته في بلاد الغربة ..

سادسا .. لا تنسي سجادة الصلاة ومسباح وورد اليوم والليلة .. حتى يحفظه الحافظ بحفظه..
وإن كان مسافر في ديرة ما فيها صلاة ولا مساجد يعني ما راح يعرف الوقت انا عندي لك طريقة :
من المواقع الاسلامية على الانترنت بإمكانك أن تطبعي مواعيد الصلاة ومواقيتها حسب المدينة اللي بيروح لها وحددي فترة سفره وعطيه ورقة مطبوعة بتلك المواعيد وذكريه فيها وقولي له بعد إن بغيب أنا أرن عليك الجوال أو الهاتف بالاوتيل وصحيك من نومك لصلاة الفجر أو أذكرك بباقي الصلوات ولكِ الأجر إن شاء الله .
أو بإمكانك شراء (ساعة الفجر) من أي مكتبة إسلامية وهي اللي بتصحيه وبتنبه لمواعيد الصلاة في تلك البلاد .. يعني مو مسافر ينسى الصلاة أو إنتِ تنسين لالالالالالالالا.. تراها هي الحفظ الحافظ من الحافظ رب العالمين .

أخيرا وليس آخرا، اكتبي قائمة بالأغراض اللي تبغينها لكِ ولأولادك أو بيتك من مكان سفره ، ولكن لا تكثرين تراها كلها مصاريف زايدة .. وبآخر القائمة قولي له ( إنك تحبينه .. وإن كان عندك وقت .. أو لك خلق لا تكلف على عمرك .. تسوق لنا بهذي القائمة ) وإن ما جبت أي شيء منها .. ترانا نبقى نحبك .. وردتك لنا بالسلامة هي أغلى أمانينا ..
وصدقيني بيجيب لك زود عن القائمة .. وبيكرمك آخر كرم ....

زوجي البارحة رجع من السفر بحمدالله .. والله يا جماعة الخير .. أحرجني بكرمه .. إني صرت خجلانة والدم يطفح من خدودي ماني عارفة كيف أشكره .. على الأشياء اللي جابها ..

نصيحتي لكن بنات حواء .. حبيباتي في الله ... أطيعي زوجك .. والله ثم والله ثم والله .. إنه الدنيا كلها بتصير غيييييييييييييييييييير .. وبتحلى وتصير أحلى .. الطاعة ياجماعة هي أساس السعادة الزوجية ..
وهالشنطة الصغيرة اللي بدينا فيها الحديث هي مفتاح من مفاتيح هذه السعادة، ولو لبرهة من الزمن .. ولكنها بالتأكيد سارية المفعول .. ولكِ فيها الأجر عند كريم ما ينسى عباده .. هو رب العالمين ...

اسفة على الاطالة ..
وإن كان عندكم إضافات وأنا متأكدة من هالشيء .. لا تبخلون علينا ... وجزاكم الله الجنة.

اختكن/ زعفران