زوجه بالاسم بس .. اول مره اكتب بهالقسم

السلام عليكم

انا يابنات متزوجه من 6 سنوات وعندي طفلين .. وممشيه حياتي عادي وصابره واقول هذا نصيبي

بس الحين مع الحمل صايره نفسيتي زيرو وكل شي كنت متحملته قبل الحمل الحين مع الحمل احسه

صار شي كبير ولايطاق ونفسيتي تعبت بس ابكي

احس اني متزوجه ومو متزوجه احيانا احس اني جالسه مع اخوي او ولد الجيران او أي احد الا زوجي

ماني عايشه مثل الحريم الي اسمع واشوف .. صارت مشاعري بارده تجاه زوجي وصرت أي وحده

تقول لزوجها حبيبي الله يخليه لي الله لايحرمني احسها تكذب او تددلع وتتصنع

لاني مو عايشه هالتفاصيل ولااحس بهالمشاعر

زوجي طيب نوعا ما .. بسسسسسسس !!!!

انسان مهمل بشكله ونظافته ووزنه سمين .. وانا العكس تماما نظيفه ودايم ريحتي حلوه وموسوسه بالنظافه لدرجة لو اموت من الجوع مااشتهي اكل مطاعم

فوق هذا كله زوجي يتقرف مني ومن عياله بشكل مامر علي زوج او اب يتقرف من اطفاله وزوجته

يعني لو اتكلم معه او انام جنبه يحط يده على وجه عشان مايوصله انفاسي مع اني افرش واستخدم مضمضه كل يوم

بالمقابل هو يجيني بروائح الله العالم فيها ومااقرف منه انا اقول زوجي ..

تونا شباب اعمارنا ماوصلت الثلاثين مانعرف شي اسمه بوسه لو حتى عابره لو حتى بس بالشفايف

يمكن تقولون هالموضوع تافه وعادي بس انا احس هالشي خلاني بعيده عنه

مافي بيننا ميانه احس اننا رسميين مع بعض نفسي يحسسني باانوثتي وانه مو قرفان مني

كلمته كثير يقول هذا انا وهذا طبعي .. تفكيره بنفسه وبس مايهمه انا وش احس ووش ابي

حتى مسكة الايد واحنا طالعين مستحيل يمسك يدي ولو انا مسكته يبعد ويهاوشني .. حتى كنا مسافرين مره برا المملكه واشوف قدامنا كثير عرسان وغير عرسان ماسكين يد بعض ويمشون سوا متبسمين

انا حرمه طقتني الغيره حبيت احس باحساسهم واسوي مثلهم رفض وصار يمشي بعيد عني يقول اخاف اشوف احد اعرفه

واذا شفت احد تعرفه طيب انا زوجتك ماني خويتك !!

حتى العلاقه الخاصه هو ياخذ الي يبي ويقوم مايفكر فيني نادر جدا اكون راضيه واحيانا ارضي نفسي بنفسي مافي مداعبات ولامقدمات ولاتمهيد يقرف من كل شي مايبي يلمسني اصلا


حتى ماديا وعاطفيا بخيل مافي هدايا الا لو انا حنيت وزنيت عليه ولو جاب ماتتعدا 100 ريال مع ان وضعه المادي كويس بس يستخسر فيني

مناسبات تمر بيننا من غير هدايا ولا بوسات ولا أي شي

حامل ينزلني لحالي اقضي للبيت وادف عربية الاغراض وهو رايح يتعشى بالمطعم واذا خلصتي اتصلي علي

ووش اكتب ووش اخلي اشياء كثير بقلبي كاتمتها مو قادره اقولها لااحد

والمشكله اني لو قلت له خلاص ماابيك ودني لااهلي صار زي الطفل يترجاني اجلس

احيانا اقول يحبني ..بس مايعبر لي عن حبه انا وش مستفيده منه

احيانا كثير اقول والم النت المحادثات وكلام الحريم خرب بيوتنا

مو زي قبل الوحده ماتعرف شي شي وترضى بالي عندها

الحين تقرين وتشوفين وتسمعين وتحسين انك بعالم غير الي الناس عايشه فيه


ودي احب زوجي ودي اعشقه ودي من قلبي اقول الله لايحرمني منه والله يخليه لي

بس هو مايخليني بتصرفاته الجافه معي احسه شخص عادي اذا راح راح واذا جا جا

بختصار ماني حاسه اني زوجه وحبيبه احس اني ام عياله وخدامه له تنظف تغسل تكوي تطبخ وتفرخ عيال

بس ماني انسانه لي مشاعر لازم يراعيها .. كلمته لين مليييييييييت والكلام ماجاب نتيجه .. وبنفس الوقت عقب هالعيال الطلاق مو شي سهل ابد

بس مليت وصبري بدا ينفذ


واسفه اني طولت بكلامي بس حبيت افضفض بعد كل هالسنين