زوجي الظالم

السلام عليكم
بدخل في الموضوع على طول
دايما بيني وبين زوجي مشاكل على اسباب تافهة تعبت منه
ودايما يقلل احترامه
واليوم طفح الكيل عندي
قلتله امس تعال مشينا عشان اليوم الوطني وقال حيجيني 9 الليل ويمشيني انا وبنته صار لنا اكتر من 10 ايام محبوسين في البيت جاتني كأبة من جلسة البيت
المهم ان ماجا الا 12 ونص وطبعا زعلت منه وهوا راضاني والمشكلة انا من النوع اللي ارضى بسرررعة
مجرد ما يكلمني حتى بدون اعتذار على طول ارضى وطبعي هذا اكرهه لان هوا عارف ان كل ما يزعلني سهل ارضائي
واليوم قلتله مشينا اليوم ومارضي فجأة قلب علي
وقال هرجك لا يكتر ولا تخليني دحين اغلط عليكي
قلتله اصلا متعودة على انك تسبني وتغلط علي وتقلل احترام
قلتله طيب ما تبغى تمشيني وديني عند اهلي
قال جهزي اوديكي
هو زعلان لان امس بنات اخته اكبرهم عمرها 13 سنة كانو يبغو يجو لان امهم ماتقدر تجي لانها في العدة زوجها اتوفى في شعبان
وانا امس مانمت ابدا لاني تعبت مع بنتي لانها مريضة
وكنت على اساس اخد غفوة بعديني يجيني ونتمشى
بس اخته دقت عليه وقالتله ان بناتها يبغو يجوكم وانا والله اني تعبانة لازم اخد غفوة وما اقدر استقبل احد
وزعل مني بسبب هذا الشي عشان كدا اليوم انفجر فيني
وراح ورجعت دقيت عليه وقلتله يا تمشيني يا اروح لاهلي وقليلة حياء ومدري ايش قلتله المفروض اختك تدق علي وتستأذن بعدها يجو بناتها قالي ايش قلة الحيا هذي وانتي ايش دخلك ماتستحي على وجهك بيتي وغصبا عنك يجو في الوقت اللي هم يبغوه وهم قالولي ويكفي هذا الشي المهم وقال كلام كتير
وبعدين قلتله ليش مين يضيفهم انا ولا انت ويجلسو مع مين انا ولا انت وجاء يبغى يغلط كمان وسكيت السماعة في وجهه
ودقيت عليه الساعة 10 ونص الليل وقلتله تعال وصلني عند اهلي ابغى ابات عندهم يومين قاللي دقي على ابوكي ولا اخوكي يجو ياخدوكي قلتله اتعوذ من الشيطان وتعال نتفاهم
قال ماني جاي
قلتله متى تجي قال الساعة 2 ىفي الليل ويكلمني باسلوب زي وجهه
وقلتله اذا ما جيت توديني اخلي سواق يوديني قالي لو رحتي مع سواق لا ترجعيلي
وبعدها سكرت وقلت والله العظيم لاروح ودقيت على اخويا بس كان عنده دوام واضطريت اروح مع سواق صحبتي وانا دحين عند اهلي اجلس عندهم يومين كدا وارجع الين ماتهدا النفوس ويمكن يتأدب ويبطل يقلل احترام لي بس ما اظن ان حيصير هذا الشي
وقبل سنة تقريب زعلت ورحت لبيت اهلي لمدة اسبوع ولا اتصل ولا سأل ولا اي شي وكأنه ماصدق
وكنت عروس وحامل كمان
ودحين صارلي سنة ونص متزوجة وعندي بنتي عمرها 11 شهر
كيف اتعامل مع البني ادم هذا
وكيف اتصرف
مع العلم ان التطنيش ماينفع معاه ابدا لاني جربته لو طنشته شهر يطنشني سنة
انتظر ارأكم بنات
طبعا هو ما يعرف اني رحت مع سواق لو عرف حيطلقني لان رافض نهائيا اروح بتاكسي او سواق حتى مع اهلي اجل كيف لو عرف اني رحت لحالي