زوجي بيطفش من البيت والسبب ............ الاولاد

ياربي الله يعينك 3 اطفال وكلهم تحت 5 سنوات

ماادري بس واحد ويالله نلحق عليه

اسمعي يالغالية هالكلام اللي راح أقولك إياه أحاول قد ما أقدر أسويه مع عيالي ومرات تصيب وكثير تخيب...لكن وش أسوي؟؟ لازم أحاول...والله اللي يعين.....
إنت تقولين عيالك أعمارهم 4 و5 سنوات يعني يفهمون عليك وش تبين ...غير لما يكون عمرهم 2 أو 1 أو اقل....فاحمدي ربك...ولازم تستغلين هالفهم لصالحك....
يعني أول الأمور اللي على طول لازم وحتما ولابد تتغير وقت نوم وقومة عيالك....( أنا كنت مثلك ملخبط نومهم وقومتهم لكني تعبت كثييييييييييييييييييييير ) فالحل الأفضل والممتاز بعد هو تنظيم نومهم وقومتهم...لاتقولين هم صغار مابعد دخلوا مدارس ليش أعذبهم...لا...لازم ينتظم نومهم حتى هم وإنت وأبوهم ترتاحون ....
يعني حاولي تقومينهم بدري شوي عن وقت قومتهم المعتادة...ويوم عن يوم بتلاحظين نومهم بيتعدل...لكن لاتيئسين..ولما ينتظم النوم لاتخربينه...حذاري.....
وتنظيم نومهم له فوايد ماتتخيلينها...منها إنه اجسامهم تصير صحية أكثر لأن نومهم راح يكون في الليل وهذا هو المفروض....وبعدين نفسياتهم ولعبهم راح يكون متغير منشرحين ومبسوطين لأنه سبحان الله قومة الصبح ( 8 أو 9 ) تشرح صدر الواحد وتفتح نفسه للفطور..ثم في الظهر مشتهي يتغدى.....ولما تجي الساعة 10أو9 أو 11 في الليل بتلاحظينهم دايخين يدورون السرير...
وبكذا بيكون لك وقت مع زوجك تقعدين معاه لو ساعة وحده بعد نومهم وقبل ماتنامون إنتم ...بركة.....
وبعدين ترى عيالك كبار علميهم إن مرفوض تشغيل الكمبيوتر والتلفزيون في وقت واحد!!!
وعلميهم السبب علشان مايعاندون يظنون إنك بس تبين تخربين عليهم ( لاتستغربين ترى العيال أحاسيسهم فوق مانتصور!!!)..
وقوليلهم أبوكم قال كذا واللي راح يخالف هذا الأمر راح يعاقب بحرمانه من الآيس كريم أو الحلاوة الفلانية..أو طلعة التمشية..أو شراء لعبة....وانتبهييييييييييييييييي لازم تورينهم فعلا هذا العقاب يعني تورينهم إنه عندك صحيح حلاوة مخبيتها وتبين تعطينهم إياها لو طاعوك...وقيسي على كذا باقي أنواع العقاب اللي تقدرين عليه.واحذري تكذبين عليهم أو توعدينهم بحاجة ماراح تسوينها ترى راح تهدمين ثقتهم فيك..وتخربين مصداقية الثواب والعقاب..بس بقولك لما تشوفين الولد مررررررره نادم وخاطره موت يطلع معكم أو نفسه موت بالحلاوة مسكين لاتحرمينه لكن قولي له لما تروح تعتذر من بابا وتوعده ماراح تسوي مثل الغلط اللي سويته مرة ثانية راح يسامحك وتروح معانا .ورتب اللي بعثرته أو لم الأوراق اللي رميتها....وعطي أبوه خبر قبل إنه يسوي نفسه زعلان شوية ومايرضى بسرعة...لكن الأطفال مساكين لاتحرمينهم...وإنت عاد قدري الأمور بقدرها وشوفي اللي ينفع مع عيالك.....
أماالأشياء اللي مفروض تتعدل هي تشغيل جهازين مع بعض...رمي مخلفات الأكل وين ماكان..
الصراخ ( بس تغاضي شوي لما يكونون متحمسين بلعبة معينة أو مغامرة شادتهم..) لكن لاتخلين الصراخ هذا يستمر...
الهواش على اللعب ..المنازعات والمضاربات...الألعاب مرفوض إنها ترمى في كل مكان واللي ماراح يستجيب راح تاخذين لعبته اللي هو راميه وتصادرينها....الفوضى...رفض الاستحمام....
............
شوفي ياغالية...
أنا عارفة إن هذي الأمور ماهي سهلة....( وأنا أقولك تراني قاعدة أحاول قد ما أقدر أنظم سلوك عيالي عليها ومثل ماقلت لك مرة تصيب وياكثر تخيب...) لكن استمري...وبإذن الله ماراح ربي يضيع تعبك..لكن الصبر الصبر الصبر.....( وهذا اللي ما أقدر عليه أحيانا وأفقد أعصابي واضربهم ) لكن بعدين أتحسف!!...
أما مشكلة بنتك الصغيرة اللي تصيح وتسهرك طول الليل...فأقولك اللي نصحتني فيه وحده الله يحرمها على النار وحبايبها...نصحتني إنه أعود الرضيع من يومه في نهاية الأربعين على إنه ماينام بعد الساعة 8 الليل ليما تجي الساعة 11 ثم تعطينه رضعة مشبعة وراح يتم نايم 3أو 4 ساعات ( وهذي نعمة عظيمة لو تلقين تنامين 4أو 3 ساعات متواصلة وإنت عندك رضيع ....)
وشوي شوي مع كبر عمر الطفل تعودينه يظل صاحي أكثر من بعد المغرب ليما 10 أو 11 في الليل علشان يطول نايم ...وترتاحين...( لكن نصيحة من تنام بنتك حاولي تنامين على طول علشان ترتاحين أكبر وقت ..ولاتقولين عندي أشغال بأسويها فرصة نومة الصغيرة...لا ..ارتاحي قبل).....
وبهذا كله بإذن الله ترتاحين....
ولاتنسيني ولاتنسين بعد من نصحتني بهذي النصايح اللي كتبتها لك من دعوات صالحة بظهر الغيب ...والله يوفقك...ويالله وري زوجك إنك تقدرين تحكمين الوضع تمام........

ليش ما تستخدمي معاهم أسلوب التشجيع والمنافسه :39: ..مثلاً تعلقي جدول في مكان أمامهم بالصاله وتكتبي فيه أسمائهم والأمور اللي تبغيهم ينفذوها(النظافه-الهدوء-..)
<<ولاتكثري عليهم>> واللي ينفذ أمر أرسمي له نجمه واللي يجمع أكبر عدد من النجمات كافئيه بشبس أو حلاوه ..ولاتتركي هذه الأشياء بين يدهم طول الوقت..ولاتقولي أبغى أسكتهم بالعكس إذا زاد إزعاجهم إحرميهم من الكمبيوتر
أو أي شيء يحبوه<<وخليك صارمه>> :16: ..
وبالنسبه للمكافئه خليها على فترات(يعني إلى العصر)(وبعدين إلى المغرب)...
ولا تخليهم يسهروا..وإذا سهروا صحيهم اليوم الثاني قبل الظهر..
وحاولي تفهمي أبوهم بهدوء و بطريقه لبقه :33: إنهم أطفال ويحتا جوا تفريغ طاقه(زي السياره توقف إذا فضي البنزين) وخليه يخرجهم :3_10_6: لحديقه مثلاً يلعبوا ويجروا..
ويوميا خليهم ياخذوا دش قبل النوم ومافي مانع إذا حطيتي لهم مويه (بس إنتبهي شوووويييه)) وممكن تلعبي معاهم وتجري أوترمي لهم كوره والشاطر اللي يجيبها..
وأنصحك إذا عندكم مركز صيفي للأطفال سجليهم بلا تردد :2thmup:

حليلج ... الله يعينج بس أنا أحس أنج لو اتشلين عنهم التلفزيون والكمبيوتر أفضل لأنه هالأجهزه تزيد من توتر الأطفال وحدتهم ...

والظاهر انكم انصعتوا لهم بسرعة الطفل بهذا العمر يجرب اهله ويشوف شو اللي يخليهم انفذون مطالبه اكثر الصراخ والا العناد والا عدم الأكل وهي كلها سياسة يتبعها الطفل حتى ياخذ اللي يبييه والظاهر انهم قدروا يسيطرون على الوضع بسرعة عندج ...

لا اتبينون لهم انكم تتوترون من اللي يسونه ... شو ما سوو بيني لهم انه أمر عادي ولا تبالون لهم كلما زدتوا حدة كلما زاد الضيق اللي عندكم وكلما هم تفننوا بمحاولة توتيركم ...

اقطعوا عنهم هذي الأنشطة (التلفزيون والكمبيوتر) ... ركزوا على انشطة خارجية بحيث انه الطفل يفرغ طاقته في تعلم نوع من الرياضات وحفظ القرآن وتلقي بعض التعليم يعني لما يجي البيت يكون نوعا ما مستنفذ ثلثين طاقته ...

خصصوا غرفة للعبهم وامنعوا اخراج هالألعاب خارج هالغرفة ..
لا تتركينهم ينامون وقت متأخر وينشون الظهر ... لأنهم راح ينشون بنشاط كامل وابو العيال في الغالب يجي مرهق يبي يرتاح وعيهم الفجر ودخليهم في أنشطة حركيه عشان اتفرغين طاقاتهم..

امنعوا الحلويات والشيبس والأشيا الضارة عنهم ... إذا رفضوا الأكل لا تجبرينهم عليه الطفل لما يحصل حد يحن عليه فالأكل ما ياكل يبي احس انه مهم فيبي يلفت انتباهكم بعدم الأكل طنشيه لا تعطينه حلويات اذا ما كل لما يجوع غصب عنه بياكل بس لا تتدخلين في أكلهم يعني لا تقولينله كل دقيقة أكل ...

وأهم شي كوني حازمة معاهم بس مش بحدة الطفل لما اترمسينه بحدة وبعصبية يزيد من أسلوب العناد اخذيه بالسياسة والحنية والمدح ولا تقارنين بينهم ابد ...

ولا تيأسين ....

والله ايسرلج ويعينج ... :)

moon321
شقتي غرفتين فقط غرفة لهم وغرفة لي وزوجي وبعد الغرفة ضيقة ما تصلح يلعبوا فيها

ياربي شكثر اعاني
اي والله الوضع متعب لاخر درجة


الباب المفتوح
ان شاء الله بس اقدر انظم نومهم .... وبالنسبة للمكافآت والعقوبات فأنا اتبع معهم هذا الاسلوب ولكن احيانا بس ما يفيد .. البنت احيانا بكم دمعة تستعطفني والولد يتحداني
ويهددني لما اخبره اني راح احرمه من شي ... واذا اقول لهم اني برمي العابهم المرمية في الزبالة يقولوا عادي عندنا كثير

**نور الإسلام**
بالنسبة للجدول اتبعت معهم من قبل ولادتي جدول الاخت بنت زايد ولكنه ما عدل اي سلوك عندهم وبعد ما استشرت الاخوات في المنتدى قالوا ان اولادك صغار على الجدول........ والثواب والعقاب اطبقه ولكن ما في نتيجة حتى الحبس الا اكثر البنات يقولوا نافع انا اسويه
لكنه ينقلب علي

شفا المجروح
انت صادقة يمكن مثل ما قلتي انصعنا لهم بسرعة وكان على بالنا ان الهدوء بيكون بانشغالهم بالكمبيوتر والتلفزيون لكنه صار بالعكس

شكرا لكم جميع على الرد والله يعينا على تربية ابنائنا تربية صالحة سليمة من دون مشاكل