زوجي دايم يقلل من قيمتي

السلام عليكم 
بنات ابي مشورتكم في مشكلتي وهي ان البارح حصل موقف من زوجي وهو والله الغلطان بس قلب السالفه علي وحملني الغلط وقعد يدعي علي ودايم قاهرني بكلمه اذا تهاوشنا انا وياه دايم يقولي وش شايفه نفسك عندي اميرة انتي عندي  مجردمرة وانا مااشوفك الا نقص انتي عندي نقص احس يهيني بذا الكلمه مايقدرني ولايحترمني والله انه اذا صارت بينا مشكله مايداري خاطري بس يهزئني ويدعي علي واذا قلتله تراني تعبت منك قالي انتي مو مجبورة تبيني ولا روحي لأهلك واخر شي البارح كناجايينا من اهلي وفي الطريق صارت بينا هوشه مع انه والله هو الغلطان وصار يدعي علي ويقولي تبيني ارجعك لاهلك ارجعك احس اهاني 
والحين انا وهو مانكلم بعض من امس زعلانين من بعض بنات والله كلمته الي دايم يكررها علي حازه في خاطري دايم يقولي تراك عندي نقص واحس يابنات انه بايعني يعني اذا صارت بينا مشكله قالي تبيني ولا روحي لاهلك واذا تصالحنا وعاتبته قالي وانتي مصدقه انامااقدر اصبر عنك تروحين لاهلك احس انه يكذب الي يحب مرته مو في كل مشكله يقولها روحي لاهلك ولايقولها انتي نقص عندي واذا صار يابنات معزوم عند احد وسالته قلتله من معزوم انت عنده يخش علي مايعلمني يقولي عند رجال واذا قلتله وش المانع اذا سولفت لي وقلت انا معزوم عند افلان مافيها شي لدرجه انه  امس قالي ان بروح معزوم عند رجال ويوم سالته قالي مايصلح اعلم المره انتي مره وطلع معزوم عند اخوه حتى عزيمته عند اخوه يخشها علي مدري وش قصة ذا الرجال  الرجاجيل يعلموني حريمهم وهذا يخش علي والحين انا مقرره اني مااكلمه الا لما يعتذر مني لانه بكاني وقهرني ودعا علي وهو الغلطان الي عندها خبره تقولي كيف اتعامله مع ذا الرجال ونسيت اقولكم لو ابكي عنده مايحن علي ولايراضيني بس يقولي ايوا زيدي بعد ولا اطلعي من الغرفه ابكي في الصاله ماتهمه دموعي تعبت منه شيروعلي .