زوجي رجع من السفر وقال لي وجهك يحتاج عمليات تجميل..شوفو السخافه بس/ استوفى الردود

بنات انا زوجي سافر رحله عمل لحائل
وانا كنت عند اهلي
وامس عودته عالساعه 11 بالليل
وانا كلمته العصر اطمن عليه وسألته عن العشاء
قال لي مو مشكله اذا رجعت نطلب من برا
لاني اصلا كنت ببيت اهلي وبعيده مره

نزلوني اهلي بعد العشاء لبيتي..
رتبت البيت وعطرته واكلت بنتي ونيمتها
وانا تشيكت وتعطرت ولبست..
وجلست اتصل على جواله.. لقيته مشغول..
ارسلت له مسج: الحمدلله عالسلامة..
دق علي.. يقول: كيف عرفتي اني وصلت؟
قلت له دقيت 3 مرات ويعطيني مشغول..
يعني انك فتحت الجوال ونزلت الطياره..
قال ايوه كنت احاول اكلم امي.. بس ماردت..!

انا حزت بخاطري انه مايدق علي اول وحده..
بس مابينت..
سألني عن بنته.. قلت له نامت..
قال: ليه نيمتيها؟ انا مشتاااااق لها..
قلت له الوقت تأخر وهذي طفله طبيعي تنام!
لاحظوا يعرف يقول اشتقت لبنتي
ولا يقول اشتقت لزوجتي..!!

المهم قفلنا.. نص ساعه وهو عندي..
دخل البيت وسلمت عليه..
ورحت انا على طول اكمل شغلي..
كنت جالسه اطبع اوراق مهمه لشغلي..
جاء عندي يقول انه قرفان من نفسه لازم يتروش..
قلت اوكي اطلب العشاء وتروش على بال مايجي


ناظرني وقال والله اني مليت من اكل المطاعم..
ودامك مشغوله فبروح المطبخ اسوي مكرونه!!!
قلت له ليه ماقلت لي اسوي لك مكرونه؟!
قال لا خلاص ما ابي ازعجك..
وراح المطبخ يطبخ اخر الليل !!!!

وانا كنت منتظرته يسبح عشان تروح ريحه العرق
واجلس اسولف معه ونتعشى سوا ..
قام هو طلع بسالفه جديدة...!!!!
طبعا انا طنشته ورحت اغسل وجهي عشان انام..
جاني مستغرب يقول: ماراح تاكلين معي؟
قلت له الساعه 1 وانت تعرفني ما اتعشى متأخر
بالعافيه عليك..

جاء سألني انتي متعشيه؟
قلت لا والله كنت انتظرك على اساس نطلب سوا مثل ماقلت..

قال انا مليت والله من اكل المطاعم..
قلت له انا ماجيت البيت الا 8 ونص
وكثر خيرهم اهلي هم اللي رجعوني
فوق كذا سألتك العصر وقلت لي نطلب اي شي

قال ايه انا قلت كذا عشان ما اتعبك بالليل.،
قلت له جزاك الله خير.. انت لو قايل لي انك غيرت الخطه كان انا اكلت لي شي عالسريع عند اهلي ولا انتظرتك..

وكنت ابدخل انام وهو جلس يعيد ويزيد..
قلت له خلاص السالفه ماتسوى تصبح على خير..
قال: هذا استقبال؟ هذا اسلوب؟ هذا وجه؟!
قلت له وجهي خلقه ربي وانا راضيه فيها.،
قال: لا واضح يبي لك عمليات تجميل شوفي زين..

انا انصدممممت ايش هالكلام!!!!
انا الحمدلله اعرف نفسي ومعجبني شكلي..
ولا توقعت وقاحته توصل لهالمستوى..

قلت له تبي مني شي؟ والا بتستفزني بس!
قال: انا مستفز!! ماتستحين!!
وقال كلام سخيف..
بالاخير سحبت عليه ودخلت انام..
بعدها بربع ساعه دخل هو ينام..
صحيت الصبح ورحت للمطبخ لقيته حووووسه..
حتى المكرونه اللي طبخها مكشوفة فوق الفرن..
يعني ماتعشى..
جلست ساعه انظف المطبخ من الصبح..
وهو للحين نايم..


وانا بخاطري اقول ليته مايصحى..
كارهته مررررره وكارهه شكله وصوته وكل مافيه