استخيري للطلاق
و اذا فيه خير الله بييسره

كل ما حكيتي أكثر كل ما حسيتك كأنك تحكين عني....بس لا تظنين إن مشوار الألم بينتهي عند الطلاق..لأ بيدأ مشوار جديد من العذاب..العيال..الخوف من إنه يأخذهم...تصدقين أني أهرب من عيالي و أشغل نفسي بأي شئ عنهم بالذات الأثنين الصغار لأني خايفة لا أتعلق فيهم و يأخذهم أبوهم زي ما يهدد دايماً...تظنين الطلاق بيريحك...أنا كل ما سمعت بنتي الصغيرة تقول بابا و ما تلقي من يرد عليها أتعذب وأحس بالذنب لأني حرمتها من أبوها ...تخيلي بنتي ما تعرف أبوها؟؟؟!! ما أقول إني ندمانة علي الطلاق ..لأ بالعكس وضعي أحسن... كنت مثلك محاصرة بمصيدة..ما أحد راضي يفهمني...جواي غضب كان ممكن يجلطني و لا أحد حاس فيني..ما كان راضي لي حتي أشوف دكتور نفسي ولا حتي أخصائية...انا عارفة أن ما في أمل منه وحتي لما حاول معي ...لقيت نفسي أنفر من فكرة الرجوع له لأني حتي بيت أربي فيه عيالي ما كان عندي...حتي بنتي بالأخير استكثرها علي...الله يهديه هد كل الجسور...

و في آخر زيارة راحت له فيها البنت يقول لها أنا بأجيب حرمة ثانية تصير أمك..طيب أنت أتزوج الله يوفقك..لكن بنتي ليش تحاول تلغيني من مخها..حق أعطاني إياه رب العالمين ما تجي أنت وتاخذه مني ..بالذات إني ما رميتهم..أنحديت أخذ هالموقف و أطلب الطلاق هذا غير الكلام و المعاير بالفشل واللي يمدح بأخلاقه قدامك يعني العيب منك...

أتوقعي منه أنه يحاربك بعيالك لأنه عارفك متعلقة فيهم...انتبهي تتطلقين..ما دامك علي ذمته ما راح يقدر يحرمك منهم..وإذا أنت عايشة ببيت لحالك وهو تارك لك عيالك..طنشيه اعتبريه مو موجود..اعتبريه طفل إضافي جالسة تربينه..اعتبريه أخوك ..رفيق سكن أي شي ...و بنفس الوقت خليه يتحمل المسئولية المادية كاملة...

مصيره بيمل من العناد ويخليك تتصرفين علي كيفك بس أنتي سايسيه..و تجاهلي تصرفاته...

ذولا الرجال إبتلاء من الله...

(ولا يلقاها إلا الذين صبروا ولا يلقاها إلا ذو حظ عظيم)
اللهم ألهمنا الصبر

اختي لو انه ماطلقك ولا مره جان قلتلك تطلقي يمكن يتغير حاله ,, لكن طلقتين .. يعني مافيه
مجال انج تتسرعين وتطلبين الثالثه خاصه انج تحت ظغوط الحمل وكلنا نعرف الحمل والنفسيه
والمشاكل الي ماتطلع الا وقت الحمل والنفاس

ارى انج تعطين نفسج مجال لي شهر 6 ((اعتبريها فترة اختبار)) حاولي تغيرين نفسج فيها ولا
تهتمي لجانبه ولا تؤنبيه ولا تكثري الشكاوي عليه ..

وفي هذه الفتره اختي اقول لك عن تجربتي الشخصيه مع زوجي كل مازادت المشاكل لجأت
للاستغفار ولتشغيل سورة البقره بشكل متواصل بالبيت .. والله انه يتغير 180 درجه

يعني الشيطان لاعب لعب على زوجي واذا شافني معصبه يحرق البيت بالي فيه ويطلع مايرجع
الا 3 الفجر

لازم اول شي تقنعين نفسك ان الشيطان لاعب فيكم اثنينكم والحل هو الاستغفار والدعاء والبقره

لي شهر 6 لي ولدتي وطلعتي من النفاس واستقرت كل امورك ذيك الساعه فكري بالموضوع
بعد مره .. وسالفة انك تسوقين سياره اجليها لين تقدرين تعدلين علاقتك مع زوجك
وتصالحون ذيك الساعه فكري بالطلبات الي منعك منها

ولاتحكمي عليه من علاقة ابوه بامه

بالعكس .. الي جرب الانفصال او جاء من عائله مفككه هو اكثر واحد حاس بمرارة الطلاق
وغالبا ما نرى ابناء المطلقين متعلقين بأزواجهم أكثر من الي ماجرب ولا عارف الوضع

ثم ان وجود الاب في البيت حتى لو عياله يشوفونه مره بالاسبوع على السريع افضل مليون
مره من الطلاق .. بكره العيال لي كبروا يحقدون عليك لانك حرمتيهم من ابوهم

شوفي الي ازواجهم سكارى ويجون البيت كل يوم يظربونهم ويسبونهم ومستحملينهم عشان
العيال .. تتوقعين العيال يبون أب مثل هذا ؟؟؟ اي والله افضل من الحرمان من الاب وبكره
لي كبروا العيال هم الي بيخلونه يتعلق فيهم .. هم الي بيخلونه يجلس معاهم ويطلع معاهم
وبيروحو معاه للديوانيه وللزيارات هذا ابوهم وهم عياله لاتنسي ان محد يحب عيالك ولا
يستحملهم بالدنيا كلها ماعدا انتي وأبوهم


استغيذي من الشيطان الرجيم .. الاعصاب هي سبب كل المشاكل




وخلي سياستك مثل سياسة الصحابي الجليل معاويه بن ابي سفيان الذي قال

"لو كان بيني وبين الناس شعره ماانقطعت, لو شدوها ارخيتها, ولو ارخوها شددتها "





عسى الله يهدي زوجك ويصلحه ومايحرم عيالك من ابوهم وهم في امس الحاجه اليه

هلا حبيبتي ام ميثا
اول شئ انا مع كلام الاخت نور البرق عين العقل

لكن لاحظت شئ حبيبتي انتي لك 3سنوات ونص متزوجه ومن كلامك شكلك ماتاكلين مانع

يعني كل سنه تقريبا تحملين >>>>>>>>>>>>>>>> ماشاء الله تبارك الله لاحول ولا قوة الا بالله

اتوقع ان كل هالمشاكل من الحمل لانك كل السنوات اللي فاتت مافضيت لزوجك ونفسيتك بالحمل وبعد الحمل تكون تعباانه صدقيني هذا هو السبب

حبيبتي اتركي فكره الطلاق وابعدها من راسك لكن بعد ماتولدين بالسلامه اجلي فكره الحمل على الاقل 5 سنوات واهتمي بعمرك والتسمي الاعذار لزوجك وصدقيني بيرجع لبيته لما يحس انك تهتمين فيه
لكن هو في باله يقول مو فاضيه لي كله لعيالها وحملها صدقيني

الله يسهل عليك اختي ويسخر لك زوجك

الله يفرج همك ويسخرلك زوجك