زوجي وطفلي

السلام عليكم اخواتي
أتمنى تكونوا بخير جميعاً،، بدخل بالموضوع ع طول وابغى حل لوضعي.
عن اللي مايعرفني انا كنت مطلقة ولي ابن عمره 3 سنين ونصف
وتزوجت من متزوج وابني معي
وصارت مشاكل مع طليقي ووقف معي زوجي واخذنا صك الحضانه
من أخذته انقلبت حياتي ماشفت خير ابد
تغير زوجي علي وع ولدي من عرفهم مو راضين طليقي واهله يخلوني بحالي يسألوا عني ويسبوا فيني وفأهلي عنده
تقل ذابحة لهم احد كل هذا ليش تزوجت
وليش زوجي مقدرني ومتقبل ولدي انجنوا هذا نزل لها من السماء -وعلى نياتكم ترزقون-
هذا من غير الاتصالات والرسائل اللي تجيه من مجهول
اشتدت المشاكل بيننا هذا غير جلستي في البيت مااطلع لأهلي الا مره بالاسبوع
وتحقيقات و و يوم زعلت ورحت عند اهلي وقلت يشك فيني شوفوا لي حل حتى وانا حامل مايراعي وضعي
يوم ناقشه ابوي قال لو أشك واحد بالمئه تحرم علي وانا احبه وشاريها لكن دامت بخاطري وتهاوشت معاه ع التحقيق
والأسئلة من جاء من راح من كلم وووو
سويت له مفاجأه واشتريت هدية عبر الانستقرام
وكذا مره اطلب من مطعم او حلويات يقول انا أغار ماابغاك تكلمين رجال قلت أوكي بس هذا مايخلي لك حق تحقق وتتبع وراي عبر جوالي و و
اللحين رجعت الأمور تمام وبدا مايسأل ولا يحقق ولا شي
لكن المشكله ولدي فقدته يطلب من أخليه كم يوم عند اهلي او يقول دخليه غرفته وقبل كان يلعب معه
وولدي صار يشعر تجاهه بخوف غريب وينبسط لأجلس عند اهلي مع انه مايضربه يوجهه فقط لكن مايحبه
وأبوي يضرب ويهاوش لكن متعلق فيه ومايخاف منه كثر مايخاف من زوجي
لاقلت يالله بنروح بيتنا يتغير وجهه ويضيق صدره
انا مع ان الوضع جديد عليه من عمره سنه وانا عند اهلي ومتعود ع الناس وببيتي توحد
وكان بِسْم الله عليه هادىء وحبوب وكلن يمدح فيه
لكن تغير صار عدواني ودايم بكي ومايسمع الكلام ومايأكل
ولا طلعت لاجتماع مزززززعج بشكل صراخ
ومايعبرني وأحيانا يضرب اللي بسنه
ويبكي الا بيجلس مايبغى يروح معي
احيانا اضربه واندم ينرفزني ع طول اعصب منه
ان جلس عند اهلي فقدته وازعجهم ومابغى احد يجيه او يلمسه قلبي معه هذا من غير اسئلة ابوه ليش عندكم ايش فيها امه ؟؟
واهلي يحسوا ان زوجي مايبغاه وانا ماودي!
وأبوي يقول عطيه اهله ايش تبغي فيه لا كبر رجع لك قلت لا مت خله يروح ليه يعيش يتيم وانا عايشه
اول ماجبته قلت لزوجي اعتبره ولدك وساعدني ع تربيته وحدي مااقدر
دامه حنون ومايضرب هذا اهم شي !
لكن شلون اقول له ابغى أجيبه عندي وخف عليه شوي الولد بدا يخاف وماودي يكرهك
ماادري شلون افاتحه
وكيف اتعامل مع طفلي ؟
عطوني حلول
قلبي يتقطع عليه ودي أخليه مبسوط واعوضة ومايحس بالنقص أبدا
الله يجزاه الجنه اللي ترد علي ويحقق له ماتتمنى🌹