زوجي يخوني مع اختي؟!

السلام عليكم
اول مره احس اني في مشكله بيني وبين زوجي مالها حل الا الانفصال

انا في مشكله وحاله نفسيه سيئه مايعرف بيها الا الله

تزوجت زوجي بعد علاقه اعجاب ثم حب من طرفه..هو احد اقاربي..لما تخرج من الثانويه التحق بكليه موجوده بمنطقتنا لانه هو عايش في منطقه ثانيه..سكن عندنا فتره سنتين..كان يسمع عني وانا ولله الحمد منعم علي الله بحسن خلقه واخلاق كان يشهد لها الجميع..اعجب فيني اعجاب شديد وقرر انه يفاتحني بموضوع انه يخطبني كان عمره ساعتها 18سنه تقريبا ..لكن انا قلت له انه توه صغير وانه يمكن بس معجب فيني وهذا الي دفعه لطلب الخطبه او انه الفضول لشوفتي

طلع من الكليه الي بمنطقتنا والتحق بمعهد بمنطقة الرياض..في هذي الفتره كانت اختي بالابتدائي توها صغيره

كان دايم يسال عني بالتليفون وكنا زي الاخوة والاصحاب لاني ماكنت ابي اكثر من كذا..تخرجت من الكلية..وتقدم لي شخص مايعيبه شي ووافقت عليه بدون قريبي مايدري..طبعا بتستغربون ليه ماقلت له..لاني شلته من راسي ..لانه كان دايم يسافر لمنطقه عربيه وتصرفاته هناك مشكوك فيها..بعد ملكتي من الشخص الي ذكرته جاني اكتئاب وحسيت اني تسرعت وفسخت الملكه

..وظل قريبي يحاول يتقرب مني لانه لازال يكن لي الحب والاحترام
بعدها مرت علي ظروف صعبه وهي وفاة اغلا الناس عندي(اخوي)الله يرحمه كان تؤام روحي توفى وعمره22سنه حسيت ان مالي احد في هالدنيا وتمنيت الموت..صار قلبي خالي والي ملاه لي قريبي الي وقف جنبي بهالظروف..تعينت في مدرسه حكوميه على بند وقف معي وساعدني..زاد غلاه في قلبي..وبينت له اني موافقه على الارتباط به
والدي رفض اني اتزوجه لانه عصبي ومايقدر يمسك اعصابه ومتهور في وقت الغضب لكن في الاقات الثانيه هو متفهم وعقلاني
يعني ابوي خاف علي منه

ماخذت عليه مهر غالي..كان لسى مااخذ شقه ولا فرشها..ملكتنا تمت سنه وبعدين سوينا حفله الزواج..دخلت الشقه وماكان فيها الا غرفة النوم فقط لاغير..لا اجهزه ولا اثاث..تحملت معاه واعتمدنا على نفسنا واثثنا كل قطعه سوا

مرت علينا ظروف صعبه سواء زوجيه او عائليه ..صبرت وتحملت..
الين بديت احس ان فيه شي غريب يصير بس ماني عارفه وش هو..بديت سبحان الله اشك في تصرفاته مع اختي..رغم اني احسب ان العلاقه بين اخ واخت صغيره يعني عادي وهي طبعا صارت ماتكشف عنده..

في يوم كنت في بيت اهلي ..وقالي حنا لازم نمشي للرياض قلت له ليش..قال فيه اشخاص في البيت مايبوني..انا عرفت يقصد مين..قلت له تقصد فلانه..قال ايه سوت تصرف زعلني ..يقول انه يوم مر سكرت الباب في وجهه بقوه
يوم سالتها انكرت وقالت انها موب هي الي سكرت الباب..قلت له خلااص بس خلنا ننام الليله وبكرا نمشي..يوم صحيت من النوم شفت جوال زوجي فيه مكالمه لم يرد عليها يوم فتحتها الا رقم اختي داقه عليه الساعه 4 الفجر وانا نايمه..رحت وسالتهاانتي داقه عليه من جوالك..انكرت وقالت لا

لما رجعت الرياض اختي ارسلت لي رساله ..وقالت انها ماصارحتني خوفا من انه يصير بيني وبين زوجي مشاكل ..وانه هو الي اتصل فيها بنص الليل اكثر من مره وهي ماكانت عند الجوال ولما شافت مكالماته دقت رنه وهو عاد ودق عليها كلمها وانتوا بكرامه من الجمام لاني انا كنت نايمه..لما ردت عليه قال لها هلا عمري ليش زعلانه علي..ردت عليه وقالت له عيب تكلمني بهالوقت ولا عاد تتصل علي..وحكت لي اني مره ماكنت بالبيت وكانت امي نايمه انه حاول يدخل لها الغرفه وهي تحاول تمنعه وقامت تصارخ وراح..قلت لها ليش من ذاك الوقت ماخبرتيني ليه ماقلتي ليه ..قالت خفت ماتصدقيني واخرب الي بينكم..قلت لها واحد زيه مستحيل اعيش معه وانا معاك

رجعت بي الذاكره للورى لاوقات شكيت فيها..

*كنت رايحه لمحل وزوجي وداني انا واختي صاحبة القصه واختي الثانيه..انا نزلت للمحا مع اختي الثانيه وهي ظلت بالسياره زوجي لما شافها جلست جلس وياها..وكنت اشوفه من ورى قزاز المحل يكلمها..

*موقف ثاني كان عند اختي موعد بالمستشفى نزلت معاها اختي الثانيه للمستشفى زوجي قالها انها تجلس معاي بالسياره وهو يدخل مع اختي المستشفى لكن اختي رفضت

*كان دايم يصر انها تروح معانا وانا كنت استغرب انها دايم ترفض ولما ترفض يروح لها بنفسه ويحاول فيها
*كنت الاحظ انه دايم يدخل الحمام وانتوا بكرامه ويكلم منه..ومره شفته يطل من فتحه بالحمام

الحين ماني قادره افاتحه بالموضوع لانه بينكر ويمكن يتهم اختي..فانا كلمتها وقلت لها راح احدد معاها وقت تكلم فيه زوجي وتتاسف منه عن الي صار واكون انا جنبها واشوف طريقه اسلوبه معاها..وراح اراقب تصرفاته داخل البيت لين اتاكد وبعدين في ساعتها افاتحه عشان ماتكون له حجه واطلعه من حياتي الى الابد غير مأسوف عليه

ليت تعلقون على حكايتي ولو عندكم حلول كيف اكشف زوجي وحقيقته
لاني ماقدر اروح لاهلي الا بعد اسبوعين
ياليت تساعدوني
شاكره لكم مقدما
واسفه على استرسالي واطالتي لكن من حر مافيني حكيت
والسلام عليكم