زوجي يقول انتي مكشره ونكديه بنسبة ٩٠٪؜

السلام عليكم
اخواتي في الله كيف حالكم


انا متزوجه من ٧ سنوات وعمري ٢٩ سنه وزوجي ٣٢ سنه ، اول سنتين من زواجنا كانت مثل العسل وكل اوقاتنا مبسوطين جدا ويخلي وقته كله معي من يرجع للعمل يجلس معاي ومبسوط ( للمعلوميه احنا ساكنين مع والدته بالبيت هذاك الوقت وكنا اوقات نجلس معاها واوقات لنا خصوصيتنا ندخل بالجناح ونجلس سوا )
صفات زوجي انه مايحب يسولف كثير لكن يحب جدا اني انا اسولف له وهو يستمع لي بكل حب وانصات وبالعكس يقول لي خليك كذا دايم سولفي علي تغييرين جوي بعد ضغط العمل لكن انا ماعندي سوالف ما احب اسولف كثير ..
بعد سنتين رزقنا الله ببنت وبعدها بسنتين بنت اخرى ربي يحفظهم ويصلحهم ويهديهم


الان لي ٥ شهور سكنت ببيت لحالي وطلعنا من خالتي
من سكنا هالبيت طبعا زادت المسئوليات علي مع انه عندي خادمه وقرها لي زوجي من جبت بنتي الاولى
لكن بحكم كبر البيت (٤٥٠ متر ٣ ادوار ) ومع الجلوس مع الاطفال احيانا وقت خروجي للعمل ( عملي خاص انا صاحبه مشروع واحيانا اروح لمشروعي بين فتره وفتره كل يومين او ثلاثه واحيانا اكتفي بحل المشاكل بالتلفون )


المهم حبيباتي مالكم بالطويله
زوجي من سكنا هالبيت لما يرجع من دوامه الساعه ٦ لانه موظف بنك
استقبله بأجمل استقبال ( اول مايدخل احضنه واسلم عليه واساله شلونك حبيبي يرد علي وهو مبتسم وانا استقبله بإبتسامه جميله وحتى مجرد مايسألني شلونك حبيبتي على طول ارد عليه بهالكلمه لاشعورياً ( مشتاقتلك حبيبي ) اصبحت هالكلمه بلساني كل ماسألني هالسؤال
واطلب منه الذهاب لتغيير ملابسه لحين اجهز الغداء على الطاوله.. وهذي اول مشكله على قولة زوجي يشوفها كمشكله فيني وهي :-
١/
لما نجلس على طاوله الغداء طبعا لايخفاكم الاطفال ومشاغبتهم اثناء الاكل ، الي تحوس والي تنثر الاكل والي تلعب في اكلها والي تنشب فيني او في ابوها تاخذ من اكلنا والي تكب الاكل ووو .... كلها حركات مشاغبه اطفال ضروري اننا كأب وأم نتحملهم لين مايكبرون ويعتمدون على نفسهم
احيانا اتغاضى عن الشي السيء الي تسويه بنتي ولكن زوجي لا يتغاضى ويأمرني اصلح وضعها بنفس الوقت وخصوصا بنتي الصغيره الثانيه عمرها الان تقريبا ٣ سنوات وعنييييده جدا وراسها يابس وتنفذ الي تبيه ولاهمها احد
ف احيانا اقول لزوجي اسفهها وخلها تسوي الي تبيه لاني انا لو بتدخل بعصب عليها ( ولحد يقول لي ليه تعصبين عليها لان بنتي عنيييده مانفع معاها ابدا لا تهديد ولا مساير ولا باسلوب انها تفك عنادها وانا ما احب اضرب ابدا ) ولو طلب مني زوجي التدخل لحل الموقف الي تسويه بنتي اضطر اعلي صوتي عليها ف يشوفني دائما نكديه ومكشره ( طيب انت طلبت مني التدخل وحتى لو سلمته حل المشكله الي تسويها بنتي هو ايضا يعلي صوته عليها وممكن يضربها مع يدها لتأديبها ) لكن انا لي اسلوبي في التعامل معهم بناتي غير عنه ..


المشكله الثانيه وهي :-
واسمحولي اولا اكتب لكم تفاصيل اعمق عن حياتي عشان تعرفون تطلعون حل لمشكلتي معاه
زوجي مشكلته انه مسوي تكميم وقاعد ينحف لسى ف مسوي له عدد قليل جدا من الثياب والملابس الداخليه ماتكفيه لاسبوع( مع العلم زوجي راتبه مرررررررره كويس ولايخفاكم موظفي البنوك كيف رواتبهم )
ومع النحف المستمر كل شهرين يشتري له بنطلونين وكم بلوزه او تيشيرت وللاسف يلبسهم مره وحده ويرميهم بالسله للغسيل وبعد يومين يهاوشني وين هذاك البنطلون او وين هذاك الشي .. واحيانا يصحيني من الصبح قبل دوامه وهو متنرفز وين ثوبي الفلاني ابيه ووين جزمتي الفلانيه ابيها يعني بالعربي الفصييييح يبي كل شي اول باول ينزل له ولا يتأخر ابداااا مع انه رجال هادئ مو شخصيه عصبيه
ف يتنرفز لو حط ملابسه بالسله وخلال يومين ان مانزلت يوووووه يسويها سالفه فصرت ادقق مع الشغاله وخليت الاولويه لملابسه تنزل اول بأول واضطريت اشغل الغساله والنشافه طول الايام عشان مايصحيني ولا يسألني وين هذا وهذا صرت اوفر له كل شي قبل مايسأل عشان مايهاوش


المهم الاخ يبي لما يصحيني بعز نومي الصبح وماحصل الي يبيه هو متنرفز طبعا
يبغاني اصحى من نومي وانا ابتسامه طويله عريضه بوجهي ولا اتنرفز ( طبيعي الانسان لما يجي اي شخص يصحيه من النوم يقوم مكشر ف انا اقوم من نومي فقط ساكته ولا اناظره ولا احتك معاه بالكلام اجيب الي يبيه واعطيه اياه وارجع انام ) فيشوفني اني مكشره دايم بسبب هالشي وركزوا على هالموقف لانه يقول لي بنسبه ٩٠٪؜ مكشره انتي
مع العلم انه لما يجي للبيت ونتغدى مايقعد الا ساعه او ساعتين ان كثرت وبهالوقت نكون جالسين مع بناتنا وتعرفون شقاوتهم الله يصلحهم
انا اجيه دائما بكل حنيه اجلس جنبه وابدى اسولف عن اي موضوع في بالي او اي شي او استشيره وعادي مستمرين حلوين بس احيانا يقاطعونا البنات واتنرفز عليهم فقط اني ارفع صوتي احيااااااانا ( مره او مرتين بالاسبوع )وليس دايما عليهم عشان يسكتون عشان نكمل نقاشنا مع بعض وارجع ابتسم له بعد صرختي عالبنات واسولف بكل حب وحنيه واحترام له..


وبعد هالساعتين يطلع لبيت ابوه يمر امه ويجلس عند اخوانه ويرجع ١٢ بالليل
طبعا انا ليه اقعد في البيت ( احيانا اجلس واحيانا اروح اشوف شغلي احيانا او امر اهلي او صحباتي ) وارجع قبل مايرجع واحيانا هو يسبقني ويجي بدري بدون مايخبرني ..


المشكله الاساسيه الان انه يقول لي انتي مكشره ٢٤ ساعه ،، مع العلم ( اني اتزين له لايقل عن مرتين بالاسبوع اتكشخ كشخه كني رايحه عزيمه فستان ولبس وكشخه وكل شي واحيانا لا لبس بسيط بنطلون وبلوزه وميك اب خفيف اسم اني مرتبه ونظيفه وريحتي حلوه بعد الطبخ واتعطر يعني مهتمه بنفسي وبشكلي لنفسي قبل لا يكون له ..


والاهم انو لو كانو بناتي مو عندي في بيت اهلي مثلا او بيت عمهم ويجي زوجي من الدوام مايحصلهم يازيييييينا مع بعض نسولف ونضحك ومبسوطين عالاخر كأنه يوم من ايام اول سنتين من زواجنا بدون اطفال وينبسط ويستانس ولو بيده يقضي كل يومه معي هاليوم عادي ويطلعني ويمشيني وكل شي .. يعني بدون وجود بناتنا حياتنا مثل العسل لكن بوجودهم انا عن نفسي اسفههم لكن هو يتنرفز منهم ويطلب مني التدخل وان تدخلت وعصبت علييييييهم مو عليه هوو يبدأ يقول لي انتي مكشره ونكديه طيب ايش اسوي يعني !!!!!

مع العلم مستحيل يودي بناته او يجيبهم الااااا ماندررررر جداااااااا ولكن عمره ما جلس ساعه بس مع بناته وانا غير موجوده لظرف عندي موعد بروح له شوي وبرجع او اي شي يووووه لما ارجع واشوف وجه معصب ومكشر وماصدق على الله جيت عشان يطلع وينحاش من البنات
بالعربي مايتحمل بناته وازعاجهم ويبيني انا اتحملهم غصب واكون مبتسمه كل الوقت وانا صرت اسوي كذا لما يجي ابوهم انا اسلك لهم البنات عشان ما انكد عليه الجووو ابدا ولايكره الجلسه بالبيت ف اقوله اسفههم وخلهم يسوون الي يبونه عادي اطفال مايفهمون لكن هو لا يتنرفز مع العلم عمري ماقلت له ليه مكشر انت او متنرفز اول ما اشوفه كذا اصد عنه لان لو احتكيت فيه بيفهم اني اتدخل فيه وكأنه تحقيق يصير ..


ومعلوميه اخيره : زوجي تعود اني انا اقول بكل شي حتى لو مو من اختصاصي كزوجه ك استقبال عمال بالبيت ونقل البيت كله انا وقفت عليه بحكم انه بالدوام ولايظلع الا متأخر وساعدته بمبلغ البيت بدووون ما اخليه يكتب ورقه او شي المبلغ كبير الي عطيته اياه يساعده بشراء البيت ودائما بحياتنا اي وقت يحتاج مبلغ اعطييييه وانا مغمضه واقوله سم تفضل وتامر امر واحيانا يحتاج مساعدات من ابوي واطلب من ابوي يساعده وابوي حبيبي مايرد لي طلب بحكم اني اكبر بناته ويحبني اكثر من اخواتي الباقيات


فعارف اني عمري ناقصرت معاه لاماديا ولا معنويا ابدا وهو مايقصر حرام لايحرمني من طلعات ولا تأخيرات ولا سفرات عمره ماقال لي لا ويصرف علي وعلى البيت وبناته عمره ماقال مافيه ولا لا ابداااااا


المشكله الان انه نسى كل محاسني وضل يقول انتي مكشره ٩٠ ٪؜ لازم تغيرين هالطبع فيك
وانا قلت له مو مني من بناتك انا لما اعصب عليهم ثانيه او ١٠ ثواني وارجع لك بوجه ضاحك وهاديه عندك وانا اعصب عليهم بعد ماتزن انت الا عالجي مشكلتهم الان .. نتحملهم فتره وبيكبرون لكنه مو مقتنع ويشوفها مشكله فيني لازم تنحل واقول له طيب ساعدني في البنات جيب شغاله ثانيه يقول لا وحده تكفي واذا تبين جيبي من فلوسك ولا ادفعي شهريا مصروف للبيت شاركيني فيه مصرف البيت مع انه مو قاصره ابداااا راتبه حلووو


ف ايش الحل معاه الحين ابي مشورتكم طبعا انا متضايقه منه جدا ليه يشوفني مكشره كثير كذا ليه يشوفني نكديه ولما واجهته يقول لاتمثلين دور المسكينه !!!