ساعدوني اخووي جالس يدمر نفسة وصار له سنتين وهو على هالحال

السلام عليكم ورحمه الله
انا جالسه اكتب ومخنوقه على اخوي الي ماله في هالدنيا الاانا انا متزوجه وعندي طفلين والحمدلله مرتاحه في كل شيء الا قلبي الي يتقطع كل مااشوف اخوي ....
اخوي عمره الحين 26 سنه ويعاني في نفسة كثير واحس بضيقته كثير تصدقون يااخواتي مايشوف احد له سنه واكثر ولا يكلم احد صار يكره الي حوالينه ويكره نفسه ودايم يقول انا ميت انا ميت والله اني كل مااشوفه انخنق وابكي عليه وكل ماجي اساعده مايرد علي ويقولي تعالي بس سلمي علي وروحي ويدعي لي ياخواتي انا والله اكتب لكم وجالسه ابكي من الحرة الي بقلبي ماتتخيلو اول يوم بالعيد جبت له عطر وجيت انا وزوجي نبي نعيد علية وبجلس معه رد على الباب وقال لي انتي بس ابي اشوفك واعايدك ولما دخلت عنده وشفت حاله ودقنه والله اجلست ابكي بدون عقل اخوي مالي في الدنيا الا هو كان في احسن الاحوال قبل سنتين وكان مثل للناس في كل شيء وبعمله وبتجارته والله فتح عليه لدرجه انه كان يسافر كل مكان وكان لي ابو وام والله ياخواتي مانسى يوم زواجي ايش اهداني وكل مانقص علي مال عطاني حتى رجلي كان والله يتسلف منه رغم ان رجلي مهندس ياخواتي قلبي يتقطع علية صارت له مشاكل ودمرت حياته قبل سنتين الي دمروة الله تذكرهم واخذ اعمارهم والله يسامحهم بس بسببهم فك ملكته وفصل من عمله وجلس يلوم نفسة كل شوي يقول انا غلط انا غلط والله ياخواتي لما يبكي تقولي طفل عندي يحتر قلبي علية كره الناس وصار مايقابل احد بس يلوم نفسة ويقول ابي اموت ابي اموت واحيان يتذكر نفسة اول ويقول لي نفسي اموت ..... ياخواتي اعتبروة ولدكم كيف اتصرف معه علموني احسة متحطم كل مااجية والله ابكي علية ياخواتي انا ماكتبت لكم لاااجل شيء الله الي يعلم بس ابي احد يوجهني اخوي جالس بروحه ولا يكلم احد الا انا وجالس ببيته الي بناه بااول عمره والايجارات تصرف عليه بس لما اشوفه انخنق وابكي عليه وخايفه انه يذبح نفسه ياكثر مااحزن عليه ...امس كنت عنده وجالس اقول له روح اشتغل ولاتيأس وابدا وقلت له اعطيك 60 الف بس ابيك تتحرك وابيك تضحك احيان يتحمس واحيان يذبل ويظل ساكت ياخواتي لو انه يستاهل الي صار له والله لاااقول اللله جازاه بس من كثر ماهو جميل وداخله جميل والله انه انظلم وتعب وتحمل شيء الله اعلم فيه يرفض مساعده احد ويتم بس يقول ابي اموت واذا متت العمارة لك
كل ماابي ازوجه وادور له بنت حلال يرفض ويقول تبي تشمتي الناس فيني والله ياكثر بنات الحلال الي يحبونه لدرجه امس والله وحده بالمدرسة تتدرس انجليزي تقول لو يوافق والله لاااخذه وهي تحبه من كان عمره 23سنه وتسمع فيه
انا والله ابكي كل مااشوفه واقول اخوي لو يروح اني مانسا الي كسروة وهدو معنوياته اخوي كان مملك قبل سنتين وبسبب مشاكله التجارية الي صارت ومشاكله داخل العمل طلق بنت الناس ولا اخذ حتى نص الي دفعه من الملكه ..نفسي اجيب احد لو على حسابي يغير الي فيه احسه بس يتمنى الموت لنفسة ويقول كل شوي ابي اموت ابي اموت.....والله اني اكب لكم وابكي على حاله
كل مااجيه بس يتم ساكت ومايطالع فيني بس يقول كيف حالك وكيف عيالك ويتم ساكت مايسئل عن احد مايشوف احد الي ذبحني دقنه وكيف هي طويله والله انها محليته وصاير فيها ابيض وحلو بس ماكان كذا كان يهتم بنفسة كثير
دايم يلوم نفسة ودايم يقول انا غلط انا الله مو راحمني لاااجل انه مااخذ روحي ماشفت اعز نفس اكثر من اخوي بطل يهتم بشيء يقول لي انا بس اصلي لاااجل ان الله يرحمني وياخذ عمري يقول انا ميت في كل شيء ياربي ساعده والله انه طيب ورجل
يااخواتي الي سمعت في احد مر فيه الي مثل مامر بااخوي يقول لي اخوي كان مافي احد مثله في الشغل وفي المناسبات وفي الروحه والجيه ولا تجارته الي توسع فيها وصار على كل لسان ولا على عمله الي يخص الامير والقرب منه الله يخليكم احد يساعدني ايش اسوي معه والله لو يصير له شيء ترى بذمتي انا خايفه انه ييئس ويسوي بنفسة شيء والله احس اني بموت بموت لو يصير له شيء ابي احد يقولي ايش اسوي والله ياخواتي انا مايمر علي يوم الا اجي فيه عليه 3 او 4 مرات وخايفه انه يسوي بنفسة شيء ماعمرة ضحك من سنتين ولا عمرة احسه متفاؤل بس يتم ساكت ويسلم علي ويقول كيفك وكيف عيالك الله يخليكم احد يشور علي واذا في احد يبي يسئلني عنه انا بجاوبكم بس ابي حل خايفه انه يسوي شيء بنفسة ولااعرف كيف اساعده احس بخنقه ياخواتي عليه ولو افقده والله اني بنجن مايمضي علي يوم وفي كل صلاة الا ادعي له انه بس يحي نفسة ويرده مثل اول يارب ياكريم ردة مثل اول واحي نفسة واهدية واسعده ياحبيبي ياحي ياقيوم