ساعدوني بسرعة .. خيانة بعد 10 شهور خطوبة..!

حبيت تساعدوني لأني مو عارفه شاسوي والله ..

أمس كنت اشوف جوال خطوبةوبالصدفة شفت مسجات مرسلة من جواله إلى رقم وهالمسجات فيها good night والمسج الثاني آسف ان سويت جذي ما كنت اقصد والمسج الثالث فيه(صورته) والمسج الرابع سؤال إذا عرفتي إني خاطب شنو بتكون ردة فعلج ؟ والمسج الخامس إذا طرشتي صورتج باطرش صورتي.

تأكدت من الإتصالات وكان على هالرقم الصبح في اتصال

اتصلت عليه طلعت الطامة الكبرى انها بنيه ..

لما جا سألته من صاحب هالرقم قال لي ما أعرف .. قلت له هذي رقم بنت

قال لي بس أنا ما أعرف .. قلت له تعال اثبت لك إنك تعرفها .. وريته المسجات .. لمحت ابتسامه سريعة وبعدين اخذ التلفون وراح غرفة ثانية .. :(

بعدين رحت له قلت قول لي من ذي ؟ قال لي والله ما اعرفها .. قلت له وهالمسجات .. قال لي احتمال واحد معاي في قهوة ماخذ التلفون يبي يخرب بيتي .. وعمل هالحركات .. وانكر وأصر على كلامه .. وبعدين قال لي إن هذا الاسم مقارب لاسم واحد ثاني صاحب محل تلفونات واهوه كان مكلمه عشان ايشغل اخوه معاه .. بس انا متأكده انه رقم البنت وللعلم انا توني الاحظ هذا الاسم واحس انه توه يعرفها .. والشيء الثاني ان خطيبي يعرف بنات في مجال عمله وفي العادة يعرفني عليهم .. بس الظاهر إن خدعني ...

آآآآآآآآه

ما تتصورن اشكثر انا مقهورة وتعبانه تناقشت معاه وايد بس ينكر وفي نفس الوقت مب متننازل عني ..

قلت له إذا تبي وحده غيري لك حرية الاختيار، بس ان نكون ثنتين في حياتك مستحيل ، وانا مستحيل اتنازل عن بيتي وعنك .. لأني أحبك (غباء صح) .. رغم اني كنت وايد مقهورة طلعت معاه وتعشيت معاه حاولت انسى ما قدرت انسى اشوي وارجع .. لما تعشينا ورجعنا .. خليته ينام ولما نام اخذت تلفونه (قفل التلفون الأخ ) .. فما قدرت احصل رقم البنت اليوم قلت له عطني التلفون والبطاقة وباعطيك تلفوني وبطاقتي وإذا حد يبي يكلمك عليه باقولهم يتصلون على تلفوني .. ما رضى .. قال لي لازم تنسين وإن يحبني وما راح يتنازل عني .. بس احس روحي مغفلة إذا صدقته وخاصة إن كل الدلائل عليه .. قلت له ابيك تثبتي إنك بريء غير جذي ما احس انك بريء .. صدقوني حتى ما لي رغبة فيه بس حاولت إن اقاوم هالشعور ..


ما ابي اهدم بيتي .. ولا ابي اكون مطلقة :( ... ولا ابي اكون تعيسة في حياتي :(

صراحة كنت انشد حياة زوجية مثالية معاه .. ما توقعت خلال هالمدة القصيرة مع بعض يمل أو ان يفكر فيه وحد غيري .. خاصة ان خينا بعض عن حب .. وما لاحظت عليه ابدا ان له علاقات ..

خايفة .. وما ابي احد من أهلي يدري ...............!!!

ساعدوني ابي حل

هل اتقبل الامر عقب ما قال لي انه يبيني ويحبني وان ما يتنازل عني ؟؟! وخاصة ان زوجي بيكون شهر أغسطس ..

كنت اقول اعترف على الاقل بيكون الأمر اهون عليّ .. وبنبتدي صفحة جديدة .. أو خلني اكلم البنت .. وفي حالتين مو راضي ..

هل انهي كل شيء .. رغم إني ما احس ان الامر يستدعي .. والأصح اني ما ابي اتنازل عن زوجي .....!!!!!

شنو تنصحوني
ارجوكم