سحب مني جوالي وشلون اتصرف

السلام عليكم ورحمة الله وبركاته


ودي اختصر الموضوع رغم انه طويل عريض

انا زوجه ثانيه وصابره على ظلم زوجي في اشياء كثير

هو ماشاء الله مبسوط ماديا بس يقتر علي بشكل فضيع طلبات البيت اكل وشر ب مايقصر فيها بس اموري انا مرره يستكثر علي كل شي

يعطيني مصروف بطلعة الروح وكل شي يقول خوذيه من المصروف احيانا حتى ملابس ولده وانا اذا اذا جت مناسبه الا اتدين

وغرقت بالديون ومصروفي صار يروح للديون

زوجته الاولى موضفه راتبها فوق عشرين ماشاء الله وهو يقارني فيها قبل فتره انقطع النت عندي وقلت له يجدد الاشتراك ورفض

سنه وانا احاول فيه يقول والله مااجدده واقوله بيتك الثاني نت وتيلفون وانا مستخسر فيني نت يقول مالي شغل فيها
هي جابته من فلوسها

عندها شغاله وانا حامل وهلكانه مع ولدي وشغل البيت رافض الشغاله واقوله اعدل بيتك الثاني تركض عشان تجيب له شغاله يقول مالي شغل من فلوسها وانا قلت اجيبها من عندي يقول لو دخلت البيت تروحين بيت اهلتس

تحملت وسكت حتى امور نفاسي كل شهر اقعد اطلبه شغله لين تطلع روحي يجيبها باقي المستشفى الي ابولد فيه رافض خاص يقول تولدين بالولادة وانتو عارفين الولادة ومصايبها وانا ابي عملية تجميل

وبيروحون هو وزوجته عمره لانه وداني قبل فتره بعد سنتين وانا اطلبه عمره ويقول الان بوديها وبتاخذ لنا فندق قلت وانا كنت ميته تعب بعد العمرة رجعتنا للبيت على طول عشان تطل عليها هي وعيالها ولافكرت تريحني بفندق لو ساعة

قال مالتس شغل من فلوسها الي تبيني اروح معها فندق تدفع حررررقني وزعلت فترة ثم هديت الوضع والحين

رحنا البارح مطعم ويوم دخلنا المطعم وطلبت الي نفسي فيه جلس يطالع بالواتس شاف صورة العرض تبعي الا صورة يدين مره عجوز ومكتوب جنبها الجدات من بياض يمكن مرة عليكم هالصورة بالنت لان جدتي زايرتنا قبل فتره وارحب فيها بالواتس

وقبلها كان قايلي ماتحطين صور ارواح والا والله لااسحب الجوال منتس لانه هو شاريه لي والشريحه بأسمه

قلت طيب وماصرت احط أي ارواح علما بأني ملتزمه الحمدلله واحرص على البعد عما يغضب الله وعندي خلفيه عن فتوى الشيخ بن عثيمين رحمه الله بتحليل الصور الفتغرافيه لانها مجرد حبس للظل بس هو مو راضي يقتنع استغفرالله

ويصور بجواله ولكن يرفض احط صورة عرض والله يابنات مادريت الاهو بالمطعم يهاوش ويسب غيري الصورة وقلت هذي يدين عجوز يعني من القواعد من النساء ومو وجهها بعد قام يسب وفشلني بالمطعم ويقول والله لااسحب الجوال غيريها وهاتيه والله اختنقت بدموعي وقلت له الشرهه م عليك علي انا الي متحملتك المهم غيرت الصورة وعلق الجهاز وهو يقول بسررررعه بسرررعه هاتي الجوالي وانا بس دموعي واغير الصورة وارميله الجوال وقلت تشوف من يجيبلي جوال اطلق من جوالك الي ذليتني به لان مو اول مره يهدد ياخذه مني

رميتله الجوال وتغطيت وصديت وقعد ابكي بدون لايحس من قهري

وجا العشاء وجلس ياكل ويقول لاتاكلين ازين ماحرمتي الا نفستس وولدي حبيبي يمد علي خبزه ويقول ماما يعني كلي ويقول لاتعطيها ماتستاهل مانبيها تاكل الحين اخذك منها وارميها عند اهلها خل تركب واتس عند اهلها

والله مت قهر بس خليته نكره يحارق يتكلم ماارد الين طفح وراح جاب علبه وفرغ الاكل فيها يقول بنعطي الاكل لعامل نظافه دامه زاد

طنشته وانا بموت من الجوع

بس والله ماذليت نفسي طلعنا من المطعم وقربنا من شارع اهلي وانا اطالع ولدي وابكي بحرقه بصوت مكبوت اخاف ياخذه مني مثل اخوانه الي قبل اخذهم طليقي مني ماابي اعيش نفس التجربه المره مرة ثانيه

وقاليهاه اوديتس اهلتس وطنشته مارديت وقالها مره ثانيه ولا رديت كان نفسي اصرخ بوجهه واقوله مااابيك ودني بس ولدييييي كاسر خاطري

ومن البارح مااكلت الا تفاحه وسندوتش صغير وولدي يلعب عندي ونمت برى غرفة النوم و طنشته بعد ماقريت البقرة

بس ماجاني نوم من القهر واحس بتنميل بجسمي وصداع وكاني مانمت من صحيت تعبانه

جاء صحاني الفجر قومي صلي وراح وجاء قبل شوي صلى الضحى وخمد

وجوالي ولافكر يعطيني اياه وانا ابتصل على اهلي ابستشير امي وودي اروح عندهم اغير جو احس ماني قادرة اتنفس

ارقامي كلها بالجوال وانا مطفره ماديا ودي اشتري جوال احلى من جواله وشريحه جديده بس كيف

وودي اغني نفسي ماديا عنه بس هو حالف لو توضفت يوديني لاهلي

كم مره طلبت منه الطلاق ويقول احبتس مااقدر افرط فيتس وكل ماقام وقعد اباخذ الثالثه ماخلى ولابقى احد الا وكلمه يدورله حتى انا مصخها معي كل شوي اخطبيلي ونتهاوش واحيان اطنشه اخر شي قلت شوف سيرة الجيزه ماتجيبها قدامي اذا تزوجت علمني وانا ذاك الوقت اتصرف اقصد اتطلق

ماني طايقته بس ابيه يغلط غلطه كبيره واروح

بس شايله هم البنت الي ببطني واخوها

ومو اول زواج لي مدري شسوي بمووووووت قلق

ادعولي ويااهل الخبرة شوروا علي والي تبي تتفلسف ولا تسب تجعلها تذوق ماذقت ترى تجربتي الاولى بالطلاق مررره خسرت ثلاث عيال الله يحفظهم لي ...

يعني الدنيا دوارة انتبهن يااخوات لردوكن لان الي في مثل وضعي تتحسس من أي كلام جارح وممكن يخليني اتهور

ابي الحكيمات يشورن علي الله يجزاكن خير

سبحان الله اعطي نصايح لغيري بس مشكلتي هذي مع هالزوج المتقلب عجزت احلها