السلام عليكم ورحمه الله وبركاته
لميا ربنا يارب يصلح حال بابكى ويوفقكم لل فيه الخير
كنزى ولا يهمك ياجميل بتحصلى كثير بس انا بقى عناديه تمسح واكتب لحد ماتطلع عين الكيبورد مش عينى
انجى ربنا يبارك ليكى ويصلح حالك ويديكى بنت زى جودى تمشيكى على العجين متلخبتهوش يارب ووصفه بالبرتقال بعد الصيف ماجه شوفى وصفه بالتفاح بالموز
تسلم ايديكم انتى مش جديدة انتى بقيتى صحبه بيت انا بصفتى عضوة مجلس الشغب اديتك العضويه
خالتى شيمو وحشنا دمك الشربات ويارب ترجعى الشغل علشان تنورينا والانتخابات دى تمت فى جو من الحريه والنزاهه من الملف الى قبل الى فات .
ام يوسف ام سوسو بتتاخرو كثير وبعدين مى ونانسى الف سلامه على جودى كل ماكتبلك انسى سامحينى محتاجه للدعاء المحبه للرسول الرمال ايناس رشا ياجميل انتى بعدى ماخذتى الغصن جالك كسل ولا ايه وبعدين الغصن دة لسه عروس ماوفقتش عليه ارجعى بسرعه
نداء لكل البنات المختفيات ارجعوا ------------------------------------------------

السلام عليكم ورحمة الله وبركاته

اللهم اجعلنا عبيد احسانك لا عبيد امتحانك
رحاب يا قمر
بتقولي ليه انك متضايقه من نفسك بلعكس كلامك جه في وقته حكايتك وصبرك في تحمل الالم وحسن الظن بالله ادالنا كلنا صفعه علي الوجه عشان نفوق ونشوف كل حاجه بمنظار مقرب ونحس بمعني حاجات كتير كنا بنقولها بلساننا بس من غير ماندرك قيمتها الحقيقيه في وقتها
ربنا يعلم كلنا بنحبك وحبناكي قد ايه وكلنا يا رورو فخورين انك معانا واننا نعرفك وان شاء الله نحسبك علي خير ولا نزكي علي الله احدا
ام البنات
هدي حبيبتي فرحت اوي بكلامك عن جوزك ماشاء الله لا قوة الا بالله جميل جدا انك تبقي فخوره بجوزك وبناتك فخورين بباباهم ربنا يديم عليكم المحبه والفرح يارب ويباركلكم في حياتكم وبناتكم
الحمدلله ان ايه حلت كويس وان شاء الله تجيب اعلي الدرجات يا قمر
ونصيحه يا دودو فعلا مش تعملي بالكريم تاني خالص لأنه بجد وحش واثاره سيئه جدا علي الجلد

انوج
ايه يا قمر كلمتين وبس انت فين بس ياعم اخر مره اتكلمنا النت عندي فصل وبعتلك تاني يوم رساله اونلاين اقولك يا تري وصلت واخبار يويو ايه
عروس
اخبارك ايه النهارده القصه فعلا حلوه اوي ((( هل جزاء الاحسان الا الاحسان )))
ام سوسو
انتي فين يا حبيبتي قصه سيدنا بلال حلوه اوي يالا تعالي قوليلنا يومياتك وكلامك الي بيدينا دفعه ايمانيه
زوجه مصريه
كلامك حلو اوي بس استني ايه موضوع الرجاله ده بجد يعني ممكن واحده تكون بتتكلم معانا وتكون راجل اصلا
يانهارييييييييييي هههههههه ربنا يستر
ام عبدالله
انتي فين ياقمر من امبارح كده مافيش ولا رنه انا امبارح الماتش عكنني اوي ونمت متضايقه وقلت بلاش اضايقك معايا كفايه اول امبارح ههههههههه
منمن حبيبتي
بجد وحشتيني اوي ايوا كده خلينا نكتب يومياتنا زي الاول وميرسي علي الدعوه يااختي الحنون ماهو ماينفعش امي علي فكره يابنات انا قولتلكم ان مني صغيره انا كنت فاكراها اكبر في العمر طبعا بس لما شوفت صورتها عرفت انها صغيره في السن يمكن عشان كلامها العاقل جدااااااااااا انا كنت فاكره كده
فيمل
اخبارك ايه يا جميل حلو اوي اسلوب الهزار والغلوشه مع جوزك بس طبعا في الحاجات الصغيره لكن لو بيتكلم بجد اسمع منه واقوله انت عنك حق وكده يابنتي ماهعو لازم لو جواه شحنه مني يفضيها اول باول عشان التراكم عواقبه مش حلوه
والحسد بلاش اتكلم فيه لأني عشت ايام صعبه جدا بسببه بس احنا مش ينفع نعلق كل حاجه تحصل علي الحسد بس نمشي بكلام سيدنا النبي عليه الصلاة والسلام (( استعينوا علي قضاء حوائجكم بالكتمان )))
ارجو عفو ربي
الحمدلله يا حبيبتي انكم اتصالحتو ربنا يبعد عنكم كل سوء يارب
لميا
انتي فين النهارده مختفيه
رشا
ازيك يا قمر انا اهو مش مختفيه بس تصدقي يظهر ان كل الي اسمهم يوسف مشكله انا كمان لقيت الي عندي عمل نفس الموقف كنت بخلص المطبخ وكل شويه القاه جاي يفتح الدرج ياخد اكياس فاضيه ويمشي انا قلت مش مشكله ابقي المهم ولما خرجت لقيت الطرقه الطويله الي عند بابا الشقه مليانه اكياس فيها لبسه ولعبه وكل حاجه تخصه في البيت تخيلي الكارثه البيه تقريبا كان معزل وبيلم هدومه
طبعا اختك قعدت تلم وترتب وتفرز لحد ما طلع عيني ربنا يهدي يا بنتي
ام مريم
انتي فين يا قمر رجعتي اختفيتي ليه تعالي طمنينا
كنزي
اعملي زي ما روشانا قالتلك انا كمان بعمل كده عشان حرقة الدم
شيمو ام سجي
اهلا اهلا ياقمر بقالك كتير مختفيه هو بيبي واحد يعمل فيكي كده امال احنا نعمل ايه يالا بلاش دلع خلاص بقينا امهات
ميوش
انتي فين يا جميل النهارده يالا تعالي هاتيلنا تمارين رياضيه خفيفه نعملها مع الولاد لما نصحي من النوم وتبقي شئ اساسي يوميا
هايا
ازيك يا قمر واخبار ملوكه ايه
روني
ايه الصور التحفه دي يوسف ابني لما شافهم من ساعتها وهو عمال يتفرج ومش مخليني اكتب حاجه مع اني جايباله كتب والوان بس فعلا اي صوره بتلفت نظر الطفل وكمان مستغرب لأنها زي الي عنده يبقي ايه الي جابها هنا ههههههههههه
ميرووووووووووووو
انتي فين تعالي طمنينا علي اخبارك يابنات الي يعرف حاجه عنها ييجي يطمنا
اسماء روبنز
اهلا بيكي معانا يا جميل نورتي
يوكي
ازيك يا انوس اخبارك ايه الصوره مش ظهرت

اسماء ام اروي واسماء تسلم ايديكم وام شهاب وكهرمانه ورشا ام خالد ونانسي ومادو وماما زوزو وتوته ومرمر ومرمر البتول وهبه ونرمر وتوته وايمالن وام سهيله وحبيبه وام جميله والرمال وام نادين وبيبي ايمي وروشانا وريهام بسلم عليكم كلكم وسامحوني لو نسيت حد

محشي البصل تحفة بس مش مشهور ومعنديش حد يحبة للاسف
ام سوسو اعتقد توصفلك احسن منى لانى اللى علمتهولى وعرفتنى عليه اول مارة جارتى العراقية الله يمسيها بالخير
شوفى يا ستى تجيبى بصلة او 2 كبار من الابيض الكبير وتقوريا شوية بيبي من فوق فى النص عارفة انتى مكان الشراشيب ما بتتطلع ووتعملى شق فيها بالطول من فوق لتحت بس ما توصليش للاخر
وتسخنى مية فيها شطة وكمون وتنزلى فيها البصلة كاملة شوية نص دقيقة مثلا وخرجيها هاتلاقى اول طبقة او طبقتين فكوا شوية تفصليه بالراحة داير داير البصلة وتكررى تنزلى فى المية وتفصلى لحد ما توصلى لقلب البصةهايبقى عندك زى الورقة الملفوفة كده تحشيها عادى وتلفيها على بعضها وترصى فى الصنية بالعرض
وحشوها اسهل حاجة فى الدنيا لانها واخدة شكل المحشي على طول مش محتاجة غلبة زى الكرنب وورق العتب
هيا تشبة فى تجيزها كتير الكرنب غير انها بتديكى الورق على اللف على طول مش محتاجة تقطيع
يا رب اكون عرفت اوصلهالك

سلام لكل البنات:
ارجو تدعو لحبيبتي نرمو ترجع للمنتدى بالسلامه يارب
:26:

السلام عليكم ورحمه الله وبركاته
روشانا ان كنت بحاول اففك البصل الصغير ومكنتش بسلقه فكان بيطلع عينى بس انا بحبه جدا ربنا يبارك ليكى انتو ولميا
انا مش عارفه اسمك بس ربنا يرجع نرمو للمنتدى بالسلامه
والله فكرة حلوة كل ماسال عن حد فى مشاركه الى كاتب فى الى بعديها او نفس التوقيت
مادو تعالى عروس طمنينى والا هروح اكلمك