ام سوسو يارب يصلح كل احوالك

عمرو خالد انا بحب استمع اليه ومصطفى حسنى كمان
اما جوزى اتاثر بكلام الشيوخ عن عمرو خالد لكن برنامج السنة دى بيشكر جدا فيه

انا بحب اسمع حازم شومان

لماذا محمد بيجى بعد الفطار على الرحمة


وكمان بيجى سيرة الرسول علية الصلاة والسلام قبله للاطفال جميل جدا







وياريت يا بنات اللى تعرف برنامج يعجبها تقول الساعة والقناة

ما شاء الله ولا حول ولا قوة الا بالله

ههههههههههههههههههههههههههههههههه
االله اكبر كتابتى رجعت الحمد لله

السلام عليكم ورحمة الله وبركاته

ام سوسو
الف سلامه علي البنات اللهم اشفيهم شفاء لا يغادر سقما وموضوع عمرو خالد ده من زمان وكتير اوي بيهاجموه
رغم ان برامجه دائما رائعه واسلوبه سلس وجميل انا عن نفسي بتابعه وبستفاد منه كتير وربنا يهدي

لميا
كل سنه وانتي طيبه يا قمر اخبار رجلك ايه دلوقتي يارب تكوني كويسه

تادو
انا كمان بحبك في الله معلش اتأخرت عليكي في الطريقه بصي هي مش هتختلف كتير في الطريقه الي لميا كتبتها
بس انا بجيب لازانيا مش بتتسلق الاول وبيبقي مكتوب عليها لأنها بتطلع احلي
والبشاميل هما كوبايتين حليب مع معلقتين دقيق كبار مع مكعب ماجي وملح وفلفل وتقلبي علي النار لحد ما ياخد القوام المظبوط
والعصاج نفس الطريقه بس الصلصه مش كتير يعني معلقة كبيره كفايه
وحطيت جبنه موتزاريلا مع جبنه شيدر وحتة جبنه رومي صغيره اوي وبشرتهم مع بعض
وتجيبي الطاجن البيركس وتحطي مغرفة بشاميل وتوزعيها وبعدين رصي اللازانيا طبقه واحده جنب بعض
بعد كده مغرفة بشاميل وبعدين طبقة عصاج بعدها طبقة جبنه
وطبقة لازانيا +بشاميل +عصاج + جبنه يعني تكرري الطبقات 3 مرات والبشاميل ضروري بعد اللازانيا عشان تستوي ما تنسيش
واخر طبقه الجبنه تكون علي الوش وكتير وتدخليها الفرن لحد ما تحسي ان اللازانيا استوت ولو مش كانت اتحمرت شغلي الفرن من فوق عشان الوش يحمر وكلي احلي لازانيا مظبوطه بالملي

الفراخ انا بتبلها من بليل توم مفروم وعلبة زبادي ومعلقتين مسطرده كبار وملح وفلفل وبهارات
الطريقه دي انا اخدتها من واحده في ملف ايمان بتاع الطبخ بجد حلوه اوي جزاها الله خير

ام البنات وبوتا ورواء وكنزي وروشانا اخباركم ايه يا قمرات

انهارده بقي كان يوم عملت ملوخيه بالارانب وارنب طبعا ورز بشعريه وسلطه ولقيت جوزي بيتصل بيه من الشغل بيقولي ماتعمليش سمبوسه انا هاجي اعملها لأنك مش بتعرفي تعمليها اتغاظت اوي وقولتله حاضر
زلما جه كتنرفز جدا ومش عايز حد جنبه قال يعني داخل يطبخ وخرجت وسبتله المطبخ وانا عماله اقول اللهم أني صايمه
دخلت بعد ما خلص وكان فاضل علي المغرب ربع ساعه قولت الحق احمر وكده لقيت المطبخ كله اتحول بقدونس في الارض والحوض فجأه اتملي مواعين وقشر بيض علي الحوض ومنظر يجيب اكتئاب
طبعا اللهم أني صايمه يادوبك حمرت وغرفت الاكل وعملت القهوه العربي جزاها الله خير ام عبدالله هي الي محوجهالي
المهم عمل السمبوسه باللحمه والبيض المسلوق بصراحه اول مره اعرف وطبعا ما دوقتهاش اصلا مش باكل بيض مسلوق ما بالكم بالعك ده لا وايه مصمم علي علي الفطار أني اكلوانا مش بطيق ريحة البيض والحمدلله اتخلصت منه بالعافيه
قولولي هو فعلا فيه سمبوسه بيتحطلها بيض ؟؟؟؟؟؟؟؟؟؟؟؟؟؟؟
علي فكره بعد ما عمل السمبوسه قالي لا هو العيب في السمبوسه نفسها نوعها وحش !!!!!!!!!!!!!!!!
هقول ايه بس ربنا يهدي

انا كمان متأخره اوي في القرءان لسه في الجزء التالت بس سبحان الله فعلا يا مي الصلاه بلقرءان حلوه اوي وبحس ان الركعات خفيفه اوي وبتخلص بسرعه والواحد بيحس بعدها احساس جميل
الحمدلله انا مش متابعه التلفزيون خالص حتي لما اقعد وهو شغال بكون باعمل اي حاجه يعني باكل مثلا او بأكل الولاد غير كده انا بعيد يارب ثبتني احسن جوزي ابتدا يزمزأ بيقولي انا عايش في البيت لوحدي
يارب اهديه يارب

اَللّهُمَّ ارْزُقني فيهِ الذِّهنَ وَالتَّنْبيهِ ، وَباعِدْني فيهِ مِنَ السَّفاهَةِ وَالتَّمْويهِ ، وَ اجْعَل لي نَصيباً مِن كُلِّ خَيْرٍ تُنْزِلُ فيهِ ، بِجودِكَ يا اَجوَدَ الأجْوَدينَ

ليمو انا بكتبلك من غير ما اعرف انك موجوده طمنيني علي رجلك اخبارك ايه

الحمد لله يا حبيبتى على كل حال

غليت خردل ونقعت رجلى فيهم وانا واقف بغسل المواعين والحمد لله احسن

ربنا يكرمك يا ام يوسف يا قمر

وتعيشى وتاكلى سمبوسه

انا بعمل العجين لحمه مفرومه وبيض مسلوق ويتلف رول واعمله حلقه

وكمان البيض الاسكتدلندى
وحلو ماشى الحال