ســـــائق الليموزين والحريم

انتهت حفلة الزواج ..وهم الجميع بالخروج من القصر .خرجن السيدات الثلاث ليجدوا الليموزين امام بوابة الحريم .....
قالت احدهن صديق ممكن مشوار (( السعودي لابس بدله ومزيت شعر راسه بسمن غنم ))
فتحن السيدات الثلاث الابواب وركبن السياره... .. بعد المشقه وبعد دز ولز و كز وحز تقدمت وحده ودخلت السيارة وما رجعت وبالقوة دخلت اللي بعده وهذا من كثر الاكل في الزواج !!(( والسواق صاحبنا يطالع في المرايه يتنهد بحقد وتذمر))وبعد مادخلو الثلاثة اغلقوا ابواب السياره بكل مااوتو من قوة .... تنفست الاولى الصعداء...وقالت : صديق امشي ...وما ان انعطف التاكسي للطريق العام حتى قامو في الرغي
الاولى :مابغينا نخلص من هذا الزواج
الثانيه : يوووووه !! وش هذالزواج
الثالثه : مالت عليهم وعلى زواجهم .... شفتوا كيف مقدمين عشاهم على طاولات وكراسي وماياكلون الا بشوكات وملاعق
الاولى : الله ياخذهم والله انحرجت انا ماتعودت اكل على طاوله وكرسي (( متعوده اتربع واضرب بأ لخمس))
الثالثه: انا للحين واللحم وورق العنب على كبدي ماانهضم اوف الله يعز النعمه (( ماكله الشوكه والسكين مع ورق العنب ))
الثانية : شفتوا نوف ووش زين رقصها مشاء الله عليها
الاولى : ايه مشاء الله على شعرها ياطوله
الثالثه : الا ماشفتوا هذيك اللي لابسه احمر مدري وش اسمها
الثانسه : اي وحده ام احمر
الثالثه : اللي لابسه احمر واخضر وحاشية ايدينها وصدرها وراسها ذهب
الاولى : تقصدين ام احمد
الثالثه : ايه مالت عليها وعلى رقصها المايغ مدري ليش ترقص وهي معصبه (( ام احمد داست علي فيش توصيلة المكرفونات وكلتها صعقة كهربائية220 فولت ))
الاولى : الا ماشفتوا ام فؤاد يوم تهاوشت مع عفاف ؟؟!!!
الثالثه : شفتهم بس من بعيد ماادري وشو حكايتهم !!!!!
الاولى: هذي ام فؤاد الله يسلمك ولدها فؤاد ضرب ولد عفاف على عينه وهاتك ياصراخ ولد عفيفوه هو في اخر صالة الحريم وصياحه واصل للحاره اللي ورا القصر وجات عفاف تبي تضرب الولد وفزعة ام فؤاد لولدها وتهاوشت مع عفاف
الثالثه : ياساتر وبعدين
الاولى : ام فؤاد طاحت في المسيكينه ضرب بكاسات الشاهي وعفاف تصارخ و قامت عفاف وشدت شعر ام فؤاد (( نشبت اصابع عفاف في فلافل شوشت ام فؤاد ومافكها الا الدفاع المدني ))

الثانيه : بصراحه ماضايقو الضيوف الا شريفه وعيالها الشياطين اللي مالهم شغل الا الجرئ بين الكراسي وضرب الحريم بالبردقان وقاورير المويه وشريفه نايمه ولا همها
الثالثه : صديق ممكن ترفع على المكيف ذبحنا الحر
الاولى : ايه شريفه هي والفستانين اللي بين كل زواج وزواج وهي مداومه على واحد منها
الثالثه : الا العروس وش اسمها
الثانيه مدري بس كني سمعتهم في الزفه ينادونها ريم
الاولى : لاتسئلون عن اسم العروس ولا اهلها اهم شي نعرف اسم المعرس عشان لو احد سئلنا

(( وشارفوا على الوصول الى الموقع المحدد ))



الثانيه : طيب حددتو القصر اللي بكره بنتقابل فيه
الثالثه : لا بس ليش مانغير جو ونروح لزواجات الفنادق
الاولى : بصوت منفعل .. لااااااااااااا انتي هبله تبينا نروح لفنادق !!! ماندخل عندهم الا بكروت دعوه .... ولا تبينا نتفشل انشالله
الثالثه : شسوي كله من العشاء اللي ماانهضم مخي لذع
الاولى : الا على طاري الهضم انا ماهضمت ا لهندي هذا(( بصوت عالي للسواق )) صديـــق وقف عند رابع بيت على اليمين مالت عليك
الثانيه والثاله بصوت واحد والله حنا مثلك
فجأة ضرب صاحبنا السواق فرامل ووقف !!!!!! التفت عليهم عيونه متناقزه حمراء وخشمه انتفخ وشعره واقف وصرخ في وجيههم ( وانت عطيتوا بطونكم فرصه تهضم جعلها القرح والجرح عشان تهضموني او ماتهضموني انزلو الله يقلعكم ))
فتحن السيدات الثلاث الابواب ونزلن من السياره بسرعه
وهم يصارخون سعودي سعودي ..... وماشاف صاحبنا الا والغبار وكئن لم يكن في المقعد الخلفي الا سندريلات الرشاقه والعود الميس !!!!!!
وضاع حق المشوار مع ضياعي في الهرجة ...

نــقــل



ام ليونه

اتمنى تكون اعجبتكم