سمعت انها سويت كذا - سألتها وقالت لي كذا } ومعلومات مهمة بالداخل

السلام عليكم ورحمة الله وبركاته


بالايام السابقة تواجدت كثير في هذا القسم ولاحظت كثييير من الموضوعات تبدأ بوحدة اعرفها كانت دبآآآآآا وصارت رشيييقة
وسالتها وعلمتني وش سوت ، وسمعت فلانة وسالت عنها ...... الخ من المعلومات اللي ماخذينها من الغير

ابي اقولكم لا تصدقون كل اللي تسمعون والله جد ! خاصة اذا كانت البنت سمينة سمنة مفرطة مثلا 130 وب 6 شهور
صار وزنها 70 مثلا ! مافيه جرعة سحرية !

الايام هذي عمليات البدانة جدا منتشرة ، فيه منتدى اسمة منتدى الدكتور سلطان التمياط الآلآآآف من الاعضاء مسوين عملية بدانة
طبعا ما اقول كل اللي نحفوا عملية لكن صدقون اكثر من اللي تتصورون ،


والمعلومة اللي من ذهب وما هي من عندي من كتاب ( استطيع ان اجعلك رشيقة ) هذا الكتاب كنز لكل شخص زايد وزنه

اللي ما يقراه ضيع على نفسه فرصة ، انا لي باع طويل < والله مدري من وين طلعت هالجملة هههههه

المهم انا قريت الكثير من الكتب وسمعت كثير برامج وسويت كثير ريجيمات بس مثل هذا الكتاب ما شفت

يخليك تعرفين كيف تتعاملين من الاكل وتنقصين اذا طبقتي الكلام بإذن الله بدون ريجيم مع العلم ان الكاتب يقول انه ينجح لـ 90٪ من اللي بيطبقون الكلام


واللي مب مقتنعة بالكتاب مع انها بتكون غلطانة ، الطريقة الاخرى لانقاص الوزن بطريقة عقلانة ( قانون بالاسفل )


بعيد عن مثلا ( ريجيم 12 كيلو في 12 يوم ) ،، ( ريجيم البرتقال والزيادي ) ،، ( ريجيم الفش فاش !!!!!!!! )

وغيره من الريجيمات اللي بيرجع ضرره عليك ، لنفترض نحفتي ٤ كيلو بالاسبوع اغلبيتكم رجعوهم

والمشكلة الفظيعة رجع معاه كم كيلوا ، وعلى هذي الحاله سنين !

وتكتشفين انك زدي 5 او 10 او 15 كيلو من بعد قرار اني بسوي ( ريجيم )


يعني الريجيم ساس البلا ،


ونقطة ثانية انا ما يضيق صدري الا اذا جت الوحدة سمينة او زايد وزنها وتقول ساعدوني ! المشكلة العويصة
تبي خلطه او مشروب او دواء !!!!! من جدكم والله ما يصير ! ، ممكن تخلينه عامل مساعد لكن تخلينه الكل بالكل ما تجي !

واذا تبين فعلا تنقصين تفضلي :

قانون الكل عارف انه صح : سعرات خارجة اكثر من السعرات الداخلة = نقص اكيد بالوزن
بغض النظر عن الطريقة ، اللي تبي تقلل اكل وتنوع فيه اللي تبي تسوي رياضة قوية اللي تبي ما تتعشى الا خفيف
اللي تبي تحسب بالتفصيل السعرات اللي اكلتها واللي تحتاجها ،،،، الكل وطريقته .


خلوا عنكم الحرمان

وخلو عنكم الاكل بدون جوع

والرشاقة باذن الله فالكم



واهم شيء لا والف لا للرغبة بالنتائج السريعة ! تمر سنين وحنا نبي نتائج سريعة ! ولا نجحنا
ليه هذي المرة ما نطول بالنا ونرضى بالنتائج ( ما راح اقول البطيئة ) لكن الأقل سرعة !
مفترض اكلنا يكون لذيذ عشان نقدر نتحمله ونخليه اسلوب للحياة ، اما الريجيمات القاسية والمؤقته فهي خيار خاطئ




بالتوفيق واعتذر على عدم ترتيب الموضوع ولكن كتبت ما في القلب لكم ،