أنا ولا فخر المفروض يحطوني في موسوعه جرجينز مدري جونسون المهم اللي تبع الأرقام القياسيه في الأفكار تدرون لييييييييه؟ أقولكم ليه ...
وصلنا الحلقه السابقه يوم التحطيم وشفتوا كيف أنا وأختي حولنا فشلنا المقدع الى مشروع ناجح واتمنى الكل يسوي نفس اللي سويناه بحذافيرة عشان لاحد يندم ...
طبعا كان مشروعنا عطارة نسائيه 100% والقرار جاء نتيجه ان كثير من النساء ما تعرف وش تسوي اذا ارتفع ضغطها (من زوجها )أو اذا جاها إمساك ( من زياده البلع ) أو إذا ولدها سخن (الجني من صبح يلعب في الشمس والأخت تسولف )وووو ... فأعجبنا بفكرتنا وقررنا نسوي لها دراسه جدول جبت جدولي أيام المتوسط وبديت أكتب السبت الحصه الأولى إمساك الحصه الثانيه سكر الثالثه احتياط لأني بداوم الأولى والثانيه واختي بتاخذ إحتياط عندي وانا باخذ احتياط عندها ...
لين وصلت يوم الربوع السادسه والسابعه خليناها نشاط ريادي ( جدول مايخرش الميه ).. :42:
بعدها صرنا نتابع كل البرامج المتعلقه بالأعشاب الطبيه ولو برنامج ارضنا الخضراء أهم شيء فيه أعشاب نتابع ونكتب ما خلينا قناه صالحه ولا طالحه الا وشفناها المهم صرنا خبيرات أعشاب ولله الحمد ذكروني اعطيكم نسخه من كتابي عشان تستفيدون ....
المهم اتفقنا على الجدول ودرسنا الأعشاب بعنايه فائقه لاكن لازم ننصب رئيس مجلس الإداره لشركتنا آآآآآآه صح لايفوتكم نسيت أقولكم وش اسم الشركه ... حقيقه اقترحنا عدة اسامي منها أسامي اقترحتها اختي الخبله اسمعوا بالله ( قيس وليلى , روميو وجلييت , كثير عزة ... هههه بالله هذي أسامي ؟ ماتحسونها تعاني من جفاف عاطفي ؟ احنا فاتحين محل عطاره والا كباريه ؟وبعد مغبرين ليتهم جدد .. أما الأسامي اللي انا اخترتها فكانت ( ادخلي قردة لتخرجي ورده ( ملقوطه بس بأكشخ بها قدام أختي ) ,نيفين وبنسلين , معتوقه ومفتوقه , معيضه وبغيضه , ليلى والذئب , الفجله الكبيرة هذه اول قصه قريتها أجنحة الكاندام عاد اختي تبي تحطمني قالت يووووووه غباااااار كح كح كح وجلست تكح كح لين قالت بس رحمتها وجبت لها مويه قلت غريب وين ذا الغبار اللي في حلقك وما وصلني قالت وش ذا الأسامي المعتقه لو باعوها في سوق العود جابت قيمتها .. أنا : وجع ياخذك ان شاء الله وانا اللي اجيب لك مويه ورحمتك ... اسمعي الموضوع ماينسكت عليه لابد من وضع اجتماع عاجل واتفقنا يكون في غرفتنا وصحيت أخوي الصغير من النوم توه جاي من المدرسه قفلت الباب وخليته واقف عند الباب وهو مفتح عيونه عشان يسوي اللمبه الحمراء اللي في الإجتماعات دايم تجي في المسلسلات المهم ما يدور في الداخل لا يسر عدو ولا صديق بدأ الإجتماع بآيه من الذكر الحكيم قريتها أنا لأن صوتي أجمل من صوت أختي تعرفون البلبل إذا غنى هذه أنا .. لايفوتكم صوتي وانا أغني لاتخافي لاتخافي نحن أبطال المطافي يجنننننننن بس ما باغنيها خوفا من العين المهم بدأت الكلمه الإفتتاحيه للجلسه الأولى لأعمال القمه العربيه ( برضه من التلفزيون ) أنا بسم الله والصلاة والسلام على رسول الله اصحاب السمو أصحاب السعاده الإخوه الكرام ايها الحفل الكريم يسرنا ان اليوم يتم افتتاح اعمال القمه الأولى بحضور رئيس الجلسه العضو رجالة الأعمال ( لاند كروزر )هيييييييييي ( هذه أنا )والعضو الآخر ( تويوتا )أختي هووووووو يابنات بصراحه الأسامي حلوه عجيتني لكن المشكله انها ليست مفهومه عند الحريم الكبار ( الزباين )بعدين يحسبونها أسامي السيارات فغيرنا أنا بحطه بأسمي ( نيفين )وأختي بخليها ( بنسلين ) أختي ما اقتنعت بالأسم وانا أحاول أقنعها بس ما فيه فايده قلت لها : عاد من زين إسمك الحقيقي قالت والله انه أحلى من وجهك اللي كأنه مشمش مجفف .. أنا : بالله عاد من زين وجهك اللي كأنه عشبه رجل الأسد ( وجهها نحيف وقاعده تشقر الشعر الصغير اللي في وجهها صايره تحفه خخخخ ) أختي : على الأقل أهتم بجمالي بشرتي ناعمه مثل بذرة الكتان مو مثلك كأنك خولنجان ...وتطور الصراع الى مالايحمد عقباه
لكن أحسن مافي الحرب العشبيه هذه اني اتعلمت زين انا واختي عن الأعشاب حتى صارت تؤثر في حياتنا اليوميه المهم ما ادركت الموضوع الا وجهي ووجه أختي صار حزن يفشل من الكدمات فأخذنا خلطه صلحناها للكدمات وهي ( مويه وثلاجه تحطينها في بعض وتحطيها على وجهك ) المهم اتفقنا على كل شيء بما أني الغالبه في المعركه أذعنت أختي النعومه اني اسميها ( بنسلين) انفض الإجتماع وصلحنا أول خطوة وهي تجهيز البدروم ليصبح مكان العطاره وجهزناها ثم الخطوه الثانيه وهي التسويق (خطييييرة )فأخذنا ورق دفتر الرياضيات (عشان نكتب ونقص بشكل متساوي) وقصقصناه على شكل كروت كثييييرة و كتبنا فيها ( هل تريدين الرشاقه ؟ هل تريدين الجمال؟ هل تريدين ان تكوني سيده العالم الأولى ؟ هل تبغين اذا مشيت احد يسوي لك كذا 
؟ (لكن اذا سواها سوي له كذا 
) ... اذا حياك في عطارتنا عطارة ( ادخلي ورده لتخرجي قرده ) وسيكون افتتاح المحل يوم الخميس ليله السبت الموافق ..... المكان ..... المهم الإفتتاح حيكون اليوم وزعنا الكروت بدون ما نركز من كثر الحماس قلت لأختي كيف نقابل الناس بالوجيه المعفطه هذه ؟ لازم نروح عند المشغل يسوينا وفعلا رحنا صباح يوم الإفتتاح المشغل وخليناها تسوي لنا مكياج مميز وتساريح عرايس ورجعنا البيت وندور لنا ذيك الفساتين الكششششخه لو أقولكم شكلها بتقلدونا ماراح أقولكم والا تدرون ؟ ... يالله بقولكم انتم صديقاتي عادي .. فساتيننا هي فساتين زواج خالي يوم انزفينا معاه أنا ماسكه الورد واختي الشمعه طبعا الفساتين كانت هادئه كنها للعزاء لونها أحمر دانتيل طويله و من تحتها ستان أسود وع وع وع ترى لاتحسبون هذا ذوقي ما لبستها الا وانا أبكي تعرفوني أموت على النعومه بس اليوم غييير اخذت الفستان من الوسط وطلعته لين صار لين نص الساق طبعا الباقي دخلته في السروال الطويل من جوا يعنني عندي فستان قصير ومن تحت سروال على الموضه ( طبعا السروال أسود طرزته من فتره بأحمر غرزه السراجه وكتبت عليه ذكريات زمان كلها زي الموديلات اللي طالعه الحين مو كلها كتابات عربيه على الفساتين ؟( شوفوا الإقتباس وشقيت الأكمام بدون ما أخيطها لأني بألبس فوقها شال نمري بترتر عندي من زمان والحين جاء وقته اختي غارت مني وسوت نفس الحركه بس اني قلت لها لا انتي خلي من قدام طويل ومن ورى قصير قمت ربطت فستانها من الطرف على جنب صار على شكل ورده وصار من قدام فوق الركبه ومن ورى تحت الركبه يجنن تمنيت اني اسويها بس يالله خليها تتهنى مسكينه طول عمرها مقربعه بس من تحت لبست سروال البرمودا حق أخويه الصغير اللي ماعاد شافه ( يروح حصه البدنيه بفنيله من فوق وسروال سنه )سبق وقلت لكم عنه .. جربوها حركه مميزه يوم شافونا أخواني ما عرفونا يقولون نحسبكم دراكولا وأخوه
انبسطنا أول مرة أحد يمدح جمالنا.. المهم ونستنى الناس جهزنا القهوه والشاهي والمكسرات والحلى وكللللل شيء والساعه 5 الا نص والناس عند الباب واحنا نستقبل ياهلا يا مرحبا الله يحييكم والناس متفاجئين من جمالنا حتى شغلنا شريط ( ياهلا بالحضور يوم لبوا النداوي أقبلوا بالبخور مسك وعنبر وكادي وانا أرقص واستقبل ونجلسهم بالمجلس وأقهويهم ذيك القهوه السنعه إلا قالت وحده : انتي مين ؟ قلت لها نيفين وهذيك بنسلين قالت الله يعافيكم حنا ما جينا نتقهوى بس بغينا نشوف بضاعتكم الخلطات والأعشاب المعلنين عنها .... أنا هنا أنصدمت كأن أحد كب علي مويه حاره جمدت مكاني وطاح الفنجان من يدي ( مثل المسلسلات )
احنا رحنا المشغل نتزين ونتهبل وتركنا البضاعه الأعشاب اللي محد جابها لنا الى الآن ؟ قالت الحرمه هاه وينها ؟ قلت اصبري الحين تجيك وطيران على أختي روحي بسرعه دبري لنا أي شيء من المطبخ خلطات أي شيء قالت : افا عليك هذا اختصاصي لا تتوترين ولاتخافين انا اتصرف راح تشوفين شيء يكون لك مفاجأه
وراحت وانا كل شوي أقهوي الحريم والناس يسألون وانا أقول هذا حفل افتتاح يعني نكرمكم أول وبعدين تشوفون البضاعه وانا أراقب أختي تخرج من المطبخ محمله أشياء وتحطها في البدروم بكل سعاده حسيت انها حابه العمل كأنها فراشه 
تتنقل بين الزهور فرحت اني سويت شيء يخلي أختي فرحانه ومقبله على العمل بكل محبه وشوي الا أختي تأشر لي : منسيه يالله خليهم يجون وانا قلت يالله ياحريم اتفضلوا شوفوا بضاعتنا قالت وحده : انتي منسيه والا نيفين ؟ قلت : هاه ؟ ااااا نيفين ويدلعوني منسيه قالت وأختك وش يدلعونها ؟ أنا بكل براءه : غيثه ضحكت ( أثاريها تتصيدني ال... وامشي بكل هدوء وثقه وغرور عشان التسريحه ما تخرب 
ودخلوا الحريم ثم دخلت انا و هنا كانت المفاجأه 
... ايش تتوقعون بيصير ؟ تابعونا في الحلقه القادمه ..
ولاتنسون الردود ؟؟
لي رجعة يالغلا