اليا أقبلت طلتك ماعقبها طله ..... أشري مجالسكم ولو لو بالذهب كله
الله يسعدكم على هذه الردود الجميله يعني اللي مر فوق ال ... ومارد الا .... بلاش فضايح بس ان شاء الله تكونوا اتسليتوا ؟ يابنات اللي اتسلت ترفع يدها طيب ؟ يالله من اللي اتسلت ؟
ماااااااااااااااااااااااشااااا ااااااااااااء الله كلكم اتوقعت اكثر من كذا يالله الحمدلله بالأمس كنا قد وصلنا الى المفاجأه واليوم بتشوفونها الله لايوريكم ....دخلوا الحريم ثم دخلت أنا بنفس الثقه بالنفس وأطالع إلا شيء مو طبيعي تخيلوا ايش جابت أختي من المطبخ ؟ على الرفوف ( علبه كمون فلفل بهارات الشوربه بهارات هنديه حقت الشغاله بهارات جاويه ( لي ) بهارات بحرينيه وعلبتها مكسورة بعد الرف الثاني كم علبه تمر وشوي بيض وبسكوت أخوي الصغير اللي ما يخلي أحد يمسكه و حليب في كيس و.... كيس بطاطس لي ليز عائلي بالجبنه الفرنسيه مفكوك وحاطته:o ؟ شوفوا المتخلفه يالله أول مرة أعرف أنه فيه كائن حي بهذا التخلف ما نقص الا رضاعه وشوي حفاظات وتصير بقاله الله لايعطيك عافيه هذه المفاجأه اللي تقولين عليها ؟ ما لقيتي الا بطاطسي المفضله ؟ لو انها كانت بالملح كان هانت لكن شيء يخص اللغه الفرنسيه ؟ لو بدون البطاطس كان محل العطاره منافس شريف لكل محل عطاره بس من يفكر ؟
والا وحده تقول هذه من جد والا تمزحون ؟ قلت : لاوالله من جدنا بس .... وشوي الا وخدي يرقص مثل الحلقه الثانيه ... وبرضه بأشوفها في الإعاده حرام أظلم الحرمه انا انصدمت أكرمها وأضيفها وأعطيها بطاطسي المفضله وتعطيني كف
؟ قلت لها انتي من جدك والا تمزحين ؟ قالت من جد قلت أشوى لأني ما أحب المزح اللي زي كذا .. قالت الحين حنا تاركين عيالنا ورجالنا وجايين عندكم نشوف بضاعتكم تسوون لنا عرس ماله سنع وبعدين تقولون جد ؟(والله من زين العيال والرجال كلهم محد يطالع في وجهها كلهم برا البيت واذا جو اسمع صياحهم في بيتنا يعني اليوم جاء حب الأسرة )؟ انا والله من يوم شفت عرس المهبل وانا شاكه بالموضوع العيب مو عليكم على اللي يجيكم ........... يالله انا كل هذا ما همني لكن كيف تقدر تقول الكلام هذا كله بنفس واحد 
؟ مع اني يوم شفتها قلت يمكن ملخبطه بغت تشتري لها كفن تحسبنا نبيعه هنا .... الله أكبر عليكم يالحرييييييم والله لو ان الوحده في سكرات الموت وأحد داس لها على طرف إنه ليلحقها أعوذ بالله ... ياخساره التسريحات ياخساره المكياج والفساتين المبتكرة آآآآآه وكالعاده رحنا نبكي انا وأختي وأمي تهدي فينا واحنا منغمسين في البكاء وهي تهدي وتهدي لين رضينا ويوم رفعنا روسنا الا وأمي تشرد من الغرفه شفتها تقرأ المعوذات وهي خارجه ولا أدري وش السبب قلت يمكن انها تبي تقرأ علينا عشان ما نفحم زي الصغار
والا طولت ما جت بصراحه خفت على أمي وقمت أشوف وينها وتطيح عيني على المرايه اللي في الغرفه وأشوف نفسي وهنا عرفت السبب
واذا عرف السبب بطل العجب لكن أخاف اني أخذت أثم يوم اني خرعت أمي والله بدون قصد ... رحنا نغسل وجيهنا وتعوذنا من إبليس ورحنا سوينا لنا ذاك العشاء السنع ( أمي مانادتنا للعشاء فهمت المغزى بس ما قلت لأختي الرقيقه خوفا عليها من الإنهيار ) وفكرنا شوي بسلبيات الموضوع اكتشفت ان الحريم زعلوا من وجود البطاطس وان المحل فاضي ومنا احنا شخصيا ومن ملابسنا والاستقبال والبطايق والحلى اللي ماقعد منه شيء فقط لاغير فحطينا خطه جديدة الا وهي ممنوع بطاطس ـ لابد من توفير بعض الأعشاب ــ توفير بطاقات سنعه والله يعين على الحول اللي بيصير (فقدت دفتر الرياضات ) ولابد أن نلبس أنا واختي من ملابس أمي ونلبس عبي وطرح كأننا كبار( ياي وبعد هذا ما نحتاج نتنكر شكلنا يعطي 60 سنه وما فوق بس خلوه سر بيني وبينكم ) وفعلا سوينا كل هذه الخطوات وصارت لنا شهره باسمائنا المستعاره ( معتوقه ومفتوقه )البدايه كانت أشياء معروفه مثل الحلبه للنفاس فكس للكتمه زيت زيتون للعين كمون للإنتفاخات مويه غريب عشان ابن امه اللي يقدر يبكي بعده أبو حصان منوم الأطفال (ننصح به عند الذهاب للعروس منوم كذا ) ومشى الحال الى أن جاء يوم وجتنا فيه حرمه تقول : ياخاله قلت في نفسي بدينا ؟ تخلخلت عظامك (وهذا في مصلحتي عشان أمرخها و تصفقني إذا قامت على رجولها ... المهم قالت : أنا ماأجيب عيال ودي تفحصيني وتعرفين السبب قلت مو مشكله ( اتذكرت فحص الدكتورة اللي في الوحده الصحيه سهله ) المهم قالت حطيني في غرفه لحالنا قلت : وماله اتفضلي .. ودخلنا وشويه الا الحرمه بدت تسوي حركات مريبه تخيلوا جالسه تنزل ملابسها ... يالله ماهذا ياهذا ؟ وش تسوين يامرة ؟ قالت عشان تشوفيني .. انا وش أشوف ؟ قالت هههه ..... والله قالوا لي انك تحبين المزح بغيتك تشوفين المشكله اللي عندي قالوا لي انتي حرمه كبيره وتعرفين من اللمس غطيت عيوني وانا أستغفرالله .. يالله شكلها بتخطفني والا بتصورني معاها والا تتبلاني بنات ذا اليومين ما ينومنون وأصييييح الحقوني الحقوني الحرمه انجنت والا الحريم عندي في الغرفه وش فيه قلت شوفوا... الا كلهم يقولون آه يكلمون الحرمه : الفحص لازم تنزلين ملابسك كلها وهذا للعلاج يعني مو حرام هيا قومي وخلي الحرمه تفحصك (ما يدرون اني ما أعرف أصلا وش تفرق البنت من اللي ما تزوجت بعد أنا الآن قلت يالله عادي الوحده تنزل ملابسها لكل وحده ؟ طب لو طاحت في وحده ثانيه غيري ايش كان صار ؟ الله المستعان وأجمع كل خبرتي وأبدأ الفحص انا : أفتحي بؤك قالت نعم ؟ قلت إفتحي بلعومك وفتحت قلت يالله عندك إنسداد قالت وش دراك ؟ قلت واضح قالت ما شاء الله عليك والله الدكتور قال لي وانا ما صدقت أجل أدفع ذيك القيمه وهنا عرفت بقيمه أقل والله لأسوي لك دعايه إنك مختصه بأمور الحريم ..أنا هاه ؟ ( فااااغره ) قالت أنا فعلا عندي انسداد في الأنابيب سويت نفسي فاهمه قلت تعرفين داك مسلك الأنابيب مررررة حلو استخدميه قالت لا الإنسداد اللي قلتي عليه واتذكر ( أنا قلت انسداد لأنها ما تقدر تتكلم بسهوله فجاء في بالي انه انسداد في الخشم ) يالله وشلون صابت ؟ يالله بعطيها فكس تاكل منه لين تقول آمين وخذته قالت : الله يسعدك ويعطيك العافيه أنا لي 15 سنه ما جبت عيال والله اني لأدعي لك وجلست تبكي اعطيتها مناديل وجلست أبكي معاها
(قلب ذهب ) وراحت وانا متأثره وشوي الا داخله علي حرمه قالت ياخاله ودي تمرخيني .... صدمه ثانيه انا : نعم ؟ قالت تمرخيني أقصد تدلكيني توي نفاس سنوني وبطني وظهري وكلي يعورني قلت : من جدك والا تمزحين ؟ قالت أنا فاهمه قصدك إذا على القيمه لايهمك أنا بأعطيك اللي تبين ... يالله وش أسوي أحلف اني ما أعرف ؟ بس قلت يمكن تصيب مثل الأولي قلت :وماله ؟ تعالي قالت انسدح ؟ قلت وماله ؟ انسدحي الحين افتحي فمك ... قالت ليش ؟ قلت ماتبين أحد يدلك لك ضروسك ؟ (يعني يفرش بالفرشه) ؟ قالت ياخاله الله يسعدك قالوا لي ان عندك روح الفكاهه .. انا والله ابويه أمس جاب لنا فاكهه ودك ؟خوخ منجى أي شيء ؟ ضحكت وانسدحت على بطنها قالت تبدئين ؟ قلت وماله أبدأ وجلست أفكر لين ما طلعت عندي فكرة الدغدغه يعني بما انها انسدحت ليش ما أدغدغها ؟ والله فرصه متعوده على أختي ... وبديت أنا أمسكها وأدغدغ وهي تضحك تضحك تضحك ربع ساعه لين بغت تموت شفتها تبكي 
وقلت ... ذحين دوري قالت ... الله يسعدك أول مرة أشوف تمريخ يضحك وقامت مالها حيل تقوم وعطتني المقسوم قالت ما بتعطيني شيء أتمرخ به ؟ قلت أفا عليك خذي وأعطيتها علبه صغيره فازلين قالت بكم ؟ قلت ياعيباه هذه المره عليه ( تبون الصدق طلع التمريخ هذا وناااااسه ويش رايكم تجون تمرخون عندي؟) ويوم من الأيام جت عندي حرمه تقول يامطوعه أنا عندي مشكله ما أجيب عيال قلت وانا وش دخلني قالت السبب من زوجي مو مني قلت : أفا أنا ما أمرخ رجال لكن ممكن أخلي أخوي يدلكه ان إحتاج الأمر والا أقولك افحصيه قوليله إفتح بؤك وخلاص .. قالت لي : لاااااا ما فهمتيني ... زي ما تعرفين زوجي ... وجلست تشرح لي ربع ساعه الله وكيلكم ما فهمت وش تقول يوم انتهت قلت : هاه؟ اههههههههههه هههههههه جلست أضحك أضحك أضحك قلت سبحان الله كأنك عارفه إني ما ضحكت من زمان قومي الله يستر عليك عندي شغل قالت : كنت حاسه انك ماتعرفين يالنصابه يالدجاله وقامت تسبسب .... مسكتها من اليد اللي توجعها قلت بتقومين والا أفضحك عند الحريم ؟
قامت بكل هدوء خرجت وسكرت الباب بعد ( ما أحب أكون كذا لكنها ما أحترمتني .... هكذا كل ما وحده جت تتمرخ طلعت تضحك ومعاها علبه فازلين الحمد لله صرنا نربح صرنا نبيع بهارات ناخذ الكيلو بخمسين ونبيعه ب40 ريال يعني مكسب حلو مرررة ومرت الأيام .....وأقرأفي الجريده عن حالات تسمم كثير في منطقتنا وأنا أقول لأمي لاحول ولاقوه الا بالله هذه نهايه اللي ما تغسل أكلها بنظافه ....
شوي الا والباب يدق يوم إجازتنا الا وحرمه تقول :وين المطوعه معتوقه ؟ قلت هذا انا لكن اليوم ماأشتغل عندي (off) قالت ما بغى منك شيء بس ودي أسألك انتم عندكم تصريح ؟ قلت يعني ايش ؟ قالت أحد سمح لكم تفتحون المكان هذا ؟ قلت إيه أبوي قال خذو الملحق قالت اها أجل اتفضلوا معانا قلت وين حنا ما نطلع طلبات خارجيه قالت تعالوا معانا لقسم الشرطه انا ليش الشرطي يبي تمريخ ؟ قالت :لا طال عمرك فيه حريم مقدمين ضدكم بلاغات.. أنا : ليش ؟ ما عجبهم التمريخ؟ قالت لا هناك تعرفين ....
يالله وش ذا الورطه ؟ وش أقول لأبويه ؟ بعدين يصير يشك في أخلاقي وأسوي نفسي دايخه وأطيح قامت أختي سوت نفس الحركه وتطيح ما دريت الا الحرمه تقول بتقومون والا أعطيكم كف ؟ قلت : لالا خلاص احنا كنا نمزح معاكم
... ورحنا مركز الشرطه و.........والا بلاش أقولكم خلونا نشوفها بعد الردود السنعه