أول يوم في التاريخ .....
تتوقعون من متى بدأوا يعدون الأيام ؟ بتقولون بالهجري والميلادي ؟؟ بقول كح كح كح كح كح هبت عاصفه من الغبار يالله من فتح علينا باب الحوش ؟ أنا أقصد من أيام آدم عليه السلام تتوقعون كم يوم ؟ وكم ساعه ؟وكم ليله ؟ يالله يا بنات الرياضيات شدوا الهمه طول عمري من يوم وأنا سنه أولى أدور للرياضيات فائده وماني لاقيه يعني اذا فهمت الجمع والطرح والضرب والقسمه وش له داعي كثره الكلام ؟ معادله من الدرجه الأولى ومن الدرجه الثانيه لا أحسن من الدرجه السياحيه ولا عليها رسوب ونجاح بعد ( بصراحه كم وحده تقرأ الموضوع قد رسبت في الرياضيات ؟ ) ترفع يدها بسرعه هههه
.. لا ويمدحون اللي تدخل في الجامعه والا الكليه قسم رياضيات كأننا ناقصين حصص ويعتبرونها ذكيه واذا لما تكون البنت أدبي وتدخل تاريخ يقولون لها طيب ليه ما اخترت قسم ثاني ؟ يعني بالله وين تروح ؟ طب مثلا ؟ لا والمسكينه عشان ماتنحرج تقول بغيت أدخل أحياء بس النسبه ما أهلتني ...طيب يا آدميه أنتي أدبي حتى لو جبت 1000% ما تطبين لو تموتين قالت لا .. أنا كنت أحب الأحياء بس لأن مدرسه الأحياء متقعده لي دخلت أدبي ... يالله مسكينه تحسب إن الأحياء في الثانوي مثل الجامعه ههههه الله لايبلانا حبيبتي اذا سألوك مرة ثانيه قولي حررررررررة بكيفي عاجبني القسم إذا صرفتوا عليه من جيوبكم تعالوا إسألوني كأن المملكه راح تخرب جميع أحيائها وأمواتها لأنك ما دخلت القسم اللي يبونك تدخلينه ...ماعلينا دعوا الخلق للخالق ...( بعد ايش )... نرجع لبدايه الموضوع دايما أسأل نفسي صدق فيه مخلوق أسمه ديناصور ( لاحد يطالع فيني محد سماني بهذا الإسم بس أسأل ) مدري كل ما شفته على التلفزيون ما يدخل مزاجي انه كان موجود من زمان ... ودي ان واحد بس من الفراعنه عنده جوال واسأله لكن للأسف اللي أعرفه اتصلت عليه وقالي ماعنده شحن بعدين يشحن ويقولي ... ( عندكم سلف 10 حجرات أسلفها الرجال عشان يشحن بالعمله الحجريه ؟) ..
وبكذا يكون خلصنا حلقه اليوم
....ياهوه وين رايحين أمزح تعالوا ما صدقتوا تروحون ؟ ليه حصه رياضيات ؟ ( انا والرياضيات في زحمه ) المهم عشان أتأكد طلبت من الوالد العزيز إنا نقوم بزياره لمركز الملك عبد العزيز للأرصاد الجويه عشان أشوف الديناصورات على الحقيقه وأكتشف أمرها قال لي لا قلت نعم ؟ قال لااااااااا قلت اذا ولد أبوك قولها لي مرة ثانيه وشوف وش بيصير ... الا يوم فتح عيونه فيني (عاد اذا فتح ابويه عيونه من يقفلها
؟) انا نسيت الموضوع احسبه واحد من أخواني من كثر الميانه لكن اتذكرت انه أبوي قلت .. بابا حبيبي ليه ما تبغانا نروح ؟ مو حرام تكسر بخاطر بنوتتك ؟ من لك في الدنيا غيري ؟ قال والله أكسر بخاطرك ولا أكسر قلب الديناصور يوم يشوف انه فيه كائن حي مخيف أكثر منه وهذا يؤثر على نفسيه الديناصور لأنه يحسب نفسه الكائن الوحيد الي يشكل مصدر رعب للكائنات الأخرى .. أنا
... والا وضحك أخواني وأخواتي كللللللهم هاهاهاهاها هاهاهاها هاهاهاها انا طالعت فيهم بنص عين قلت لا تفرحون يابقر كلنا متشابهين ماتعرف البنت من الولد الا بالعبايه يعني كلنا مقصودين .. الا وسكت الكل وأطرقوا رؤوسهم ( أحسن عشان ما يتريقون على بلاوي الناس ).... يالله بابا ( انا نشبت لأبويه واذا نشبت فأنا مثل لزقه جونسون لايمكن انقلع من وجهه الا اذا وصلنا عند باب الديناصور ) أبويه يا بنتي والله اني خايف على الديناصور لا يهرب ماعاد يرجع يضطرون يحطونكم في المتحف بدالهم بعدين من وين لي ناس أخرع بهم الجيران عشان ما يوقفون مكان سيارتي ؟ ( أبويه يستغل مواهبنا في التخريع استغلال سيء احنا صح مخيفين لكن بداخل كل منا قلب طفل ... شاعريه ) ...بابا ... خلاص الله ياخذك بعد أذان العصر القاكم جاهزين .. كلنا هي هي هي هي ونجري نجري نجري نطيح على أبويه نسلم عليه وهو يقول والله لو ماقمتوا ما أوديكم بصراحه خاف على نفسه يقوم ما يلاقي أحد أعضاؤه ماينلام ) المهم بعد صلاه العصر الا وكلنا جاهزين وجهزنا معنا أدوات الرحله ( شاي قهوه عصير حليب مكسرات حلى ومعجنات فحم بندقيه أبويه الله يحفظه ( بابا قنااااص غزلان ) كود يشوف له ديناصور مار من جنبنا ويصيده طبعا مانسينا جزة الشوي وأبو فروه وسياكل أخواني وجينا معنا فول سوداني عشان نأكل الديناصورات ومانسينا جبه أبويه عشان البرد يعني كل مستلزمات الرحله الا أمي الله يسعدها أصرت إنها تجيب قدر الضغط عشان نسوي كبسه ديناصور ( مضغوط ) قلت لها ياماما بتضحكين الناس علينا أحد يروح عند الديناصورات بقدر الضغط قالت اذا ما دخل ما أدخل وأضطرينا ناخذه لعيون الغاليه ..
المهم وصلنا الا ومكتوب ممنووووووع ادخال المأكولات والمشروبات فسوينا حركه ذكيه أمي دخلت قدر الضغط في بطنها كنها حامل وابوي لبس جبته والأكل دخلناه في جيوبنا والقهوه والشاي تورطنا فيها بس مع السواليف تهربت تحت العبي لكن اتورطنا في الفحم وين وين وين ؟ جابت أختي فكرة قالت : أنا بحطه تحت ملابسي كاني حامل زي أمي لكن أمي رفضت وقالت عيب قلت لها ياأمي مدام انها أصرت من بيعرفها والعبايه عليها ؟ قالت أمي خلاص بس تسويه كنها في الشهور الأولى انا : بالله ؟ ليه خايفه ديناصور يحط عينه عليها بيخطبها يلقاها حامل ؟ والله انكم نكت يالحريم المهم نفذنا الخطه ودخلنا بسم الله إلا وإذ بي أتفاجأ بأن الديناصورات كبيييييييييره أكبر من أي شيء ممكن تتصورونه أكبر مني ومن أختي ومن أخواني ياربي ايش تاكل ؟ هذا شيء والشيء الثاني كلللللها ميته ومحنطه الحقيقه اني بكيت تخيلوا انكم داخلين على متحف أموات قلت بابا ممكن نقول دعاء الدخول بالمقبرة ؟ قال نعم ؟ قلت كلهم أموات واحنا بنلحقهم ...يعني احسن عشان اذا مت زيهم تلاقي من يترحم عليك ويدعي لك .. أبويه ارتفع عنده المؤشر
وسحبتني أمي من أذني وقالت لي في أذني بهمس رقيق انقلعي قبل ما يفضحنا أبوك ... انا انسحبت بكل هدوووووء ..اللي أحزنني فعلا ان ابويه مابيصيد ولا استفدنا من قدر امي ...
لكن ان شاء الله بنشوي أبو فروه ولا أحد يهمنا المهم وقفنا عند ديناصور كبيييييير سبحان الله واقف على رجوله وهو ميت والله ... هذا اللي يقولك مت واقفا مثل الشجرة لكن سبحان الله شكله من أجداد الضبان والسحالي والوزغات والتماسيح نففففففس الشكل اللهم انه XXXXXXL المهم الا وهو اللي يغمز لي بعينه
( الظاهر معجب ) قمت طنشته وفي داخلي سعاده كبيره الا ويقول لي يا حلو ... يالله ايش يبغى ذا العله ؟ الحين يشوفني ابوي معه ويسوي لنا سالفه ... بقولك شي مهم ... الديناصور يقوله .. انا خير ؟ قال معك سيجاره ؟ قلت نعم ؟ قال سيجاره ابغى أعدل مزاجي قلت بالله شايفني ولد ؟ قال : بالله مانتي ولد ؟ آسف يا أختي بس شكلك ما يعطي بنت .. قلت يمكن ولد متنكر عشان يقدر يدخل ... آآآه خلاص مسموح لكن قلي من وين تعرف الدخان ؟ يقولون انكم أول كنتم مؤدبين ما عندكم هذه السوالف .. قال اللي ما له أول ماله تالي الحاجات هذه من زماااااااان عندنا اللهم ان الواحد كان يدخن بورق الشجر مو بسجاير لكن التاريخ يحاول يقولكم ان ماضيكم نظيف ولازم تحافظون على ماضيكم ... انا تتذكر امك ؟ قال الله يرحمها ليش ؟ قلت ابغاك توصف لي اياها عشان اشوف انت تشبه مين ... قال امي أجمل الإناث في ذاك الوقت .. كل ديناصور يتمنى انها تكون من نصيبه طويله جميله من عايله غنيه ( الله ياكثر العظام عند بيتهم ....) والشباب عليها بالطوابير ... قلت سبحان الله امك تشبهني في نواحي كثيره ... طالع فيه قال كذابه امي ما كانت تخرع اضحكي على الناس كلهم الا عليه أنا عارف البير وغطاه...(أحرجني ) قلت يعني ما تشبهها قال لا بس لون عيوني مثلها والباقي على ابويه ... طيب شفت أبوك ؟ ... قال تستهبلين ؟ وش يقعده عند امي ؟ خلاص هو فيه وفاء هذه اليومين ؟ أنا اهاااااا عشان كذا صار عندك فراغ عاطفي وودك تدخن .... الحين معذور لكن المشكله ان الدخان مضر بالصحه بعدين يجيك سرطان في الكلى وتموت قال ما يهمني انا ميت ميت حسيت انه بيبكي لكن رجولته تمنعه قمت بكيت عنه ( قلبي رهيف )... الا واسمع ضحك خفييييف هههه هههه هههه وامسح دموعي.. و امشي وادور وين الضحك يوم لفيت ورا الديناصور الا ولقيت واحد من المتخلفين الزائرين يجلس وراه يضحك ويقول أجل فراغ عاطفي هاه 
؟ كانت معك الكاميرا الخفيه.... تخيلوا طلع هو اللي يقلد صوت الديناصور الله لايوفقه بكاني وانا جايه استانس ولا تسألون وش صار بعد كذا خليته لعبه بيدي 
( لا عصبت لحد يقرب مني ) ... المهم الا ابوي يناديني الا لقيتهم تحت القبه البيولوجيه بغوا يفرشون قلت لهم لاااااااااااااا فيه مكان أحلى ووديتهم عند الديناصورات الصحراويه اللي مثل حمايه الحياه الفطريه ( عشان يذكرنا بالبر وقت الربيع ) فرشوا وولعوا النار وبدوا يشوون وأبوي يغني لهم ( وين جاي ومخلي الباب مفتوح ....) سألتهم ليش جلستوا عند القبه البيولوجيه هناك قالوا المكان مظلم يذكرنا بالليل والخيل والشاعر اللي يقول ... انا اللذي نظر الأعمى الى أدبي ....وأسمعت كلماتي من به صنج
الخيل والهيل والبيداء تعرفني ....والسيف والرمح والقرطاس والقلم
وش هالمبالغه ؟ بالله الخيل يعرف امه من أبوه عشان يعرف الشاعر ؟ ....
لكن من يفكر ؟... اشوي الا في وسط سمرتنا الحلوه هذه والناس يجتمعون علينا اللي يصور واللي يفكر واللي جالس يشتغل ما هو داري ليش جاي ...الا والأمن عندنا .. لو سمحتوا لموا عفشكم واطلعوا من المكان ... ابويه على طول لف علينا أحد منكم سوا شيء في هذه الكائنات البريئه ؟ كلنا ... لا والله
.. قال للأمن ماسوينا شيء ليش تقولون كذا ؟ قال انتم جايين هنا بالغلط ان كان ودكم تروحون البر أنا أوديكم مو مشكله لكنكم سببتوا مشكله المكان هنا مغلق ممنوع ادخال الأكل كيف جلستوا تشوون ؟ انتم اثرتوا خوف السياح الأجانب ...نطالع وراه الا وفد مغمضين عيونهم ملتمين على بعضهم كن أحد بياكلهم .. قلت يابن الحلال ما خوفناهم ولاشيء طال عمرك هذول كانوا نايمين ويوم صحيوا مالقيوا أحد جنبهم وخافوا بس سموا عليهم وشربوهم لبن ورقدوهم مع بيض الديناصورات هناك وما عليهم باس 
.. قال : انتم من أي خلق ؟ قلت من خلق الله اللي يمشون في الأرض ويمرون بمراحل النمو المختلفه تلقاها في كتاب العلوم اننا نزحف ثم نتقلب ثم نتمسك على المساند عشان نمشي ثم اذا مشينا اهلنا قعدوا يدعون علينا ( والله سالفه يدعون اننا ما نكون معاقين ونقوم ونتحرك وننطنط ونتهبل واذا سويناها قاموا يدعون علينا الله يكسر رجلك الله يكسر رقبتك ...حلوة ذي والله أهل ما يقدرون النعمه اللي هم فيها غيرهم يتمنون لو اصبع منا لكن من يقدر؟ ..) المهم لمينا كشتتنا ولقطنا وجيهنا والناس كانوا يصورونا لايفوتكم الحين تلقون المقاطع منتشره بلوتووث دوروها بس لاتفضحونا عند الناس يعني اللي يشوفها لايوريها أحد استروا علينا الله يستر عليكم المشكله ما كنت متشيكه ذاك اليوم والا كان عااااااادي ..يالله ياحلوات اشوفكم بعدين ان شاء الله والله الله بالردود
مو كالعاده المشاهدات في ال90 والردود في ال... والا بلاش فضايح خخخخ
هذا وانا موصيه محد يدخل الا اذا رد ...
بس خلاص ياحلوات هذا آخر جزء احطه هنا واللي تبي الأجزاء الباقيه ترسل لي على الخاص وانا ارسل لها ...
مشكورين حبايبي ..