سيطرة امي لاتُحتمل

-


السلام عليكم ورحمة الله 
ماعرف كيف ابدأ موضوعي بس فعلا انا بدت روحي تنطفي بسبب امي الله يهديها 
امي انسانة صالحة ورائعة والكثير يتمنون انها امهم لكن مشكلتها انها ابدا مو مستمتعة بحياتها ولا عايشتها ماتضحك مالها هوايات مالها طموح ماعندها صديقات ماتسوي ولاشي بحياتها غير انها تلاحق بناتها مكرّسة حياتها كلها لنا ومكلفة نفسها فوق طاقتها جد يعني الحال وصل لدرجة لاتُطاق .. 
امي كل شي عندها حرام حتى الاشياء اللي احلّها ربي وكل شي تشوفه ماله داعي .. ماله داعي ننبسط ونغير جو .. يعني حتى الشي اللي هي مو عاجبها او ماجازلها يعتبر محرم علينا كلنا واذا وحدة جابته فهي عاقة مع انه عادي وحلال ..
 تعبت عشان ارضيها دايما سلبية ومعصبة حاولت اخليها تغير جو اضحك معاها وتتفائل بس دايما حالها متكدر حتى بالصباح 
تبينا كاملين بكل شي مانغلط ولا غلط بس هذا شي مستحيل .. 
يعني انا اذا كنت نايمة واذن العصر تكسر الدنيا وصراخ وماتكلمني اليوم كله اذا ماصحيت 
اذا سهرت ومانمت تصرخ علي وتعصب مني وانا مو كل يوم بنام بنفس الوقت شي طبيعي بالاجازة راح اسهر احيانا 
بس امي تبينا ماشيين ع انظمة معينة وقوانين مانتجاوزها 
حتى في الاكل والشرب نص الاكلات ممنوعة حتى اذا طلبت من مطعم وابي استمتع بالاكل ممنوع وتعصب علي وتنغص علي اللقمة 
مافيه شيبسات عصيرات مافيه حلا مع القهوة كل ذي الاشياء مالها داعي شطة جبنة اندومي دجاج  حتى الخبز اذا اكلته تقول ايش تبي فيه مو زين والرز ماله داعي واذا سوته تسويه مجبورة احيانا والملح مصنّع وضار والسكر السم الابيض والليبتون مو زين لأنه بأكياس مغلفة وحليب نيدو مو زين لأنه بعلبة والقشطة ممنوعة وكل انواع الكيك وثلاث ارباع الأكلات ممنوعة حتى بيتنا شبه فاضي احيانا يسهرون عندنا بنات خالي مافيه اكل ونطلب من ابوي يجيب واذا جاب عصبت علينا واذا اكلنا تنغصنا بأكلنا كيف تاكلين هذا مضر لصحتك اكتبي بالنت شوفي اضراره ومااتهنى بأكلي رغم انه شي العالم كلها تاكله .. 
هذا بالاكل ، حتى بطلعاتنا عمري صك العشرين واختي تجاوزت العشرين وهي بكل مكان تطلع معانا وماتخلينا لحالنا مافيه شي اسمه اسهر عند صديقاتي انام عند بيت خالي او جدتي حتى لو نمنا عندهم كل شوي تدق بالتلفون ايش تسوون ايش اكلتو متى نمتوا متى صحيتوا ؟ وتعطيني نصايح طويلة وع هالحال .. اذا رحنا لعزيمة تحسابنا ع كلامنا وتصرفاتنا وهي بس تشتغل وتودي وتحط مع صاحبة البيت كأنها انخلقت عشان تتعب واذا حرمة بزرها بكى شالته عنها ونومته وتحط الاكل وتشيل السفرة رغم انها مو مكلفة تسوي ذي الاشياء بس مساعد والناس اذا شافوها كذا يطالعون فينا بنظرة كأنها يقوولون هذولا مايستحون امهم تشتغل وهم جالسين ونضطر نقوم وتضيع العزيمة بالشغل كم مرة فهمتها وكلمتها لاتسوين اشياء كو مجبورة عليها عشان الناس ماتنقدنا تقول انت احب اساعد طب انتي مو ناقصة تكلفين نفسك فوق طاقتك بدون سبب .. 
امي دايما حزينة وسلبيه بالصباح اقولها صباح النور ترد علي كأنها مكتومة مافيه سواليف بيننا حتى لو تكلمنا كلامها كله نصايح وتحذيرات وممنوعات .. اذا صحيت الصباح وسويتلي فطور اقولها تعالي افطري معاي ترفض تقول مااحب الاشياء هاذي ولا اكلها تبيني اخرب جسمي زيك واجني ع نفسي واندم افطري انتي وراح تندمين المشكلة فطوري خبز ولبن وجبن وقشطة وبيض وطماطم تقول كلي عسل وتمر وزيت زيتون واذا جعتي كلي موز ماله ذاعي ذا كله .. 
وهاذي حياتها تمر وعسل وزيت زيتون واذا جاعت تاكل موز او فواكه وخضار حارمة نفسها من كككككل شي وحارمتنا معاها .. 
مااتذكر يوم طلعت مع صديقاتها غيرت جو مااتذكر انها راحت محاضرات او ندوات دينية بس بالبيت تلاحقنا وبالها مشغول فينا 
حتى اذا كنت بغرفتي تجيني تفتح علي الباب وتروح اقولها امي قفلي الباب معاك تقول ليش وين جالسة بالشارع وتروح .. 
جد انا تعبت من حياة الانظمة والقوانين حتى احتياجاتي كأنثى مالها داعي يعني اذا كنت بالسوق وقضيت ملابس واكسسوارت واشياء احتاجها تقول انتي مسرفة وتضيعين فلوسك وكل هاذي الاشياء مالها داعي دولابك مليان ملابس لي تشترين وتعصب مني 
اذا رحنا مطعم ومع ابوي وكل وحذة بتطلب الطلب اللي تبيه تطلع فيه عيب هذا فيه لحم واللحم ممنوع هذا فيه دجاج والدجاج ممنوع هذا فيه بطاطس مقلية وهذا فيه سجق وتجبرنا نجيب سمك او خضروات لدرجة ان ابوي صار يعصب عليها وماصار يجلس بالبيت بس برا بالملحق .. 
والله العظيم انا احاول اتحمل بس خلاص طفح الكيل صار كل شي ماله داعي وحرام 
حتى لو اجيب كريمات ترطيب وتنظيف جسم تصارخ علي هاذي الكريمات لها اضرار جانبية ومضرة بصحتك فصرت اجيب من وراها 
اذا استشورت شعري سوت محاضرة وممنوعة الصبغة والتشقير ممنوع المكياج الا للضرورة القصوى واذا حطينا مكياج خفيف بلاشر وماسكارا وروج تعصب علينا بتعدمون بشراتكم بتخربونها وصصصصراخ .. المشكلة هاذي ضروريات كيف اروح للناس بشرتي مرهقة بس هي ماتتفهم هالشي واذا خالفنا كلامها يعني احنا عاقين وخسارة التربية فينا ع اتفه الامور تعصب وتقول انا ضحيت عشانكم وبالنهاية ماتسمعون كلامي .. واحيانا تبكي مع ان الموضوع مايستاهل .. احنا كل شي بحياتها وتبينا كاملين بطريقة متعبة وشاقة .. وانا تعبت من حقي اعيش حياتي واجرب واطلع تعبت من انظمتها حاولت اخليها تنشغل بنفسها مع كل شي تسويه الا ان صحتها متدهورة وبشرتها مرهقة جدا وشاحبة وشعرها خفيف وكله من التفكير والتعب اللي بدون سبب .. حاولت اسعدها اغيرلها جو بس هي رافضة انها تنبسط ورابطة نفسها فينا يعني اذا يوم كنا بنطلع مع بنات خالي وخالاتي اغلبهم كبار ومتزوجين امهاتهم يروحون لصديقاتهم او مراكز التحفيظ الا امي تجي معانا انا مقهورة عليها وحزينة جدا ان هي ماعندها شي بحياتها غيرنا ماعنذها هوايات ولا اهتمامات مع ان معارفها كثير بس ماتطلع مع احد مرتبطة بطلعاتنا .. يعني حتى لما اكلمها عن السفر عشان نغير جو كلنا تقول ماله داعي اعددلها الدول واوصفها واوريها الصور تقول هذولا كفار لهم الدنيا واحنا لنا الجنة .. السنة الماضية كنا بنسافر دبي بس هي رفضت تقول سفور وتبرج .. حاولت اقنعها نأثت بيتنا لأن صارلنا سنتين ساكنين فيه بدون تاثيت اغلب الغرف تقول ماله داعي انتي فاضية بس جذ احس التجديد يجدد النفسية واحنا كلنا نفسياتنا تعبانة حتى اخواتي بس هي رافضة صرنا دايم كل وحدة بغرفتها مانتجمع كثير بسبب اسلوب امي الله يهديها اسلوب السيطرة المبالغ فيه والاوامر ادا جلست بوضعية معينة تصرخ علي اذا سويت حركة معينة تسويلي محاضرة اذا جلست ع الجوال تعصب اذا لبست عدسات نظر لأن نظري ضعيف تعصب وانا ماحب النظارة 
اذا طلبت منها اخرم ثاني بإذني تعصب علي اذا حطينا مناكير تعصب وتحلف علينا نمسحه اذا اشتغلت موسيقى بالغلط تعصب ويمكن تقتلنا اذا عانيت من عارض صحي ترفض اني اروح للمستشفى تقول ايش راح يسوون لك يعني اتذكر جاني التهاب بالبول الله يكرمكم وكنت اتقطع عندها من الالم وهي رافضة اروخ المستشفى وتسويلي اعشاب اذكر جاتني فترة اترجاها اروح اسوي تحليل فيتامين دال لأني اعاني من خمول وتعب ورفضت تقول ماله داعي بس انا رحت بدون هي ماتدري وسويته وطلع عندي نقص شديد بفيتامين دال واعطاني الدكتور دوا استخدمه وصرت اخبيه عنها عشان ماتشوفه وتعصب .. ماتعترف بالمستشفيات حتى نظري كل ماله ينقص وهي رافضة اسوي العملية تقول حطي عسل بعيونك .. انا خلاص ماصرت اتحمل هي تضحي وتتعب عشاننا بس الشي اذا زاد عن حده انقلب ضده اخواتي الصغار خلصوا مدارس وامي قالت بجيبلهم معلمة قران وتجويد بالبيت 
بالله هذا حل ؟ اقول لها راح يطفشون الطفل يحتاج انه يطلع ويشوف الناس .. حتى امس اختي راحت لصديقتها وامي من الساعة عشرة تدق ع جوالها ارجعي ارجعي الحين ترجعين وصصراخ وسب ودعاوي ورسلت لها السواق وطول الطريق تسب وتدعي عليها بالنهاية اختي بكت مع ان اختي هاذي زواجها قريب يعني كبيرة بس امي مازالت مسيطرة بشكل لايُحتمل 
انا تعبت من حياة الممنوعات المبالغ فيها وكل مااقدمت ع خطوة او نويت تحقيق هدف وقفت امي بطريقي حاجز بأوامرها .. يعني وصلنا لمرحلة رفض الشي لأنه فقط مايعجبها اتذكر كنا بعزيمة وجاء وقت البوفيه جاتني امي قدام بنات خالي وقالت لاتاكلين من المكرونة ؟ قلتلها ليش ؟ قالت بس ماعجبتني !! صرنا نتفشل نروح لخالاتي لأنها تخلينا نرجع البيت بدري ومانسهر حتى بالاجازات مع اننا نترجاها قدام الناس بنسهر ونجلس وترفض وتطلع قدام الناس بشخصية الام المسيطرة والعصبية .. اجلس معاها بالصباح اتكلم معاها اقولها خففي الضعط علينا واستدل لها من القران والسنة ان اسلوبها غلط وتعصب تقول يعني بتسوون ع كيفكم ماوراكم احد ؟ هااا ؟ تتفلتون بدون حسيب ولا رقيب .. رغم اننا الحمدلله عارفين ربي ومشهود لنا بالصلاح والخير لكن انا اخاف ان التشدد الزايد هذا يخلي اخواتي المراهقات يلجؤون لطرق اخرى لأن وحدة منهم طول اليوم بغرفتها ماتطلع والثانية بس ع الجهاز واختي الكبيرة بس نايمة والصغار ع الاجهزة .. حياة قاتلة لأبعد حد حاولت اغيرها لكن امي رافضة التغيير بأي شي .