شاركوني برايكم .. وش اسوي بحياة مثل هذي ؟!

أنا قلت له ماعندي مشكلة معكم أنتم بس خواتي مالي اي علاقة فيهم وبجلس بغرفتي وماني محتكه فيهم ابدا وهو حب راسي وقالي طيب .
وبعد كم يوم مادريت الا وأمي تقولي ان اخوي كلم خواتي وطلب منهم يسلمون علي وهن وافقوا
وأنا قلت لأمي لو انطبقت السماء على الأرض ماسلمت عليهن بعد كل اللي صار
مع العلم اني قبل 3 سنوات عرضت على امي اسلم عليهن عشان نحل هالمشاكل وقالت امي : طيب . وكل ماسألتها قلت لها كلمتيهم تقول لا , وتماطل في الموضوع , وأنا وقتها توقعت أن امي تكون عرضت عليهن وهن رفضوا , لكن يوم صارت مشكلة الرسايل قلت لأمي : أنا قلت لك بسلم عليهن من زمان عشان نفتك من هالمشاكل وانتي مامشيتي في الموضوع , قالت لي : ولو كلمتهن وانتي ماوفيتي بكلمتك معي وابتشلت فيك .
يعني حتى يوم أنا سعيت في الخير أمي افترضت الشر فيني .
وانا بعد الاهانات اللي جتني منهن ومن اخواني بسببهن مستحيل اسلم عليهن .
والأدهى و الأمر انهم طالعين لي بسالفة جديدة يقولون لأمي ولأخواني اني أنا ابين للناس اللي يصير بينا وأن الناس حاطين عليهن بسببي , وهذا اللي أنا فهمته من كلام أمي واخوي .
يعني الشيخات يبون يسوون كل هالسوايا فيني ومايبون يمسهم شيء قدام الناس ويحطون اللوم علي قدام اخواني وامي .
طبعا أنتم أكيد بتقولون ليه ماتتفاهمين مع اخوانك واخواتك!
كيف اتفاهم مع ناس اتهموني بديني وبصلاتي واذا اختي اللي ارسلت الرسايل فهم اتهموني بشرفي بعد واتهموني بعقلي وبنفسيتي يقولون عني مجنونة ومريضة نفسيا ومعوقه وأنا اقسم بالله العظيم ان أول دكتورة نفسية راجعت عندها قبل 3 سنين تقولي انتي اعقل وحده في البيت وانتي الوحيده اللي فيهم تفكرين بشكل صحيح , والاخصائية الاجتماعية في الارشاد الاسري من أول مكالمة معها قالت لي واضح انك انسانة واعية ولو ماكنت حاسه بالوعي اللي عندك ماني مجبورة اجاملك , الدكتورة اللي راجعت عندها تقولي انتي سليمة ومافيك شيء غير شوية رهاب اجتماعي , الناس اللي واجهتهم في مجال عملي يمدحون شخصيتي وذكائي وبعد نظري وهم مو مجبورين يمدحوني , أغلب الناس اللي اعرفها تقولي انتي انسانه ممتازة , ماعدا اخواني وخواتي من تطلقت وهم يحاولون يقللون من قيمتي ويبون يطلعوني اغبى انسانة في الدنيا وماعرف ابداً أسوي اي شيء , يبون يطلعون انفسهم أحسن مني بكل شيء .
اخواني اذا حاولت اتفاهم معهم يكذبوني بكل كلمة اقولها ويتهموني بأشياء أنا ماقلتها ولا سويتها حتى اخوي الكبير يقولي اكتشفت كم مرة انك كاذبة على خواتك بأشياء ماهي حقيقية , وهم كم مره يشوفون بعيونهم خواتي وش يسوون فيني ويسكتون ولا كانهم شايفين شيء .
أنا هالاخوان وهالخوات ماعاد لهم أي شيء بقلبي وأنا مايهموني بشيء كل اللي ابيه البعد عنهم أنا فكرت بالانتحار وفكرت اني اتهمهم بأي شيء عشان دار الحماية تقبل تدخلني السكن لكن أنا عندي خوف من الله ومابي اتهمهم بشيء ماصار ومابي انتحر لأن الانتحار خسارة الدنيا والآخر ة
أكيد بتقولون وين دور ابوك في الموضوع ؟
لو البيت فيه ابو من الأول ماصار هذا حاله , بس ابوي رجال مهيت البيت من يومه ورامي المسئولية على اخواني وعايش هو حياته على ان عمره في التسعين ويمكن اكثر .
وفلوسه يوزعها على الناس اللي تعجبه وحنا مايعرفنا بريال واحد وهو حتى لاصلاة في المسجد وكم مره يسافر البحرين وسوريا , حتى في مسألة الزواجات مايهمه أن حنا البنات نتزوج كم مره ننخطب ويرفض هو بسبب مزاجيته, ولا كان حنا البنات كلنا متزوجات الحين .
وطبعا مو أنا الوحيدة المظلومة في البيت اصغر اخواني دخل السجن بتهمة سرقة سيارات بسبب اهمال ابوي واخواني له .
وامي حرمة كبيرة فنت عمرها وصحتها على اخواني وماقصرت معهم بشيء كانت تشتغل في البيت عشان تساعدهم في المصاريف وتشيل عيالهم عشان حريمهم تكمل دراستها , والحين صحتها تعبانه و مالها اي تقدير ولا احترام عندهم حتى يوم بغت تتعالج في المستشفى بالغصب وافقوا اني اوديها على ليموزين .
اخوي الكبير كم مرة يوعدها بشيء وياخذ فلوسها ويخليها .
البيت كله صاير مشاكل وماينعاش فيه واحد من اخواني ماندري هو مدمن ولا مريض نفسي وياما سوى مشاكل مع اهلي وتهدد ابوي بالقتل وانسجن بتهمة عقوق والدين والحين هو طلع ومايكلم ابدا أي احد فينا ولا يسلم علينا .
خواتي المتزوجات طردوهم اخواني من البيت مايبونهم يجون , وانا هن ماهمني بس همتني أمي المسكينة اللي اكيد تبي تشوف بناتها وتبيهم يزورونها .
وبكل الحالات أنا ماعاد يهمني احد أبي انجو بنفسي وبس , أبي اعيش حياة بدون خوف وترقب للي بيصير لي , ابي احس بالامان واحس بالحياة ابي اشتغل واشوف عيالي واعيش حياتي بكرامة .
بس كيف كل هذا واخواني متحكمين حياتي وهم ناس مايخافون من الله واللي شفته منهم طول هالسنين اثبت لي هالشيء .
وحتى الشرطة ودار الحماية لو بلغتهم مارح استفيد شيء لأنهم بيرجعوني لأهلي وبيخلونهم يبهذلوني مثل ماصار معي يوم دقيت على الشرطه . والسكن حق دار الحماية مايدخلون فيه الا حالات خاصة .
أنا ماصار لي حل غير الخطابة صرت ااتواصل مع خطابات يمكن اتزوج وحتى هذا الشيء مو مضمون لأنه احتمال احد يتقدم لي ويرفضون اهلي , لأنهم مزاجيين في مسألة الزواج ويدققون بشغلات كثيرة
هذا غير اني خايفه اطيح برجال مايطلع زين ولو تطلقت ورجعت لأهلي تبهذلت اكثر من الاول .
ياليت تنصحوني وش اسوي وياليت أي أحد يقدر يوصل سالفتي لأمير او مسئول يساعدني
والله يجزاكم خير

الله يفرج همي وهمك
ويفتحها بوجهك وييسررلك امورك ياكريم

الله يفرجهاعليك وينصرك على من ضلمك يارب شكل بييتكم فيه شي يمكن ببينكم سحرتفريق اوحسداوعين
واضح ان الي يصيرلكم مهوب طبيعي انصحك بقراةسورةالبقرةكل يوم ورشي البيت بمامقري وملح والزمي الاستغفار
والدعاءفي قيام الليل وحاولي تتصالحين مع اخوانك واخواتك لوجه الله لان المتخاصمين توقف اعمالهم ماتررفع
وابدي صفحه جديدةمع الكل وبتشوفين كيف ربي يفرجهاعليك

اقري البقره دايم وقومي الليل ولاتشيلين على خوووواتك ولا اي احد*صفي قلبك*هذا بحد ذاته راحه .ودايم قولي وش بقى؟؟؟حتى اشيل بقلبي ..شوفي انا عارفه يمكن ماتنسين لكن تناسي الدنيا فانيه وعيشي لنفسك وادعي دايم لعيالك ان الله يصلحهم ويرزقك برهم..
ودامك جالسه عند اهلك نظفي معهم وشيلي وحطي .لاتحطين ببالك ذا اهانه لك.انتي لازم يكون لك دوور ببيتكم عشان انتي عايشه..وتري الشعل يلهي الواحد عن همه شوي.وصدقيني بتحل امورك لانو يمكن هم زعلانين او شايلين بخاطرهم عشانك ماتشتغلين؟ساعديهم تري الدنيا فانيه...وحبي نفسك واشغليها بالمفيد ..شوفي هواياتك مارسيها وكمان اذكري الله دايم واستعيني بالله .......وابدئي صباحك بالاذكار وعند المغرب لاتنسي الاذكار .....الله يوفقك ويطمنك..

اسأل الله ان يعجل لك بالفرج

ادعي دايما بالفرج واستغفري



------

اكثروا من " لا حول ولا قوة إلا بالله "

فهي كنز من كنوز الجنة 💐