منقول
قصة أخرى :



انا لي تجارب وايد مع الاستغفار وفعلا الاستغفار اثره عجيب علي حياتنا
اول موقف : كنت رايحه مراجعه حوامل والوقت متاخر فاكيد بيكون زحمه وخالتي ام زوجي الله يحفظها اهي الي علمتني الاستغفار ونصحتني استغفر وانا رايحه المراجعه وفعلا دخلت وكان زحمه وايد وجلست استغفر شوي خمس الي عشر دقايق وطلعتلي الممرضه ونادت اسمي من بين كل المراجعات سبحان الله ودخلتني علي الدكتوره

الموقف الثاني: طبعا كل ما نروح السوق نقعد ساعه نفتر علي موقف للسياره وهم نقعد نستغفر نلقي موقف للسياره وجدام المحل الي نبيه

الموقف الثالث الاسبوه الي طاف: كان عندي بالجامعه ماده ابي اسجلها واذا ما سجلتها ما راح اتخرج ومحد راضي يسجلني وقعدت استغفر وهم ما كو فايده وكنت حدي متحبطه وقلت مالي الا عميد الكليه وانا رايحه دقيت علي زوجي وقالي لا تروحين للعميد رجعي الكليه وانا بروح معاك ثاني يوم للعميد طبعا كانت خانقتني العبره خلاص بنهار وبنفس الوقت قاعده ادعي واستغفر ورجعت الكليه وقلت خلني احاول مع الدكاتره اخر مره ومن دخلت علي الدكتور وافق علطول وقالي من باجر تداومين عندي طبعا كان قلبي بيوقف من الفرحه
واسفه علي الاطاله

منقول
قصة أخرى من الأخوات :

انا والاستغفار !!!!!!!!!!!!!!!!!!
تزوجة وانا صغيره وكتب علي ان اسكن في مدينه ثانيه
صغيره وحيده حزينه هذه كانت حالتي
زوجي مع اصحاب الدراسه مشغول .يذهب السكن الجامعي ويتركني مع الوحده تعتصر فوائدي
سمعت عن الاستغفار وفضله ثم داومت عليه..وماهي الا اشهر وننتقل الى مدينه ابعد عن اهلي من المدينه الاولى
ويزيد الهم ويزيد العناء ويزيد......الاستغفار......
زوجي اصبح لي وحدي يحكي لي همومه والم فراق الاحبه وطبعا حس بما اعاني فكان لي نعم الصديق
ورزقني الله جاره وصديقه مثل اهلي واكثر
فاسبحان من يرزق من الاستغفار مالا يرزق من سواه
هذه تجربتي حبيبتي.كلي عنا..
كتبتها مشاركه بسيطه في موضوعك الرائع

منقول
والله ان امره عجييييييييييييييب
انا كنت جالسه في البيت لا شغله ولا مشغله لا وظيفه ولا دراسه
وفجاه قريت في النت عن فضل الاستغفار و كيف يفتح ابواب الرزق
و داومت عليه في الليل و النهار وانا في البيت و في السوق و انا في السياره
في اي مكان و بعد 3 اشهر اتصلوا كليات التقنيه العليا يقولون اني مقبوله عندهم
والله ما تتخيلون كيف كانت فرحتي ..الحمد لله الذي بنعمته تتم الصالحات
موقف ثاني بعد : كان موعد دورتي قبل عيد الاضحى بخمس ايام و كان نفسي
اصوم يوم عرفه و تميت استغفر و استغفر بنية اني اصوم هاليوم و فعلا تاخرت علي
الدوره و صمت و بعد الفطور عى طول يتني الدوره و الله اني يلست اصيح من دهشتي
وايد وايد اشياء استوت لي منها اني الحمدالله ربي اعاني على قيام الليل و صلاة الضحى
حتى اني اول كنت انام بصعوبه و اتم اتقلب ساعتين على الاقل قبل لا انام اما الحين الحمدالله من احط راسي على طول انام .. الحمد الله

منقول
مره كنت سايره السوق ويا اختي وبنت عمتي -- وسرنا محل وماعرف كيف نسيت تلفوني وطلعت معنه كان فالشنطه وما طلعته بس ماعرف كيف طاح وخاصه اني ما طولت فهالمحل -- المهم ركبنا السياره على اساس بنسير المول وونحن فالدرب قلت بتصل في ابويه بساله عن شي ويوم شفت الشنطه لقيت ماشي تلفون اهنه وقف قلبي وتميت ادور فالسياره ماشي فايده قلت حق بنت عمتي اتصلي على تلفوني -- يوم اتصلت لقته مغلق -- معنه كان مجرج فول -- قالتلي اختي لو مغلق معناته انسرق ما تتصورون كيف كان شكلي مب امركزه قلنا حق الدريويل يردنا المحل اللي نزلنا فيه قبل اشويه وسرت مره ثانيه سالت اللي عالكاونتر قالولي ما شفنا شي -قالي الريال اتصلي عرقمج قتله يعطيني مغلق قالي خلاص انسرق -- والله ركبت السياره وفيني صيحه -- مب مشكله التلفون -ولا البطاقه -- بس لانه فيه صوري وصو العايله فالتلفون وهالشي خلاني صدق خايفه من هالشي انه اي حد ياخذه وينشر الصور -- المهم سرنا المول وانا من داخلي صدق كنت استغفر ربي استغفر واستغفر لين ما وصلنا المول واول ما دخلت شفت مال التبرعات سرت اتبرعت ب 50 درهم وقلت في خاطري يارب اللي خذ تلفوني يستر علي وما يفضحني - ودخلت وانا بالي مب وياهم امشي بس جيه -- عقب يلسنا في مكان واشويه اختي اتصلت في اخويه وخبرته بالسالفه وجان يقولي عطيني ياها بكلمها ويوم كلمته قالي جيه تنسين التلفون قالي مره ثانيه لا تنسين تلفونج في اي مكان والتلفون عندي والله ما تتصورون كيف ارتحت قتله كيف وين حصلتوه -- قالي حرمه عيوز شلته حصلته طايح فالمحل وشلته وخلته عندها واتصلت في اخويه عشان ايي اياخذه -- سبحان الله

منقـــــــــــول
قصة أخرى :

أنااا بعد سمعت عن الاستغفار في الاشرطة الدينية..وفعلا..سبحان الله مفعوله مثل السحر اللي يغير حياتج طبعا للاحسن باذن رب العالمين..

من كم سنة مريت بتجربة ارتباط فاشل بس لمدة عشرين يوم وكنت في قمة الانهيار..من عقبها بديت في الاستغفار وما كملت شهرين من الانفصال ..وقدمت على اول وظيفة لي..والحمدلله انقبلت فيها من بين مئات البنات..وبتوفيق من رب العالمين والكل يتحرا مدخلة واسطة..ما يدرون انه واسطتي الوحيدة كانت استغفاري لرب العباد الذي ما يخذل عباده..

والحمدلله بعدني مع الاستغفار والحمدلله حياتي تحسنت للافضل..