اسمعي رقيه الشيخ خالد الحبشي للشعر

نفس حالتي خصصل تطيح :( بديت اصلع من قدام جبهتي كبرت وللحين مالقيت حل كل ماشفت شعري يطيح قدام عيني اجلس اصيح :(

انا كنت مثلكم شعري يتساقط بالهبل وفترة التساقط كنت استخدم زيوت وخلطات بس ما فاد معاي بشي ولما بدت الفراغات تطلع قلت ما لي غير اروح لطبيب الجلديه .. ورحت لطبيب الجلديه بالمستشفى الحكومي وسويت تحاليل وطلع عندي نقص حديد والطبيب وصفلي على شامبو ومحلول تدليك وتونيك موجود بس بالمستشفيات الحكوميه ووصف بعد قطره وحبوب حديد واستمريت على العلاج يمكن حوالي ست اشهر والحمدلله التساقط خف بنسبة كبيره .. وبعدين شفت دعاية محلول سن بيرست الصيني sunburst اللي ييي على قناة فتافيت وهذي صورته





وقفت علاج المستشفى الحكومي وقلت خل اجربه .. وما شاء الله هالمحلول حيل خفف التساقط بنسبة كبيره .. وبالنسبه لانبات الشعر فكان خفيف ويمكن هالشي يعتمد على طبيعة الشعر نفسه .. المحلول فيه 6 علب ويكفي حوالي 6 اشهر .. ولما قرب يخلص المحلول قلت خل اتجه للاشياء الطبيعيه بما اني قدرت اتحكم بالتساقط


الحين اول شغله اتسوينها انج لا تستخدمين اي زيوت او خلطات لان شعرج الحين ضعيف وما يتحمل هالزيوت والخلطات الثقيله .. ولما تتحكمين بالتساقط عندج ردي استخدمي الزيوت والخلطات .. وشلون تعرفين انج تحكمتي بالتساقط؟ لما شعرج يقدر انه يرجع للتساقط الطبيعي وانه ما يعتمد بشكل يومي على الفيتامينات والبخاخات والامبولات معناها انج قدرتي تتحكمين بالتساقط وشعرج رجع طبيعي والتساقط يكون طبيعي .. او بمعنى اصح اذا كان كمية التساقط نفسه سواء استخدمتي الادويه او لا فمعناها انج قدرتي تتحكمين بالتساقط

والحين اول شي خلال فترة التساقط الشديد مثل ما قلت ابتعدي عن الزيوت والخلطات ولازم تبتدين تستخدمين الادويه اللي تعالج التساقط .. والبرنامج العلاجي لازم يتضمن الاتي:

1- حبوب فيتامينات للشعر

2- بخاخ او سيروم او تونيك او امبولات للشعر او كلهم مع بعض ان امكن

3- شامبو طبي

4- حرصي انه مكونات الفيتامينات والبخاخات او السيروم او الامبولات تكون طبيعيه وما تكون كيماويه لان الكيماويه يكون لها اثار جانبيه بعد ما تتركينه ويمكن يرد يتساقط شعرج وبكميات اكبر من قبل مثل بخاخات الهيرجرو, ريجن, منوكسيدل, neoxidil نوكسيدل .. فضروري تكون المكونات طبيعيه او نسبة المواد الطبيعيه تكون اكثر من المواد الكيمياويه


استخدمي هالعلاجات لغاية ما يخف التساقط ويرجع للمعدل الطبيعي وانه يوصل لمرحلة انه حتى لو ما استخدمتي هالعلاجات لمدة نقول حوالي اسبوع فالتساقط بعد يكون طبيعي وخفيف .. اذا وصلتي هالمرحله ابدي استخدمي الزيوت والخلطات لانه شعرج اهني يكون رد طبيعي فيقدر يتحمل الزيوت والخلطات الثقيله .. وهم اذا صار التساقط طبيعي حرصي بعد انج تستمرين تاخذين هالعلاجات لضمان انه ما ينتكس شعرج مره ثانيه وهم لان الشعر يحتاج عنايه دايمه


طريقة استخدام الزيوت والخلطات:

1- اكبر غلط نرتكبه لما نحط الزيوت والخلطات انه نستخدمه على بشره مو نظيفه ودهنيه وخاصة مع الزيوت .. فضروري لما تستخدمين الخلطات والزيوت انه البشره تكون نظيفه ومو دهنيه وخاصة لما تستخدمين الزيوت .. ويفضل انج تستخدمين الزيوت على شعر مغسول لانه البشره تكون نظيفه والمسامات مفتوحه فتستفيد بشكل كبير من الزيت

2- بالنسبه للزيت نستخدم بضع قطرات على الفروه .. يعني كميه حيل صغيره ومو تغرقين شعرج بالزيت هذا اكبر غلط لانه البشره تختنق وما تتنفس .. اما باقي الشعر فعادي حطي الكميه اللي تبينه وعادي لو غرقتيه بالزيت

3- وبالنسبه للخلطات فتقدرين بس تحطينها على الفروه بدون الشعر كله لان الهدف الرئيسي انه الفروه تستفيد .. وبعدين فيه خلطات تكون فيها مواد حاره مثل الفلفل والثوم او مواد تنشف الشعر مثل السدر والصبار وهالاشياء تسبب جفاف للشعر وخشونته .. فإذا هالاشياء موجوده بالخلطه فاستخدمي الخلطه بس على الفروه علشان لا تضرين شعرج .. اما الخلطات اللي ميزتها انها تنعم الشعر فحطيها عادي على كل الشعر لان هالخلطات مخصصه لعلاج الشعر الجاف والخشن

4- يفضل انه تحطين الزيت والخلطات لمدة ساعتين ولا تكثرين علشان لا تختنق البشره وخاصة للخلطات .. اما الزيوت فإذا انتي حطيتي كميه حيل صغيره على الفروه بحيث انه شعرج ما يبين انه دهني فعادي تحطينه الوقت اللي تبينه .. مع انه ساعتين كافيه انه الفروه تستفيد من الزيت

5- اللي شعرها دهني لازم وضروري تغسل شعرها قبل لا يدهن لانه اذا دهن فالتساقط راح يزيد .. واللي تقول انه مو زين انه نغسل الشعر وايد فهالكلام غير صحيح وخاصة للي شعرها دهني لان الدهن يسبب التساقط والقشره في الراس


ملاحظه: قبل لا تستخدمين اي شي على راسج اقري عن اضرار ومميزات هالماده لانه في مواد يكون لها اضرار مع كثرة الاستخدام مثل البيض والمسمار (القرنفل) .. هذيله ابتعدي عنهم ولا تضيفينهم بالخلطات .. بالنسبه للبيض لانه ني واي شي ني يكون فيه ميكروبات وجراثيم ويمكن يسبب امراض جلديه لفروة الراس .. اهو يمكن بالبدايه يعطي نتيجه حلوه بس بعدين يبدا يسبب امراض جلديه للشعر ومنها الثعلبه فابتعدي عن البيض .. اما المسمار فيستخدمونه علشان يحفزون الشعر على الانبات بس بالمقابل مع كثرة الاستعمال يسبب إتلاف الأنسجة يعني اتلاف انسخة الشعر


بالنسبه للماي اللي نسخدمه:

اذا تقدرين تحطين فلتر على الماي فيكون زين لان الماي اللي نسخدمه حاطين فيه مواد تسبب التساقط مثل الكلور


واخيرا: الشعر يحتاج عنايه دايمه .. مو يتحسن شعرج وتوقفين تعتنين فيه هالشي غلط لانه راح يرد ينتكس مره ثانيه .. فضروري الاهتمام الدايم بالشعر .. شوفوا ما شاء الله الهنود شعورهم صحيه لانهم من لما كانوا صغار وهم يهتمون بشعورهم ويزيتونها وحتى لما يكبرون ويعيزون يقعدون يحطون زيت بشعورهم


ايه صح كنت بسألج سويتي تحليل الهرومانت والغدد؟ اذا ما سويتها سويها وجوفي يمكن يكون التساقط بسبب واحد منهم

حبيبتي انتي عندك نقص بفيتامين دال

حللي عن فيتامين دال وخوذي العلاج بانتظام و راح تدعين لي ان شاءالله

ادري بتقولين وش هالواثقه انا محدثتك زيك وكل الي حولي وتتساقط شعورهم بدون سبب قلت حللوا عن هالفيتامين الصامت

طبعا لايوجد هالفيتامين بالحكومي
بالمستوصفات الخاصه

واقري عن هالفيتامين واعراضه الكل يشتكي منه

انصحك ببخاخ مينوكسيديل سعره 64.5 بالصيدليات يوقف التساقط ويكثف الشعر بس لازم تستمرين عليه وهو الحل الطبي الوحيد 
وعن تجربه بيكثف شعرك مره وتفتكين من الخلطات والزيوت 
وتقدرين تسوين بحث بتويتر عنه وتشوفين الدكاتره كيف ينصحون فيه وانا اخذته من طبيبه جلديه وسوي بحث باليوتيوب وشوفي النتايج 
اتعب وانا اقول حلو